حادثة طريق القطامية

**evoo90** · 28-04-2009 01:28 PM

بجد حرااااااااااااااااااااااا اااااااااااااااااام

هو احنا حيوانات ولا ايه ماحدش من المسؤلين عارف يعمل حاجه
امال مسؤلين ازاى
فى قصه سمعتها عن واحد من الخلفاء تقريبا مش فاكر مين والله
كان قاعد وسط جماعه ومره واحده قام اتنفض من مكانه وجرى....
ولما رجع بيسألوه سبتنا وجريت مره واحده ليه قالهم انه سمع صوت شاه شارده وخاف ان ربنا يسأله عليها يوم القيامه. لا اله الا الله
شاه ياجماعه مش بنى ادم
شوفوا المسؤلين دول ربنا هيسألهم عن كااااااااااااام بنى ادم بيموتوا كل يوم
وماحدش يرد يقولى ان العيب فينا برده سرعه وتهور وكلام من ده
دول الخليج ناس متهوره اكتر مننا وبعض الدول الاجنبيه كمان بس الناس المسؤله هناك ناس بتفهم وبتعرف تجبرهم على تقليل السرعه وعدم التهور
مش بمطبات على الطريق تكسر العربيات ولا حبس للسير العكسى زى الجهله اللى زى حالتنا بجد السواقه والطرق فى مصر زباله زباله زباله لينا حق نبقى من دول العالم العاشر كمان ده لو دخلنا فى التصنيف
تعبت من الكلام تعب من اللى بشوفه حررررررررررام

ارحموا من فى الارض يرحمكم من فى السماء

**KIA_SEPHIA_2001_K** · 28-04-2009 01:34 PM

محنا الى بنعمل كدا فى نفسنا من غير منرمى اللوم على حد

شوفوا حوادث تانيه على نفس الطريق يعنى الخبر صحيح بصوا كام واحد راح فيها برضوا وده الخبر

http://www.youm7.com/News.asp?NewsID=93489&

**boody2** · 28-04-2009 01:44 PM

على بعد 100 متر فقط من حادث الطريق الدائرى المروع الذى وقع أمس الاثنين، اصطدمت سيارتا نقل، إحداها محملة بالحجارة ومواد البناء وأخرى محملة "بالليمون"، مما أدى الى اصطدام 15 سيارة ملاكى بهما.

نجحت الجهود الذاتية للعمال المتواجدين بمكان حادث تصادم السيارات النقل بانتشال 3 جثث من تحت السيارات، وعلى الفور تم نقلهم إلى مستشفى البنك الأهلى الكائن أمام حادث التصادم مباشرة، كما تبين أنه كان فى الحادث سيارات تزف عروسين، وكانوا من تعداد المصابين.

وبالقرب من الحادثين اللذين وقعا مساء أمس، حدث تصادم ثالث واصطدمت 4 سيارات ملاكى بعضهما البعض، ولم تسفر عن وقوع خسائر.

توجهت على الفور سيارات الإسعاف وأوناش رفع السيارات لمحاولة فتح الطريق الذى أغلق تماماً بعد التصادم الذى وقع بعرض الطريق. وأكد جابر عباس نصير، سائق أتوبيس الرحلات الذى اصطدام بالسيارة النقل المحملة بالليمون، أن الحادث كان نتيجة للسرعة الجنونية لسائق السيارة النقل، ولم يستطيع القائد إيقافها والسيطرة عليها، مما أدى إلى اصطدام المقطورة بالأتوبيس، ونتج عن ذلك اصطدام العديد من السيارات، والتى راح ضحية الحادث شيماء المتواجدة بالمقعد الخلفى.

كما أكد محمد محمود شاهد عيان بموقع قريب من الحادث، أنه أثناء عمله سمع أصوات فرامل سيارات واصطداماً، وأنه رأى السيارة النقل تصدم بكل ما يأتى فى طريقها، وتوقفت فور اصطدامها بالأتوبيس.

ومن ناحية أخرى، أفاد ضابط دورية القاهرة الجديدة، بأن السائق إيهاب محمد سائق نقل قليوبية، كان يسير بسرعة جنونية تزيد عن 140 كيلو متراً، على يسار الطريق، فقام بملاحقته ومحاولة إخباره بأن هناك حادثاً بأول الطريق، ومن الواجب عليه تهدئة سرعته، فقام بالاصطدام بالرصيف الخرسانى، مما أدى إلى انقلاب النقل على سيارة نقل وأخرى ملاكى، وأدى إلى انقلاب الليمون المحل بالنقل بالشارع، مما جعل باقى السيارات بالتصادم به، وتم القبض على 3 سائقين وآخر تباع.

ولقى ظهر 8 أشخاص مصرعهم، وأصيب 40 آخرون، فى حادث تصادم مروع أعلى الطريق الدائرى، نتيجة تصادم سيارة نقل الإسكندرية، محملة بالحديد، وأسفر عن تهشم جميع السيارات، وإصابة عدد كبير من الأشخاص تم حصر 40 منهم، ونقلهم إلى المستشفيات، ومن بينهم 10 أشخاص فى حالة خطرة، وجارٍ إحصاء أعداد المصابين، وتولت النيابة التحقيق لكشف ملابسات الواقعة، وبيان سبب حدوثها.

**amir** · 28-04-2009 02:24 PM

طبعا ربنا يرحم المصابين و المتوفيين و يرحمنا جميعا
لا حول ولا قوه الا بالله العلي العظيم
اكيد مش هتكلم و اقول كل اللي في قلبي لأني لو عملت كده هاخرق جميع قواعد المنتدي و كافه المنتديات
المهم
لو نبص للحادث و نفنده شويه هنلاقي ايه كما جاء في التوصيف الرسمي
هنلاقي بيقولو سائق المقطوره فوجيء بعدم وجود فرامل
و لو بنتابع اخبار الحوادث المروريه هنلاقي ان اسباب اي حادثه في مصر لا تخرج عن الاسباب الاتيه:
1-سائق فوجيء بعدم وجود فرامل
2-سائق اختلت عجله القياده من تحت يده
3-السرعه الجنونيه للسائق افقدته السيطره علي السياره

طيب ما تيجو ننسي شويه الكلام الانشائي العبيط ده و نبص للموضوع بتمعن شويه
1-سائق فوجيء بعدم وجود فرامل
مش المفروض الناس بتتابع تصيين عربياتها ولا الصيانه الدوريه للعربيه دي حاجه للناس الفافي مش للرجاله؟
2-سائق اختلت عجله القياده من تحت يده
قصدهم يقولو ان الكاوتش فرقع و الدركسيون كسر منه فخيش في حد, طب لو اي حد نزل و بص علي كاوتشات اي عربيه نقل او اوتوبيس شرق او غرب الدلتا او سوبرجيت او ميكروباصات او اوتوبيسات او حتي بعض العربيات الملاكي هيلاقي ايه
الكاوتش متاكل و حالته تصعب علي الكافر و المستهتر اللي سايق مش هاين عليه يصرف علي الكاوتش او يطلب شراء جديد لو كان نقل
ده غير الغباء الكوني في استخدام عيون القط المربعه كنوع من انواع المطبات و بعرض شوارع سريعه اساسا و نتيجه ده غير انها بتبوظ عفشه العربيه و كل مسمار متركب فيها انها بتتني سلوك الكاوتش التيوبلس و مره ورا التانيه الكاوتش بيضعف قوي و مش باين عليه حاجه و مره واحد الكاوتش يفرقع و السائق و المصاحبين ليه في العربيه يتقلبو او يدخلو في عربيه تانيه و بسبب ايه
ان الحكومه الملزمه بحمايه ارواح الشعب بتساهم في التخلص منه مره عن طناش و اخري عن جهل و اخيره عن تعمد
و بالمناسبه حد شاف طريق المطار الجديد ناحيه طريق السويس؟!
انا مكنتش مصدق اني في مصر من روعه الاسفلت و نعومته و تحديد حواري مروريه بعيون القط المربعه و عدم وجود ايه حفر او بلاعات ده غير المناظر الروعه اللي معموله
طب مادام قادرين نعمل كده ليه منعملش كده في شوارعنا العاديه ولا هي كل حاجه للسياح و احنا مواطنين من الدرجات السفلي في بلدنا!!
و الله العظيم فرحت برضو في طريق الاسكندريه القاهره من تركيب عيون القط المربعه ذات العواكس في بعض اجزاء الطريق , و انت سايق بالليل و في عز العتمه بتلاقي حارتك المروريه واضحه و العواكس منورالك مسافه محترمه امامك بحيث ان نورك الواطي كافي جدا جدا للقياده بطريقه امنه
ليه المسؤلين في بلدنا مش بيهتمو براحتنا و امننا و سلامتنا
3-السرعه الجنونيه للسائق افقدته السيطره علي السياره
طبعا انا اتكلمت في اكتر من موضوع علي نقطه السرعات الجنونيه للسائقين قبل كده و في ناس هاجمت اسلوبي الحاد وقتها, لكن فعلا موضوع السرعات الجنونيه ده لازم يبقي له رادع كتركيب كاميرات مراقبه الكترونيه بطول الطرق كافه و ربطها بشبكه مركزيه, و حاجه زي كده هتنفع في مراقبه الشوارع السريعه و الداخليه و ساعتها مش هنلاقي كلمه اصل مافيش رادار باليل او الفجر فاجري براحتي
و الحل ده كمان هيخدم وزاره الداخليه في الحد من جرائم الاختطاف و الاغتصاب و السرقات
و لو اتنفذ مع تشريع يضمن حقوق متضرري الحوادث ساعتها لو حد خبطك بعربيته هتستني انت و هو البوليس يوصل و طبعا المخطيء هيكون معروف من تسجيل الكاميرا و يلزم بتعويض المتضرر و مش هنحتاج ساعتها لوجود شوم و عصيان و الخناقات الهمجيه اللي بتحصل وقت تصادم العربيات بسبب ان كل واحد شايف ان حقه لن يأتي الا بالدراع و الصوت العالي و عمل محضر شرطه لن يفيد الا في حاله بله و شرب مياهه كنوع من انواع العلاج النفسي المصري

غير كده بقي نبص لحاله الطرق ذات نفسها و الكلام علي طرق المحروسه كافه
بلاعات عاليه عن الارض حفر مطبات همجيه عشوائيه سوء تخطيط للشوارع و عدم وجود حواري مروريه ملزمه للسائقين
اختراع الملفات السطحيه اللي بلونا بيه في مدينه نصر, تلاقي الناس كلها عامله ناصحه و تدخل علي الملف الشمال من اقصي اليمين و تلاقي الشارع كله واقف نتيجه لكده و سالك جدا بعد الملف
و غير سياسه بعض السائقين الناصحين قوي قوي باتباع نفس السياسه في طلوع كباري صلاح سالم و كافه الكباري الاخري
طب مادام اداره الطرق في مصر بتفكر طب ما يعملو انفاق في التقاء الشوارع الرئيسيه بحيث ان القادم من الاوتوستوراد مثلا و بيقطع شارع يوسف عباس ينزل نفق و يكمل طريقه و المشاه ساعتها بدل ما يعدو الشارع بين العربيات و بدل ما يتعملهم كوبري مشاه يبقي عالي عليهم يعدو الطريق سطحيا من فوق النفق
و مادام الكلام جه علي سيره كباري المشاه يبقي لازم نتكلم عنهم
تلاقي الكوبري من دول معمول من غير مراعاه لطبيعه المكان و التفكير فيه , فمثلا تلاقي منشأه معينه ذات طبيعه خاصه بتردد العديد من الناس عليها, و علشان الكلام يوصل للناس بسلاسه فأذكر مثال حديقه الازهر
بالنسبه للي رايح بالعربيه فلا مشكله من حيث الذهاب و المرواح انما اللي رايح بالمواصلات و هو رايح مفيش مشكله برضو انما بقي و هو راجع هيعوز يعدي الشارع الناحيه التانيه علشان يركب, انهو عقل طبيعي ميحطش حل للموضوع ده؟!
و النتيجه انا و انت و احنا سايقين في امان الله نلاقي مره واحده واحد او اكتر او للاسف عائله كامله بتعدي وسط العربيات و احنا ماشيين بسرعتنا
طبعا بنحاول نفاديهم قدر الاستطاعه و احنا بنلعن تفكيرهم الاحمق في عبور شارع زي ده بالطريقه دي
و هما بالمثل ممكن تسمعهم بيشتمو سائقي العربيات و بصوت عالي كمان بشتائم قذره علشان فاكرين نفسهم امتلكو الشارع بعربياتهم
طب ما الفئتين مش غلط و يمكن يكونو الاتنين صح كمان
الغلط جاي من عند مخطط الشارع المصري
لو كل واحد كتب مشاركه عن مكان لازم يتعمل فيه كوبري مشاه مش هنخلص
و فيه برضو كباري مشاه معموله ولا تستخدم و الناس بتعدي الشارع من تحتها و علي سبيل المثال برضو الكوبري اللي عند كليه طب عين شمس و كباري المشاه عند منشيه ناصر الناس هناك كسرو الحديد الفاصل و لازالو بيعدو الشارع بين العربيات برضو
طب ايه الحل
حل اي مشكله في الدنيا انك تدرس اسبابها و تحاول تحلها
الناس بتكسل تطلع الكباري دي علشان سلالمها متعبه و طبعا كبار السن في بلدنا بيعانو من السمنه المفرطه و ما يصاحبها من مشاكل في المفاصل ده غير المعاقين اللي مش هتكلم عليهم اصلا لأن حقوق الاسوياء في بلدنا غير موجوده فلاداعي لصب الماء في غربال مقطوع مسبقا
ليه ما يتمش دراسه عمل انفاق في اماكن التجمعات السكنيه بحيث ان المشاه يعبرو من فوقها و العربيات من تحتها و كفي الله المؤمنين شر القتال؟!
ليه الكباري دي متبقاش بسلالم كهربائيه
طبعا بلاش حد يتكلم عن انفاق المشاه لأنها بطبيعه الحال غير امنه ليلا ده غير انها غالبا ما تقفل ليلا حرصا علي الامن العام

طبعا الحادث هيتناقش بطرق عده في كافه البرامج الحواريه المشمشيه في الفضائيات و هنلاقي كافه المسؤلين بيتصلو و يتكلمو بالارقام و الاحصائيات كلام منمق و مخدر
و تاني يوم هنلاقي الدائري و الطرق السريعه ملغمه بالاف المطبات و اللجان و الكمائن و الالغام و تحديد سرعتها ب 40 كيلومتر في الساعه مثلا
كدليل اخر علي عدم وجود عقول واعيه في الاداره المصريه للازمات و الكوارث
و سلمولي علي قانون المرور النابع من رغبه ازليه مصريه في الجبايه
و برضو بفتح موضوع كلبشه العربيات و غباء الفكره من حيث تعطيل الراكن بطريقه صحيحه لو العربيه المتكلبشه قافله عليه و ده شيء بيتكرر يوميا و تعطيل المرور نفسه بابقاء العربيه المتكلبشه في مكانها صف تاني الي ان يأتي فرج الله و الونش يعدي
و هل الموضوع كان مستاهل صرف المال العام في شراء الكلابشات ولا مكنش يكفي التيكت اللي بيتلزق علي الزجاج بالمخالفه
و بدعو باقي الاعضاء للتفاعل و ابداء الاراء

**Dr_Ahmed_Abdelghany** · 28-04-2009 02:37 PM

صعبان عليا إخوانى اللى منتظرين الحلول من المسئولين
يارجالة المسئولين مش فى دماغهم الكلام دا خااااااااااااااااالص ولا الحكومة حاطة المواضيع دى فى الخطة..........

باختصار كده علشان نبطل نوجع دماغنا:
خطة الحكومة: البقاء لأطول فترة - إلهاء الشعب بالمواصلات والتعليم والسرقات ورغيف العيش وانفلونزا الكلاب و و و و حتى لا يجدوا فرصة للتجمع والتفكير فى التغيير + تنممية المليارات فى بنوك سويسرا
خطة الموظفين والمسئولين فى الحياة: إرضاء الحكومة بالعناوين البراقة والظهور الاعلامى دون وضع أى بذرة جيدة فى الواقع + ماتيسر من النقود...

مافيش حد هدفه لا حياة المواطن ولا كرامته ولا صحته ولا أى حاجة من ده
وأى كلام غير ده بلالين إعلامية فارغة

وللأسف هنرجع نقول الكلام ده وتعليقاتنا دى للأبد مع كل مصيبة ، وما أكثرها!

**egyptianmafia** · 28-04-2009 02:59 PM

this is egypt and nothing will be changed.....people's attitude needs to be changed.......

we need strict "legan" for 2amn we matana they need to check on the tires and the car signals.....

even if i sit here and write 1000000 suggestions...nothing will be changed

**amir** · 28-04-2009 03:16 PM

دي شويه اقتباسات من موضوع عن الطرق المصريه
https://www.nilemotors.net/Nile/72236-a.html

و الردود اللي انا مقتبسها بتعبر عن واقع اليم جدا جدا من بين فريق يهوي ترديد الاناشيد القوميه و الاحلام الورديه و فريق واقعي يفنط المشكله و يضع الحلول ولا يعترف بخطوط حمراء فيما يخص بتحسين حال البلد و فريق اخر بين الاثنين
و سبب اقتباسي ان الموضوع ده مشابه للمشكله الحاليه
و اسيبكم مع الاقتباسات
و لعل و عسي ييجي اليوم اللي حد يناقش العقول المتفتحه في منتدانا العزيز للوصول لحلول للشارع المصري

المشاركة الأصلية كتبت بواسطة thegoodhacker

انا نفسي اعيش و اسوق في البلد دي

انا علي فكرة كنت في الامارات و مش عاوز اقولكم علي النظام المروري هناك عامل ازاي !! زي الصورة الشوارع و الطرق ناعمة زي الحرير ومفيش حاجة اسمها غرز و لا تزنيق كل عربية في حارتها ...... و الاشارات هناك اليكترونية و فيه كاميرات مراقبة و لو حصل ان عربية كسرت الاشارة علطول تجري وراها عربية شرطة لعمل المخالفة....
يا جماعة بجد اللي بيقول ان شوارع مصر دي حالتها كويسة ومافيهاش مشاكل اكيد غلطان و غالبا السبب انه ما سافرش بره و بالتالي ما شافش الناس بره عايشة ازاي.....

المشاركة الأصلية كتبت بواسطة lancerevolution

قانون المرور الجديد إتعمل عشان يحاول يحل و لكن تجد الناس تتفنن ى اللف حوالين القانون و عايزين يدوروا إزاى يهربوا منه المواطن المصرى متقوليش غلبان لأنه هوا الى عامل كدا فى نفسه الدوله دعمت رغيف العيش را إشترى ب 10 جنية عيش و دى قدامى و أنا واقف فى الطابور عشان ترميه للفراخ و البهايم و أنا مش عارف أجيب 10 ترغفه ناكل بيهم فى البيت
المواطن المصرى الى الحكومة غيرت عربيات القطار و ركبت لها إزاز كسره قال إيه عشان يركب الأول و روح إتفرج على القطر فى محطة بنها المتجه لمنوف
المواطن المصرى الى ماشى بمبدأ يا بركة دعا الوالدين ز مبدأ ربنا يسترها من غير ما يأخذ بالأسباب المواطن المصرى الى بياخد فلوس فى مقابل إنه ينجح ناس فى المواد و يخرج لنا مهندس سمكرى و طبيب حلاق "مع الإعتذار للحلاقين"
المواطن المصرى الى لما بيبقى واقف يراقف فى الثانوية العامة يقولك لما أغشش الطلبة عشان ربنا يكرم إبنى الى فى الثانوية العامة و يحنن قلب المراقب و يخليه يغش
المواطن المصرى الى فاكر إنه دايما صح
المواطن المصرى الى مكره أخوه المواطن فى البلد
المواطن المصرى الى لما يمسك منصب يتنطط على الخلق و يرفع شعار يا أرض إتهدى ما عليكى قدى
و ظالمين الحكومة و يقولك ما بتعملش ما عملت يا سيدى بس سبقك مواطن مصرى و كسر كل حاجة و كتب إسمه على الحيطة و شتم فى الحكومة و قالت دى ما عملتش حرام عليكوا الحكومة إتبهدلت

المشاركة الأصلية كتبت بواسطة Dr_Ahmed_Abdelghany

مؤيد حضرتك فى كل كلمة قلتها
ماعدا العبارة الخاصة بالحكومة (والعبارة الخاصة بالحلاقين هههههههههههه)
الحكومة اللى غيبت القدوة فى المجتمع
وحذفت من قاموسنا كلمة العدل والمساواة
الحكومة أكتر واحد ماشى سبهللة وعشوائية
سؤال: ياترى الحكومة تتصلح الأول وللا الشعب يتصلح الأول علشان مصر تتحسن؟
الإجابة: اللى يتصلح الأول هيصلح التانى غصب عنه

المشاركة الأصلية كتبت بواسطة Tyler_Durden

فعلا ده حال البلد المتخلفة الي إسمها مصر و ياريت الي مخرجش بره البلد يحاول يفتح عينه و يدور و يشوف البلدان الي حوالينا بقت عاملة إزاي

حاجة بره الموضوع أنا حاسس إن هومر سيمبسون لو جه مصر هايتبسط قوي و هايتأقلم تمام مع المصريين و ممكن يوصل و يتقلد أعلى المناصب في البلد

المشاركة الأصلية كتبت بواسطة nasroo

والله انا قعدت في السعودية سنه واحدة كنت بشتغل هناك عاوز اقولك انها رغم اللي بيقولوا عليها لكن في المرور قمة في الصرامة و لو مقطورة مشيت شمال تتجاب في ساعتها وتتوقف ومافيش حاجة اسمها تخش على الحارة اللي جنبك كده على طول ده انا مرة كنت راكب مع واحد صاحبي يمني على الدائري(بتاع السعودية) بقولو احنا عندنا ممكن تلاقي ناس بتعدي من طريق زي ده قدامك الراجل قعد يضحك وفاكرني بهزر وخلللي بالك ده يمني - واللي طفشني من السعودية واحد مصري برضه - المدير بتاعي هناك

طبعاً هو سيمسون عاشق للغباء هيلاقي فين مكان احلى من مصر يمارس فيها غباؤه وكسله

المشاركة الأصلية كتبت بواسطة Dr_Ahmed_Abdelghany

مع احترامى لاحساسك وضيقك بواقعنا لكن إعذرنى إنى مش موافق على الأسلوب ده ، فيه فرق بسيط بين نقد الذات وتشويه الذات وسلخ الذات

إحنا انتقلنا من النقد العادى إلى النقد اللاذع إلى رش ماء النار على وجه مصر، بالراحة شوية على مصر والمصريين ، وفى الآخر نزعل لو أى أجنبى أو خليجى شتم المصريين ، ماهم بيكرروا كلام زى اللى بعضنا بيقوله ده.... مش كده وللا إيه؟

المشاركة الأصلية كتبت بواسطة kh_talaat

+1000000

صح كدة ... يا إما تبقى إنسان إيجابي وتناقش الموضوع بشكل حضاري وتحلل اسباب المشكلة وتقول إقتراحاتك يا إما ملوش لازمه الكلام البذيئ دة

يعني من الآخر فالتقل خيرا أو لتصمت