الحرارة فى البولو 98

**alzelafy** · 21-04-2009 03:50 PM

اشتريت سيارة بولو 98 1000 سىسى ولاحظت انها بتبطل اثناء السفر و لما فتحت الكبوت لاقيت المياة بتغلى فى القربه رغم ان المروحه شغاله مباشر مع الكونتاكت و لما كلمت صاحب العربيه و سالتو قالى العربيه كانت راكنه عندى شوف اى ميكانيكى ياخد هواها ؟؟؟ ما معنى هذا الكلام مع ملاحظه ان الموتور خفيف شويه

**M.Mostafa80** · 21-04-2009 03:57 PM

خود هوا القربه وأكشف على لون الزيت لأن كدا العربيه بتنفخ ودا معناه لقدر الله وش سلندر لو الزيت لونو عامل زى لون الطحينه يبقى وش سلندر لو لأ يبقى خد هوا القربه وشوف ولو الماتور خفيف بردو شوف مستوى الزيت لأن لو نقص ممكن يعمل المشكله دى لأن فى الحاله دى الأعتماديه بتبقى على المياه فى التبريد وطبعا المياه ليها أخر وبتفور عند الغليان وربنا يسترها معاك وميطلعش وش السلندر

**original** · 21-04-2009 05:09 PM

طبعا محمد جابلك من الآخر بس العربية مش محتاجه يتاخدلها هوا لأن الموضوع ده بيتم لوحده من غير تدخل بس أهم حاجة تلتزم بالمقاس يعنى فى نص القربة وماتقفلش الغطاء لحد ما المنسوب يثبت وطبعا لو كان صاحبها بيستخدم مياه من الحنفية يبأا إحتمال الريداتير مسدود ومش بيبرد كويس !!!
المهم الحرارة مش بتزيد عن النص..

**alzelafy** · 21-04-2009 05:48 PM

انا فعلا لما بحط ايدى فى القربه بحس ان الميه فيها لزوجه وزى ما يكون عليها زيت بس مدققتش على اللون عشان اعرف دى طحينه و لا لا بس لو وش سلندر ازاى العربيه بتدور و بتمشى عادى ؟؟؟ انا كان معايا ميتسوبيشى عيون صفيه قبل كدة و ضربت جوان و مكنتش بتدور بعدها