موضوع مهم قوي وشاغلني عايز اخد رأي اعضاء المنتدى فيه

وهو هل كفاية ان الأفندي اللي سايق جنبك يكسر عليك بغشومية رهيبة ولما تبص له او تكلمه يقول لك العبارة المشهورة اللي بترفع ضغط دمي :

ايه فيه ايه .. ما انا مديك اشارة

يعني ببساطة انا مفهومي عن الاشارة دي .. ان اللي سايق في الحارة الوسطانية مثلا في الشارع وعايز يدخل شمال على الحارة السريعة فيدي اشارة ماشي انما - حسب مفهومي - ده مش كفاية ابدا ولا ده كل اللي لازم يعمله انما لازم يبص ويشوف هل اللي على شماله ده ظروفه تسمح يدخله ولا لأ

يعني بمعنى اوضح انا باعتبر ان الاشارة دي استئذان او طلب من اللي على شمالك انه يسمح لك تغير حارتك وتدخل قدامه وهو بأه حسب ظروفه يا يسمح يا ميسمحش

انما مفهوم الأخوة اصحاب الجملة المشهورة فهو انه طالما اداني اشارة فكده خلاص عمل اللي عليه وبالتالي يدخل في اي وقت ويكسر براحته والعربيات اللي في الحارة اللي داخل عليها تنحرق بجاز

الحقيقة الموضوع ده غايظني جدا وعايز اخد رأيكم فيه - هل انا مبالغ او غلطان في رأيي ؟ وهل الاشارة دي فعلا كده خلاص تخليه من حقه يدخل براحته ؟

منتظر ردودكم