الموضوع: حادثة طريق القطامية

الحادثة كانت فى اتجاة المعادى قبل كارفور ب 2 كيلو
انا عديت عليها بعد 15 دقيقة من الحادثة (فى حدود 5.30)بس كنت نازل مدينة نصر و المنظر صعب يتوصف
ناس كتيرة كانت بتحاول تكسر سقف العربية النقل (من شكلها كانت تقريبا عربية نقل طوب بس كانت فاضية) و بتحاول تطلع السائق و التباع و العربية متدمرة كليا
و النقل داخل فى ظهر اتوبيس كبير و الدهر ضايع خالص
دة غير كميات الملاكى المدهوسة حاجة صعبة فعلا
انا كل يوم بكرة الطريق دة اكتر من الاول بسبب النقل و الترلات اللى فية

ربنا يرحم كل متوفى و يشفى كل مصاب

الحادثة فعلا بشعة جدا
واللى منكم شاف الطريق من المعادى متجها الى القاهرة الجديدة
الطريق زمان ( من حوالى 5 أشهر ) بعد نزلة القطامية ( اول طريق القاهرة الجديدة ) كانت الجزيرة التى تتوسط الشارع كبيرة جدا تتسع لحوالى 3 حارات اضافية وطبعا لما حصل ضغط على طريق القاهرة الجديدة فكروا البشوات انهم يشيلوا الجزيرة ويبدلوها بسور خرسانى زي اللى في بيقيت الطريق الدائري طبعا كلنا عارفين الشركات المصرية محترفة جدا في انشاء واصلاح الطرق لكن محترفة في حاجة واحدة بس وهى السرقه
المهم بعد خمس شهور من الهبل سلموا الطريق والله مفاجأة

يارتهم كانوا سابوه 3 حارات بدل 5 شوف اللى حصل
- الحارتين الجداد ارتفاع الاسفلت فيهم أعلى بما لايقل عن 5 سم على أقل تقدير طبعا عشان الطريق جديد فده مقصود من مهندسين الطرق عان لما يطبع مع كاوتش عربيتنا الطريق يهبط وكلوا هيبقى تمام انت بس التزم بحارتك وأوعى تفكر تنزل منها ( واخد بالك تنزل منها )
- الخطوط الفاصلة ( العلامات البيضاء للحارات ) تتقابل في نقط ممكن نقول عليها بتتقابل في الجنينة وبيبوسوا بعض طبعا ( فعل فاضح في الطريق العام )

- وجود حصى بكميات لا بأس بها بين الفواصل مابين الحارات الجديدة والقديمة يكفى لأى شخص يريد السباحة على الطريق ( وطبعا اللى هيخالف القانون وياخد حصة كبيرة من الحصى والزلط ) الكميين اللى في اخر الطريق عادد الحصى كله وماحدش هيعدى منه )
بمناسبة الكمين من 3 أسابيع فاتوا زي كل يوم الشارع زحمة حتى بعد الوسعاية الجديدة والناس ماشية صفوف وأعمده على سرعة لاتتجاوز سالب 10 المهم الكمين ساحب رخصة عربية نقل ( كتر خيره ويارب دايما ) لكن الراجل بتاع العربية النقل ركنها عمودية على الشارع في مدخل البنزينة وفجأة النقل راجع بضهرة على الطريق والناس تزمر ( واحنا واقفين طبعا ) عشان كنا قبل اللجنة
ولا حياة لمن تنادى والعربية النقل بردوا مكملة والعربية اللى جمبي اتاكلت وبعدها داخل عليا والكل بيزمر والنقل الثقيل داخل بالعرض على العربيات شال الاكصدام والشبكه والفوانيس وطبق وش العربية والردياتير ودخل على العربية اللى جمبنا كانت اكسل باين وعمل فيها نفس القصة واللى وقف العربية النقل السور الخرسانى الفاصل مابين الرايح والجاى طبعا كلو جري على النقل وأنا أولهم طبعا عشان اهجم على السواق ( المفاجأة )
العربية من غير سواق أصلا الباشا كان في الكمين بيتحايل على الرائد يديلوا الرخصة وحصلت الحادثة والبشوات جم والدنيا ضاطت وقصة كبيرة

اشوفكم بعدين كتير عليكم كده وسلامى للجميع
-

4 قتلي و47 مصابا في حادث سير مروع على الطريق الدائري

4/27/2009 10:56:00 PM
القاهرة - محرر مصراوي - لقى 4 اشخاص مصرعهم وأصيب 47 آخرون في حادث سير مروع على الطريق الدائري جنوب شرق القاهرة ، إذ اصطدمت سيارة نقل بمقطورة و 16 سيارة أخرى (ملاكى وأجرة) أمام أبراج "سما" .

وأفاد بيان لوزارة الصحة بأن جثتي المتوفيين نقلا إلى مستشفى البنك الأهلي و 16 من المصابين نقلوا إلى نفس المستشفى ، فيما نقل 12 مصابا إلى مستشفى جراحات اليوم الواحد بالبساتين ومصاب واحد إلى مستشفى الكهرباء و5 مصابين نقلوا إلى مستشفى السلام العام ومصابان إلى مستشفى التأمين الصحي بمدينة نصر .

وقد تبين من المعاينة المبدئية للحادث أن سببه يرجع إلى وجود عطل فى مكابح السيارة النقل بالمقطورة والتى تحمل لوحات الاسكندرية قيادة أحمد السيد عبدالعال والتى كانت محملة بكمية كبيرة من حديد التسليح مما أدى إلى عدم تمكنه من السيطرة على السيارة وسقوط حمولتها وإصطدامه ب 13 سيارة ملاكى وسيارة أجرة ميكروباص و2 أتوبيس رحلات.

شاهد الفيديو
حادث مروعوتم نقل قائد سيارة النقل المتسببة فى الحادث إلى مستشفى الكهرباء بعد إصابته إصابات بالغة حيث لايمكن استجوابه حاليا نظرا لسوء حالته وتم تعيين حراسة عليه.

من جهتها، قامت الأجهزة الأمنية المعنية بإزالة أثار الحادث من على الطريق ورفع حمولة السيارة النقل وإعادة حركة المرور الى صورتها الطبيعية.

المصدر: وكالة أنباء الشرق الاوسط

http://www.masrawy.com/News/Cases/Ge...ccidentma.aspx