الحمد لله استلمت سيريون Glx 1.5!!!

**_hany_** · 12-05-2009 08:38 AM

مختار باشااااا، يا عم منا ياما قلتلك تدخل على الموقع تبص عليه و انت مطنش. :)
الله يبارك فيك يا جميل، ان شاء الله اعدي عليك قريبا..

**_hany_** · 12-05-2009 02:08 PM

أخيرا تم ترخيص العربيه الحمد لله، مندوب كونتاكت جه و خلص الليله بكل سلاسه و يسر و انا ماشي وراه أدفعله الفلوس و خلاص، بصراحه راحه ما بعدها راحه و لا طوابير و لا وجع دماغ، و لا عزاء للناس اللي عايزه تمشي حالها صح.
الموضوع اتكلف كالآتي:

285 جنيه رسوم و ضرايب..الخ
155 جنيه سعر الورق و الاكراميات
85 جنيه تأمين اجباري
50 جنيه عشان أخد نمر كمبيوتر مش نمر مكتوبه
10 جنيه تركيب نمر

المجموع 585
الرخصه سنه و عليها حظر بيع لصالح كونتاكت.

أنا دلوقتي هاخد العربيه و ارجع بيها القاهره، أخيرا هسوقها براحتي. ان شاء الله بعد فتره ممكن أحط صور و تقييم مبدئي.

و كل عام و انتم بخير... :)

**aliabutaleb** · 12-05-2009 02:40 PM

ألف مبروك الترخيص يا أستاذ هاني :)

**_hany_** · 13-05-2009 04:02 AM

الله يبارك فيك أستاذ أبو حمزه.

**ahmadelsaeed** · 16-06-2009 02:14 PM

طب أنا عايز أسأل على شوية حاجات يا بشمهندس هانى... إنت جربت العربية على السرعات العالية - يعنى فوق 120 مثلا - ؟ و ساعتها ال abs بيبقى عامل معاك إيه ؟

و أخبارها إيه معاك فى إستهلاك البنزين ؟

و يا ريت تدينا فكرة عن عزلها لما بتقفل الشبابيك.

و أسف للإطالة

**_hany_** · 18-06-2009 03:13 PM

العربيه انا راضي عن أداءها جدااااا،
انا أقصى سرعه جبتها بيها 140 و هي تجيب أكتر بس انا مش بحب الجري، بس العربيه ثابته جدا حتى في المنحنيات.
بالنسبه لل abs، فهو اكتر من ممتاز و مهم جدا و انقذني اكتر من مره و عمري ما هفكر في المستقبل اجيب عربيه مفيهاش ABS.
بالنسبه للبنزين فمحسبتوش أوي الصراحه، بس انا مشواري من أكتوبر لأول الهرم كل يوم، و بفول مره كل 5 أيام، فده مرضي بالنسبالي جدا.
العزل حلو جدا، هو مش soundproof، يعني بتبقى سامع شويه الشارع بره، بس من غير ازعاج نهائي.