حادثة طريق القطامية

**H.ibrahim** · 28-04-2009 10:59 AM

امس حتى الساعة الواحدة ليلا لم يتم رفع السيارات و الطريق كان متوقف تماما من الساعة 8 مساء - اعتقد ان الوفيات ستفوق هذا الرقم بكثير حيث اننى شاهدت بنفسى سيارات عديدة مسطحة تماما على الاسفلت حقيقى حتى الان وانا ذاهب الى العمل لم استطيع قيادة السيارة من المنظر اللى شوفته امبارح كان الله فى عون الجميع :k30:- وربنا يستر عليك يانادر ارجو ان احنا نطمئن عليك فى اسرع وقت ممكن . اسف على الاطالة .

**abzoabzo** · 28-04-2009 11:20 AM

ماهى الشرطة مش فاضية اللى للنهب وبس حتى مش عايزين يحللوا القرش اللى بيخدوه
حسبى الله ونعم الوكيل فى البلد ده
ربنا يكرمنا ونخرج منه

**Engesso** · 28-04-2009 11:23 AM

انا امبارح كنت مروح من كارفور لبيتي في مدينة نصر، عادة السكة بتاخد من 20-30 دقيقة، لأني مش باحب امشي بسرعة بالذات على الطريق الدائري، أحد انجازات الحكومة المصرية، وفوجئت بالحادثة اللي كانت على الجهة الأخرى، ووقفنا حوالي ساعة ونصف، على الرغم ان الحادثة كانت على الجهة الاخرى، و أول ما عدينا لقينا حادثة تانية، هذه المرة على الجهة اللي احنا فيها، كانت حادثة غريبة جدا، عربيتين نقل كبار بمقطورة، وكل واحدة شايلة كونتينر كبير، الكونتينرات شبكت في بعضها، آه والله شبكت في بعضها بطريقة غريبة جدا، ووقفنا بتاع نصف ساعة كمان.
انا بقى حابب اعلق على حاجة تانية، وهي سلوكياتنا في حالة الحوادث، يعني بعد الحادثة الاولى (الكبيرة)، عربية اسعاف شايلة مصابين ورايحة بيهم على مستشفى في مدينة نصر، فالاسعاف جاي من ورايا على اليمين وواقف معايا عايز يعدي بس واقف بسبب حادثة الكونتينرات، و اول ما السكة فتحت بس تعدي عربية واحدة، انا كنت ممكن اعدي بسهولة، ولكن ما عديتش، وسبت اللي على يميني يعدي علشان الاسعاف تعدي وراه، لقيت ايه بقى؟ سرب من العربيات لازقة في الاسعاف ومفيش اي فرصة اني اعدي، واللي ورايا عمال يزمر بطريقة مستفزة، وتبص للي بيعدوا (اللي هما لازقين ورا الاسعاف)، آخر تناحة.
النهار دة الصبح بقى انا جاي شغلي على نفس الطريق ولكن متجه لكارفور (اتجاه الحادثة الكبيرة بتاعة امبارح) الاقي الناس كلها واقفة بتتفرج على آثار الحادثة ومعطلين الطريق!!
ووصلت شغلي متأخر بتاع ساعة، علشان الناس بتتفرج!!
بيتفرجوا على ايه؟؟ ولحد امتى هنفضل كدة عندنا لا مبالاة بأي شيء، بالبلدي يعني عندنا حالة تناحة؟ والله العظيم انا تعبت من البلد دي...

**tamohsen** · 28-04-2009 11:39 AM

لا حول ولا قوة إلا بالله وإنا لله وإنا إليه راجعون

إمبارح كنت مروح من التجمع الخامس للمعادي حوالي الساعه 8
فضلت محبوس علي الدائري ساعتين بالرغم من ان الحادثه كان فات عليها أكتر من 3 ساعات
لغايه ما عرفت اهرب وطلعت علي تفريعه المقطم
وصلت الساعه 11

**Nader** · 28-04-2009 11:51 AM

الدائري لسة واقف من مدينة نصر للمعادي انا لسة واصل الشغل من شوية جاي من مدينة نصر وسمعت أن في حادث اخر بس معنديش تفاصيل لسة

مجزرة بعنى الكلمة كمية مهولة من العربيات مش باين لها اي معالم خالص ومتكرمشة زي ورق "الكلينكس"،، ربنا يستر علينا ويكفينا شر الطريق ويرحم المتوفيين ويصبر اهلهم.

**nasroo** · 28-04-2009 12:17 PM

انا ربنا نجاني من الحادثة دي امبارح لله الحمد والشكر انا على الطريق ده يوياً من حلوان للتجمع الخامس والساعة 5:30 بالظبط كنت عند ابراج سما وكانت الحادثة حاصلة بالفعل ادامي على طول بس الغريب ان الطريق كان واقف من قبل الحادثة كمان من بعد النفق بتاع التجمع الخامس اقسم بالله اني قاعدت احمد ربنا اللي نجاني من الحادثة دي لاني كنت على وشك اني ابقى مع الناس دي انا شوفت المقطورة مقلوبة على ظهرها واتوبيس موظفين ربعة طاير مش عارف وشه ولا ظهره وميني باص وكام عربية ملاكي كنت هعيط وانا شايفم والله مانا عارف ايه نوعهم من كتر البهدلة اللي هما فيها
واحد صاحبي شغال في برج سما بيحكيلي ان المقطورة اللي شايله حديد دخلت في الاتوبيس وبعدين دخلت فيهم نص نقل شايلة رز فكل عربية تيجي تفرمل تتزحلق على الرز وتلبس فيهم انا كنت بمشي على الطريق ده على 100-120 بس من يومين شوفت حادثة (ده الطبيعي بتاع كل يوم) بس الحادثة دي اثرت فيا جامد كانت عربية الاسعاف واقفة وبيشيلوا بنت صغيرة من عربية ملاكي وبيحطوها في الاسعاف كانت رجليها مكسورة من ساعتها اخري 90 كم - ده غير الناس اللي بتداس كل يوم عالطريق من عند كارفور

المشاركة الأصلية كتبت بواسطة rammoo

الحادثة فعلا بشعة جدا
واللى منكم شاف الطريق من المعادى متجها الى القاهرة الجديدة
الطريق زمان ( من حوالى 5 أشهر ) بعد نزلة القطامية ( اول طريق القاهرة الجديدة ) كانت الجزيرة التى تتوسط الشارع كبيرة جدا تتسع لحوالى 3 حارات اضافية وطبعا لما حصل ضغط على طريق القاهرة الجديدة فكروا البشوات انهم يشيلوا الجزيرة ويبدلوها بسور خرسانى زي اللى في بيقيت الطريق الدائري طبعا كلنا عارفين الشركات المصرية محترفة جدا في انشاء واصلاح الطرق لكن محترفة في حاجة واحدة بس وهى السرقه
المهم بعد خمس شهور من الهبل سلموا الطريق والله مفاجأة

يارتهم كانوا سابوه 3 حارات بدل 5 شوف اللى حصل
- الحارتين الجداد ارتفاع الاسفلت فيهم أعلى بما لايقل عن 5 سم على أقل تقدير طبعا عشان الطريق جديد فده مقصود من مهندسين الطرق عان لما يطبع مع كاوتش عربيتنا الطريق يهبط وكلوا هيبقى تمام انت بس التزم بحارتك وأوعى تفكر تنزل منها ( واخد بالك تنزل منها )
- الخطوط الفاصلة ( العلامات البيضاء للحارات ) تتقابل في نقط ممكن نقول عليها بتتقابل في الجنينة وبيبوسوا بعض طبعا ( فعل فاضح في الطريق العام )

- وجود حصى بكميات لا بأس بها بين الفواصل مابين الحارات الجديدة والقديمة يكفى لأى شخص يريد السباحة على الطريق ( وطبعا اللى هيخالف القانون وياخد حصة كبيرة من الحصى والزلط ) الكميين اللى في اخر الطريق عادد الحصى كله وماحدش هيعدى منه )
-

انت كتبت اللي كنت عاوز اقوله بالذات الحارة العالية والواطية دي والحصى اللي عالشمال وكمان الحارات اللي بتتقاطع مع بعض
اما عن الحواجز الخرسانية امبارح قبل الحادثة على طول لقيت حاجز متحرك من مكانه شويه وانا ماشي عالشمال الاقيلك واحد طالع ببوزه من الناحية العكسي وعاوز يلف من الحاجز الاسمنتي ده - تخيل وانت ماشي عالشمال بسرعة كده وتلاقي ده في وشك ووراك مقطورة جايه سريعة عالشمال هي كمان وترعبك بصوتها الرهيب هتعمل ايه - انا طلعت ايدي من الشباك للمقطورة عشان يهدي رغم اني شغلت الانتظار والفرامل - بس نقول ايه في البلد دي لاشعب نافع ولا حكومة
بص للتوقيع

**mhkash** · 28-04-2009 12:20 PM

المشاركة الأصلية كتبت بواسطة Nader

الدائري لسة واقف من مدينة نصر للمعادي انا لسة واصل الشغل من شوية جاي من مدينة نصر وسمعت أن في حادث اخر بس معنديش تفاصيل لسة

مجزرة بعنى الكلمة كمية مهولة من العربيات مش باين لها اي معالم خالص ومتكرمشة زي ورق "الكلينكس"،، ربنا يستر علينا ويكفينا شر الطريق ويرحم المتوفيين ويصبر اهلهم.

ياريت يا حضرات لو حد عنده اخبار عن الحادث التاني ده يقول - انا كنت فى التجمع الخامس من ساعه و كانت الناس هناك بتحذر و بتقول محدش يروح ناحية كارفور عشان فيه حادثه تانيه - واتمني انه ميكونش فيه حادث ولا حاجهوربنا يستر

**nasroo** · 28-04-2009 12:32 PM

انهاردة الصبح الساعة 9:30 حصلت حادثة في الاتجاه من كارفور للتجمع الخامس عربية كل العربيات واقفة تتفرج على الحادثة بتاعت امبارح وراحت جاية عربية مسرعة خابطة في جنب عربية اكسنت من الجنب بس الحمد لله ماحدش حاصل له حاجة
بس ايه السر في ان الناس بتقف تتفرج على الحادثة ويوقفوا المرور وراهم بدون داعي