الموضوع: لو رجع بيك الزمن للوراء هل كنت ها تشترى اوبترا ايضا ؟

الشيفرولية عامة عربية ممتازة بالنسبة لمستواها أنا معايا الأفيو 2006 عاملة 79000 كم و أيضاً الأوبترا 2008 عاملة 46000 و ما عنديش فيهم مشاكل و الحمد لله كل اللى أتعمل فيهم صيانات عادية و ما ننساش أنهم سلالة الدايو اللى أثبتت نفسها على مدار 10 سنوات فى مصر, و لو كانت أحتياجاتى تسمح كنت هأشترى الكروز لكن أنا حالياً محتاج سيارة كبيرة لأن عيلتى كبرت فهشترى لوجان 7 راكب بدل الأفيو

السلام عليكم
مشكلتي ان العربية فيها 4 اشياء اكتشفتها بعد شراءها ب اسبوعين و لو كنت اكتشفتها قبل كده كنت رجعتها حسب القانون و هي :
1- رعشة ورجة بالفتيس عند النقلات و اثناء الموور وو حاليا الرعشة بحسها في العربية كلها
2- ضعف بالفرامل و بعد عدة زيارات للتوكيل اعترفوا بوجود هواء بزيت الفرامل و سحبوه و مازال اداء الفرامل ضعيف
3- حدفة شمال عند السرعات الاعلي من 100 حاليا وفي الاول كانت حدفة يمين علي اي سرعة وده حصل بعد تدخل التوكيل يعني جه يكحلها عماها
4- رعشة بدواسة البنزين (يعني وانت دايس علي دواسة البنزين بتحس انها بتتسجب لوحدها من تحت رجلك)
المشكله في التوكيل هو عدم احترام رأي العميل بمعني اول حاجة انه يحاول يطلعك مبتفهمش في العربيات لأن الاسلوب بتاعهم كالتالي يستقبلك مهندس عادة بيكون سنه لا يتعدي 25 سنه يعني حديث التخرج و غالبا بيكون يدوبك بيعرف يسوق و يقولك ايه مشكلتك علي الرغم انك بتديله امر الشغل من قسم الاستقبال بالبوابه مدون به المشكله و بعد متحكيله و هو مش مديك اي اهتمام يقولك لو سمحت ممكن المفتاح و يروح يجرب العربية وانت بجوارة و بعدين يفيدك بان العربية زي الفل مفهاش اي مشكله و لما تأكدله ان المشكله حصلت معاك يقوم مشكورا بسؤالك هو حضرتك كنت راكب ايه قبل الاوبترا فتقوم مجاوبه بكل سلامة نيه فيقولك اه حضرتك بتقارن عربية مختلفة تماما انت حضرتك اكيد لسه متعودتش علي العربية و بعدين انت حضرتك لسه معملتش كيلو متر كتير ادي للعربية فرصة عشان اداءها الحقيقي يظهر و يطلعك انك غلطان او كذاب او مبتفهمش بس طبعا دون التصريح بذلك !!!
المشكله من وجهة نظري كالتالي :
1- خبرة المهندسين ضعيفة جدا و بيعتمدوا علي الاسطوات بالورشة اعتماد كلي عشان يقيموا اداء اي عربية
2- من مصلحة الفنيين (الاسطي) انه يزحلق الزبون عشان ميوجعش دماغة و يقلل عنه الشغل قدر المستطاع
3- عدم وجود شخص مسئول عن الاختبار للسيارة يكون متخصص في القياده و لديه خبرة و حساسية بالسيارات يستطيع احساس الاختلاف في السيارة _test driver ( لأن طبعا المهندس حديث التخرج من اين له بالخبرة في القياده و ملاحظة اختلاف السيارة عن standard
4-لديهم تعليمات بانه يرسم الدور علي العميل و يبين نفسه شخصية وده طبعا بيتكسر لما يكون العميل فاهم حقوقة كويس و بيقدر يوصل للمسؤلين سواء بالتوكيل او خارجة ساعتها المعاملة بتختلف 180 درجة
5- من التعليمات حاول تتوه الزبون عشان لو تاه يبقي انت ريحت دماغك و قللت عن التوكيل عبئ التغيير و خلافة علي الرغم من ان التوكيل بيكسب مكاسب غير عاديه من التغييرات التي بتحدث اثناء او بعد الضمان لأنه بيحملة بالكامل علي المصنع
و بالتالي انت كعميل بتواجه بالكذب و قلة الذوق في التعامل ناهيك عن العطله و لطعك بالساعات و لما تسأل عن المهندس اللي معاه السيارة تلاقيه بيجرب عربية تانيه و سايب عربيتك و لطعك دون ادني مسئوليه
اقسم بالله انني لا اتجني عليهم بل هم اللذين تجنوا علي كل من وثق في علامتهم التجارية و اشتري احدي سياراتهم
عدم الفهم و الكبر من المهندسين يخليك تدوخ السبع دوخات حتي يستطيع الواحد منهم تشخيص المشكله و لو اقترحت عليهم الحل للمشكله يبين انه فاهم و الموضوع ده مش صحيح كما حدث في موضوع الفرامل
يا اخي انت ليه قلبت علي المواجع
هو الناس اللي بتشتكي منهم من شويه
حسبي الله ونعم الوكيل