تركيب الـ Gm أصبح مخالفة مرورية !!

**aif** · 14-04-2009 02:37 PM

المشاركة الأصلية كتبت بواسطة yasserwin

انت شكلك مخنوق من محمود تونا دة اوى

بس بجد فعلا زى ما الاستاذ عمر قال مش كل الناس بتجيب جى ام علشان تمشى تعمل زفه بالعربية

لاء فيه ناس كتير بتجيبو علشان تقدر تسمع صوت كويس جوا العربية

وبعدين لما الأمين او غيرو لما يفك مثلا ً جى ام من العربية بتاعت اى حد هل انت فاكر انه هايلم الجى أمات ويحطها فى ميدان عام ويحرقها ؟؟؟

انا كان عندي زجاج البلكونات والشبابيك خشب ..... محمود تونا ده خلاني غيرته كله الي الوميتال علشان الرجة بتاعت صوت البتاع ده .....
وبعدين يحرقوها او يبيعوها ....
هما اصلا مش من سلطتهم انهم يشيلوها ... هما بيعملو مخالفة .... وانت بقى ومزاجك ... عاوز تشيلها ... عاوز تخليها و تدفع كل شوية مخالفة او رشوة للأمين عشان يطنش ..... الغاوي ينقط بطاقيته
....
اللهم إكفنا شر ازعاج ال جي امات والديفيلات والكلاكسات العالية ....
والله العظيم انا لما باتخيل الجنة ونعيمها بأقول في نفسي ... الله ..... يعني مفيش فيها الازعاج بتاع الدنيا .... اللهم اجمعنا فيها
لا يسمعون فيها لغوا ولا تأثيما إلا قيلا سلاما سلاما

**YaSSerwIN** · 14-04-2009 04:31 PM

على فكرة يا أستاذ aif انت ممكن تروح تعمل محضر فى (( محمود تونا )) دة انه عامل ضوضاء عندكم وياخدو تعاهد عليه انه ميعملش الضوضاء دة تانى

**aif** · 14-04-2009 08:14 PM

المشاركة الأصلية كتبت بواسطة yasserwin

على فكرة يا أستاذ aif انت ممكن تروح تعمل محضر فى (( محمود تونا )) دة انه عامل ضوضاء عندكم وياخدو تعاهد عليه انه ميعملش الضوضاء دة تانى

انت اكيد ما تعرفش محمود تونا .... واكيد ماتعرفنيش
اولا هو طبعا مش اسمه محمود تونا ... انا بس باقول اسم كودي منعا للإحراج
انا الاول نزلت كلمته بعد صلاة الجمعة ..... طبعا كعادة الشعب المصري ... انكر تماما .... وقال اكيد حد تاني ... انا عمري ما اعمل كدة
وبعدين مرة تانية فتحت الشباك و قلتله لو سمحت وطي صوت الكاسي مش عارفين ننام .... طبعا اتكسف وقفل الكاسيت خالص
ومرات عديدة عملتله فضيحه من البلكونة و هزأته بكل ما تحمل الكلمة من معاني ... طالما الذوق مش نافع
ومرة عملت زي ما انت بتقول اتصلت بالنجدة وعملت بلاغ ..... وكأن شيئا لم يكن .... النجده عندها حاجات اهم بكتير من التفاهات دي
الادهى من ذلك ان سيادته بيجيله اصحابه بعربيات عجيبة .... تلاقي العربية 127 او 128 او ماروتي قديمة .... وفيها عدة صوت اغلى من ثمن العربية .... و يسيبو الزفت ده شغال ... وينزلو من العربية يقفو يتكلمو في الشارع .... ما هما لو ركبو العربية ح ينطرشو اكيد ... ف بيحبو يسمعو البتاع ده من بعيد .....
ومرة في مرة لقوني مش بازهق .... ومش عارف ايه اللي حصلهم يظهر انه اتنقل شغل خارج القاهرة ..... يا رب ما يرجع ويفضل في السلوم او سيدي براني علطول .... عشان يقرف القذافي بدل ما يقرفني انا
تصدق اني معرفش اسمة ايه الحقيقي .... انا مسميه محمود تونا وخلاص .... مالها التونا .... د حتى العلبة ب 6 جنية