أستاذ أبو عبد الله ... حرام بقى كفاية ... مش كل شوية تطلع لنا بموضوع "زى ما تقال" ... وأنك مش بتكره الكوري ... سيادتك انا قلتلك قبل كده أني فهمت غلط ... واعتذرتلك كمان عن الجزئيه دي ... يبقى خلاص ... نسيب بقى الموضوع ده على جنب ... ونركز فى الموضع الرئيسي ...وعلى فكره انا لم اقل ان محدش يشتري الكوري ولا اعترض حتى مش معنى اني قولت انه مش زي الياباني يبقى معناه اني بكره زي ما اتقال واني مش بقول لحد اشتريه
انا رضيت فقط على الجزئيه اللي تخصني من هذا الحديث ...علشان انا اللي قولت كده ...
- أدعوا أى حد من الأعضاء يحب يجرب عربيتى المتواضعة الألنترا 2007 هيا عاملة دلوقتي حوالي 6200 كم - وطبعاً سيادتك يا أستاذ أبو عبدالله على رأس قائمة المدعويين - أنا بمشي كثيير على الدائري ... ولسة راجع من شرم الشيخ ...الأسبوع اللي فات ... أحب أقول ليكم يا اخونا أن ما فيش عربية عرفت تصد معايا (وصدقوني لا فشر ولا نعر ده اللي حصل) ... ولا يباني ... ولا غيره ...ودى بقى امكانيات عربيتى وانا عارفها كويس ... وتاكدت والحمد لله من حسن أختيارى ... مع أنها أتوماتيك ... بس الحقيقة اكثر كفاءه - من وجهة نظرى المتواضعة - من اليباني اللى فى نفس الفئة السعرية ... ودى بقى من تجاربي مع الأصدقاء ... ودى برضة أول مرة أجيب فيها سيرة عربيتى ... فى الحديث ... علشان هو ده الوقت المناسب أنى أعمل كده ... واحب أقول لكل الناس أن الهيونداى أبتداء من الجيل السابق للالنترا 2004 ... وال Coupe 2004 ... ومع ظهور السوناتا الجديدة 2006 ... والألنترا الجديدة 2007 ... وال Azera 2007 ... والVeracruze 2007 ... والصاروخ القادم من هيونداى العربية ال i30 2008 ... الحقيقة الأجيال دى من العربيات هتنافس اليباني بقوة شديدة بل أستطيع التكابر وأقول انها هتنافس الأوربي فى عقر داره وخاصة بال i30 ... علشان عربية صغيرة الحجم وهاتش باك ...
كل ده بقى يضارع اليباني فى الجودة ... وممكن يتفوق عليه فى بعض الأحيان ... وزياده على كدة انه أرخص فى السعر
- وده حديث فى أمريكا عن ال Elantra 2007 ... مع Product Planning Manager بستشهد بيه علشان العربية دى محققه رقم مبيعات عالي أوى فى أمريكا ... http://www.youtube.com/watch?v=LXNs-TBAh44
أكثر حاجة عجبتنى فى الحديث ده أنهم واقفين قدام عربيتى بالظبط ... نفس اللون :):)
- اما عن موضوع أن العمر الخاص بالعربيات اليباني أفضل من العربيات الكوري ... فده برضه كلام لا يستطيع احد ان يحكمه ... لأنه ببساطه مرتبط بالأستخدام ... يعنى أثنين جايبين عربيات جديدة واحدة يباني ... وواحده كورى ... صاحب العربية اليباني ... بيقرص ويشد ... صاحب الكوري بيعاملها كويس ... تفتكروا مين فيهم تعمر أكثر ... والعكس صحيح ... يبقى فيه Parameter أخر يرتبط بيه العمر وهو طبيعة الأستخدام ...
-اما عن جودة الخامات اليباني عن الكوري ... فدى برضة أحب ائكد لحضراتكم انها مش موجودة اليومين دول ... علشان المنتج يتم تدويره بسرعة أنخفضت جودة الخامات فى كل الصناعات ...ودى سياسة عالمية لا ترفع علم دوله بعينها ... وبقى المهم بنبيع أد ايه مش بنبيع أيه ...
- ثم ما هو الدليل على ان الخامات اليباني المستخدمة فى صناعة السيارات أفضل من الخامات الكوري ... أستاذ Ahmed Anwer أقترح علشان نعرف الموضوع ده عايزيين حد يروح مصانع السيارات فى اليبان ... وفى كوريا ويشوف ويقارن ... والحقيقة انا تبرعت بالموضوع ده ... بس المهم الناس عندى فى الشركة توافق ...
- أحب أختم كلامي ... بأن ما جاء بعاليه كله رأى شخصي خاص بيا قد يعجب البعض ... وقد لا يعجب البعض الأخر ... بس الأختلاف فى الأراء ليس معناه انها حرب وعلى أحد ان ينتصر ... بل هيا نقاشات مفتوحه ... أنا أول واحد بستفيد منها ... وبتعلم ... علشان ما فيش حد بيبقى عارف كل حاجة ... و تعلمت كمان انه لا يوجد شء مطلق ...No Absolute وده هو المهم ان الأراء قابلة للتعديل والتغيير ... واللى كان كويس النهاردة بكرة ممكن يطلع وحش ... والعكس صحيح ... والحمد لله كلنا بنتعلم لسه فى مدرسة الحياة ... وصدقوني تاني أنا اولكم ... ولسة تلميذ صغير فى هذه المدرسة ...
تحياتى للجميع ... ويا رب ما حدش يزعل من كلامي ...
م / حسام منير
المفضلات