نحو قيادة أفضل

**ammahah_ahmed** · 14-09-2007 06:06 PM

السلام عليكم
أحب أعرف بنفسي في الأول , انا من الناس اللي بتتابع المنتدى ده من يوم ما اتعمب بس مش بشارك كتير .. اسمي أحمد خليفة
طبعا كلنا عارفين السواقة في شوارع مصر عاملة ازاي, هي اشبه بصراع و القوي هو اللي يكسب .. طيب احنا بصفتنا من الناس المهتمين بالسواقة اكيد كلنا نحب ان السواقة تكون احسن من كده و ان الواحد يقدر يمشي وهو مش مطمن .. طيب ليه منعملش مبادرة مننا هنا نسميها مثلا نحو قيادة أفضل و نبتدي ناخد خطوات ايجابية في الموضوع ده.. يا ريت اشوف رأي الناس في مبادرة زي ديه حيكون ازاي
شكرا

**abo3bdolrahman** · 14-09-2007 06:28 PM

+10000000000000000000000000000000

**اسلام المصرى** · 14-09-2007 11:50 PM

أولا أهلا وسهلا بك يا أستاذ أحمد :) أحييك على هذا الموضوع الجميل , بأختصار و حتى لا أطيل عليكم من وجهة نظرى الموضوع ده فى ايدينا احنا , بمعنى بسيط كل واحد يبتدى بنفسه أولا , القيادة فعلا فن ذوق و أخلاق وحط تحت أخلاق ميت شرطه , يعنى لو الأخلاق أتعدمت الموضوع كله باظ و النتيجة هى اللى أحنا شايفنها و بنعانى منها دلوقتى: فوضى قلة أدب محدش بيحترم حد - و القلة القليلة الملتزمة مابتبانش وسط الغابة ديه - و نقطة مهمة كمان أن المفروض الناس التى وضعت القوانين لكى يطبقها الناس هم أول ناس لا يلتزمون بها ولا يطبقونها - الا قلة قليلة جدا برده مابتبانش وسط الغابة :) - منها الوقوف على حسب مزاجه طمس اللوحات السير بدون لوحات تفييم الزجاج الخ....... أنا شايف الموضوع ده صعب جدا : نحو قيادة أفضل
ده كفاية سواقين الميكروباصات دولت أنا بحاول على قد ماقدر أكون ملتزم و أطبق نظرية القيادة فن وذوق و أخلاق و لازم يطلعلى واحد ابن حلال يناسينى نفسى!!! والسلام عليكم ورحمة الله وبركاته , كل عام و أنت بخير يا أستاذ أحمد رمضان كريم :D

**ammahah_ahmed** · 15-09-2007 04:18 AM

استاذ اسلام , اولا كل سنة و انت طيب و رمضان كريم
اللي عاوز اقوله ان احنا اكيد مش حنفدر نخلي شوارع مصر بين يوم و ليلة زي شوارع دبي مثلا لكن اكيد بالتدريج , حقول لحضرتك مثال : احنا نفسنا المصريين لما بنسافر برة بنسوق محترمين جدا و كويس, و لما نرجع نرجع نسوق بفوضى تاني.. ليه؟ مش عشان برة في عسكري في كل حتة, لا, عشان الناس اتعودت على النظام وانها تمشي صح فأي واحد بيطلع و يخالف النظام ده محدش بيسيبه و اقصد بمحدش ديه الناس اولا مش الشرطة.. اللي انا ببص له ان اول ناس ممكن تبتدي تطبق الفكرة ديه هيه ناس مثقفة و متعلمة زي هنا في المنتدى و انا لاحظت ان ما شاء الله عدد الناس هنا اظن يزيد عن 1500 واحد اكيد مش اقل من 70% منهم بيسوقوا, دي بداية كويسة اوي و اذا اخدنا الموضوع جد و مشينا فيه بنظام و اصرينا اننا نوصل لحاجة, على الأقل حنحس اننا عملنا اللي علينا.

**Abdallah** · 15-09-2007 04:45 AM

انا متضامن معاك يا سيد احمد فى الكلام الى بتقوله ولكن ما هو السبيل ؟؟؟
لو عندك افكار قولها لانى انا نفسى فى حاجة زى دى من زمان وحتى لو فشلنا يبقى كسبنا شرف المحاولة اهو حتى يبقى احسن من مفيش!!

**Heshaam** · 15-09-2007 06:34 AM

مبادرة جميلة فعلا، وحاولت أطبقها فعلا على نفسي أكتر من مرة بس للأسف ما كتش بقدر أكمل يا إما كت ببطل سواقة لفترات.

كت بحاول إني متخطاش السرعة القصوى - حتى وأنا حاسس جوايا إنها مش مظبوطة؛ ما بأسابقش؛ بحاول ما أكسرش على الناس وما أزاحمش (خصوصا مع سواقين الميكروباص)؛ وأحترم المشاة قدر الإمكان؛ مع الالتزام بالحارة المرورية.

بس برده ممكن نحاول مرة تانية وكل واحد ومقدرته وأهو يبقى جزء من صيامنا اللي هدف من أهدافه الرئيسية القدرة على ضبط النفس.

وشكرا ليك يا أستاذ أحمد.