الموضوع: استفسار الي مالكي الفرونتيرا ...!!؟؟

بص ياسيدي

بالنسبة لإستهلاك البنزين بهو متغير جدا حسب طريقة سواقتك (رجلك عالبنزين) و إذا كانت داخل المدينة او في طرق مفتوحة بتفرق كتير

يعني ممكن جوة البلد تبقى قليلة جداً مع كثرة التوقف في الإشارات و لو التكييف شغال وانت واقف و لو المسافة قليلة ممكن تبقى من 70 - 90 كيلو في الصفيحة

وفي المشاوير المفتوحة نسبيا جوة البلد بتوصل ل 120 كيلو في الصفيحة يعني لو بتروح الرحاب او التجمع او العبور في جزء من مشوارك اليومي غير الزحمة

اما في طريق سفر و مسافة مفتوحة بتعدي 140- 150 كيلو في الصفيحة

وكمان نوع البنزين اللي بتحطة بيفرق يعني ال بنزين ال 92 بيمشيها اكتر في الصفيحه عن ال 90 و دة عن تجربة و قياس لأني باسجل كل شيء للسيارة و قراية العداد عند كل تفويل و باسجل عدد الليترات

بص قطع غيارها معمرة و متينة و مش رخيصة في معظم اجزاء السيارة و العفشة
يعني تيل الفرامل التايواني ب 55 جنية و هو كويس جدا و الياباني بيبقى اغلى شوية بحوالي 120 جنية
المساعدين الامامية و الخلفية ب 250 جنية للجوز
الشبكة ب 120 جنية
الإشارات ب 13 و الفانوس الكبير ب 70 ودة لأنهم (الشبكة و الفانوس و الإشارة و الأكصدام و الكبوت ) هما هما بتوع الشيفرولية الفاستر النص نقل
بس قطع غيار الموتور بتاعتها غالية بس مش قوي يعني لأنها لازالت ارخص من قطع غيار الشيروكي بكتير
العربية محترمة جدا و أوسع من الشيروكي جدا في الصالون الكنبة واسعه قوي و بينها و بين ضهر الكرسي نص متر
و التابلوة شيك جداً و قعدة العربية و عفشتها مريحة جدا و في السفر ممتعه و تكييفها رائع
و فيها كمبيوتر للصيانة و الاعطال بيشيك على كل شيء في الموتور و الزيوت و الفتيس اثناء التشغيل
وفية حساسات للسخونة الزائدة في زيت الفتيس او الموتور
معظم اللي عندة فروتيرا بيبقى عندة عربية تانية علشان كدة مابيمشوش بيها كتير و بيستعملوها بس في السفر
بصراحه ركنتها وسط البلد صعبة
العربية معمرة و قطع غيارها بتعيش و عربية ماتقفش بيك لو انت مهتم و بتصونها و بتتابع اي اشارات او لمبات كمبيوتر تنور
و بتمشي تمام عالرمل و في الطرق الوعرة موتورها شديد جدا و عزمها قوي الموتور 6 سلندر بشكل حرف في كرنك قصير و 24 صباب بيولد 180 حصان
و خللي بالك من فتيس العربيات دي و انت بتشتريها لأن العيب الوحيد في الفرونتيرا هو فتيسها لو فية مشاكل بيتعبك و بيتكلف كتير
لكن لو بتحافظ علية و بتغير زيت و فلتر لزيت الفتيس اول باول و مابتهفلطش في النقلات و انت بتركن و بتطلع بيشتغل تمام و بيعيش

بص بالنسبة لأسعارها
موديلات 98 و 99 بتبدي من 85 وطالع لو حالتها في المتوسط

موديلات 2000 و 2001 حالتها بالتالي احسن و ماشية كيلو متر قليل و سعرها بين ال 100 و 110
ال 2003 غالبا بتبقى بحالة الجديد و سعرها في حدود ال 130 الف

الا لو العربية فيها عيب او حادثة بتلاقي سعرها اقل من المذكور

فية معرض متخصص في الفرونتيرا بالذات في مصر الجديدة ممكن اديلك تليفونهم و هما ناس كويسين جدا و أمناء و متخصصين في العربية دي بالذات و فاهمين كل حاجة فيها و عندهم عربيات كتير معروضة منها لأنهم بيشتغلوا عليها جدا

نسيت اقولك ان مافيهاش عيب السخونة اللي في الشيروكي

يعني العربية في عز الحر و التكييف شغال تمام و الموتور مايسخنش و لا حاجة و مش محتاجة اي تعديلات او مراوح كبيرة او حاجة

حتى عربيتي اول ماشتريتها كان الردياتير بتاعها مليان صدا و مالي القربة وبرضة كانت تمام و مابتسخنش في عز الصيف و الحر و اول ماشتريتها خدتها غسلت الردياتير و حطيت مياة خضرا أمريكاني (كوولر) كنوع من الصيانة و الوقاية


فية غلطة طتابية و انا باكتب قلت "بص قطع غيارها معمرة و متينة و مش رخيصة في معظم اجزاء السيارة و العفشة " بس كان قصدي أقول ان " قطع غيارها معمرة و متينة و مش غالية في معظم أجزاء ........"

و لو انت بتفكر فيها ادرس الموضوع بس ماتشتريش فرونتيرا تكون فيها مشكلة في الفتيس او الموتور
يعني ياتاخدها نضيفة يا بلاش
ولو عاوز اي مشورة او استفسار انا تحت أمرك

لأني كنت عاوز اجيب شيروكي اساساً و كان معروض عليا عربيتين بأسعار لقطة جدا و حالات كويسة بس بعد دراسة شاملة و مستفيضة قررت ان الشيروكي مشاكلها كتير و متاعبها و مصاريفها كتير برضة و ان الفرونتيرا برغم انها أغلى بس تستاهل و كفاية راحتها في القعدة و السواقة و السفر و التكييف عن وجع دماغ الشيروكي بين عفشة ناشفة و تكييف وحش و تبريد سيء

بص انا معاك انها بتستهلك بنزين شوية

بس مقابل كدة امان و متانة يعني شيء مقابل شيء
وانا برضة باستعملها جوة البلد و بابقى متطمن وسط الميكروباصات و الاغبياء اللي مابيعرفوش يسوقوا و الغتتين اللي بيحبوا التزنيق وانا ركب الفرونتيرا اللي يحب يزنق يزنق و الأكصدام الصلب مايتخافش علية و اللي لية شوق في حاجة يوريني نفسة :D

وانت ممكن لو تحب بقى تقلبها غاز و بكدة توفر الاستهلاك للنصف, بس انا عن نفسي مقتنع انها كدة تمام عزم الموتور متناسب مع وزنها
و اماحبش العربية تبقى ضعيفة او مكتومة مع الغاز بس لو انت حابب توفر يبقى اقلبها غاز و حاتبقى اقتصادية معاك جدا

على فكرة انا عضو في منتدى الفرونتيرا في استراليا و لقيت ان الاستهلاك عندهم احسن من عندنا بكتير علشان طرق مفتوحه بيقولوا ان معدلها في استهلاك الوقود بيبقى في المتوسط 12.5 لتر لكل 100 كيلومتر
وواحد منهم قاللي ان احسن معدل وصللة كان 10لتر بنزين و نص في ال100 كيلومتر بس هو كان مسافر مسافة طويلة على طريق مفتوح و مثبت العربية على سرعه 110 كم/ساعه
يعني عملت حوالي 190 كيلو في الصفيحه و دة يعتبر معدل ممتاز اللانسر ال1300 اللي عندنا مابتعملوش اصلا :)

عامه انا مفروض اغير البوجيهات قريب لا فية حريق ني شوية هباب في الشكمان, و يمكن اضبط الانجكشن كمان في منصور و حاقوللك اية النتيجة لو المعدل ضبط معايا

موتور الدبابة حايبقى ضعيف عليها دة اولا
ثانيا تمن موتور الدبابة كامل جديد حايعدي ال 20 الف جنية
و يحتاج تعديلات لتركيبة في السيارة و فتيسة مانيوال محتاج تعديل في الكونسول و الدواسات

موتور الفرونتيرا قوي جدا فوق ما تتخيل
وفية زرار باور درايف بيخللي العربية غول و لا تقوللي عربيات صغيرة و لا استرا و لا لانسر تطلع منة مواتير و دة عن تجربة

ف بديهي كدة ان موتور الدبابة حايكلفك غالي و يقرفك في تركيبة و في الاخر النتيجه مش مضمونة والمؤكد انك كدة بتعيب العربية و لو جيب تبيعها محدش حايقتنع بيها وهيه فيها موتور تص تقل بدل موتورها اللي يساوي 30 او 40 الف جنية

انا واثق ان موضوع البنزين مش حايقلقك زي مانت متصور زي مانا كنت برضة قلقان منة و عامل حسابة و لما جبت العربية لقيت اني يعني باستهلك بنزين بكام؟؟؟ بالكتير ب 300 او 400 جنية في الشهر مش مشكلة كبيرة و مش قضية قصاد المميزات اللي العربية بتوفرها
والغاوي ينقط بطاقيتة زي مابيقولوا
و لو انت مش عاوز تكلفها 400 جنية في الشهر بنزين اقلبها غاز و كلفها 200 جنية بس

بس برضة انا واثق ان كل مخاوفك دي حاتتبدد و حاتسيبها زي ماهي بموتورها و حاترتاح معاها بعزمها و قوتها

وربنا يوفقك لما فية الخير

مافيش مشكلة مع المرور و لا حاجة لان الموتور الديزل بينزل في عربيات 4*4 كتير

و بالنسبة لطوابير التاكسيات عالغاز الملاكي مابيقفش في طوابير ياباشا

التاكسيات ليها طوابير لكن الملاكي يفول و يمشي على طول و إسأل في اي محطة
بصراحه ان وانا باشتري شفت ييجي 15 او 20 فروتنيرا كلهم بنزين و اوتوماتيك

بس سمعت من واحد اعرفة انة كان عندة واحدة موديل قديم شوية 94 تقريبا و كانت موتور ديزل
بس دي اكيد مش التجميع المصري بتاع منصور شيفرولية لأن منصور جمعها من 1998 لغاية 2003 و بس
و بصراحه انا مش متأكد من كلامة ممكن يكون بيقول كلام و السلام

انا بعت لحضرتك رقم و عنوان المعرض في رسالة خاصة ياباشا

و اهلا بيك مقدما في نادي الفرونتيرا