الموضوع: يتحب مصر

انا رأيي مصر أصلاَ حالياَ ميفرقش معاها تحبها ولا تكرها .
إحنا ضيوف في البلد يا جماعة .

بتحبها .. أهلاَ و سهلاَ .. و الكبار هيعملوا اللي هما عايزينه .
بتكرها .. و ماله .. عض في الأرض .. برضه هيعملوا اللي هم عايزينه !

هما عايشين في "بلدهم" و سايبنلنا الحب و الكره .

العيشة فى مصر زى اكل الشارع، طعمه مفيش احلى منه بس كتره يوجع البطن

بس مع كدة بحبها وبموت فيها ، محنا كلنا عارفين بلاوى اكل الشارع ومع كدة بنسيب اكل البيت الصحى وناكل اكل الشارع اللذيذ

بص انت لما تكون بره مصر وانت راجع فى الطياره و لما يجى عجل الطياره يلمس الارض تحس ان رجلك هى اللى بتلمس الارض
تفتكر ده ايه
ولما تاحد شنطك وتخرج من باب المطار وتحس ان نفسك تسجد لله شكر انك رجعت وتبوس التراب اللى على السراميك
تفتكر ده ايه
العب مش فى البلد العب فينا احنا

فى سؤال لازم نساله لنفسنا قبل ما نجاوب على سؤال الموضوع دا
انت لو بتكره مصر اسال نفسك بتكره البلد ولا بتكره السيستم اللى فى البلد
فكر فى اى حاجه بتكره بسببها مصر هتلاقى ان السبب فيها اشخاص مش البلد
مخنوق من التلعيم من الزحمه من الاسعار من ظروف اقتصاديه من قلة عدل من عدم مساواه ... دى كلها مشاكل السبب فيها مش البلد السبب فيها أشخاص هما اللى مش عارفين يخططوا عشان يلاقوا حل يطوروا التعليم يظبطوا الاسعار والحاله الاقتصاديه

لكن البلد ارض ونيل وصحرا وناس طيبه فى قلب القرى جوه هى دى مصر اللى لازم تحبها
عمر مصر ما كانت شويه اشخاص دماغهم اتحجرت من سنين فجابوها لورا

اسال نفسك الكام سؤال دول وقلى
المفروض انى اكرهها ولا احاول ارجعها مصر اللى المفروض احبها
واياك تقلى هو انا هغير الكون
لا ابدأ بنفسك الدنيا هتتغير فى يوم من الايام

كلام ممكن كتير يقولوا عليه كلام فلسفه ونظرى بس دا اللى انا حاسس بيه وشايف انه واقعى جدا

بمووووووووووت فى مصر معارفش لية بس بحب اتمشى على الكورنيش من اسكندرية للقاهرة لسوهاج (بلدى بس مارحتهاش من زمان ونفسى اروحها قريب ) وبحب اسهر فى البلكونة اتفرج على زحمة الشوارع بجد احساس جمييل

جيه الوقت اللي ارجع واسألك تاني ...

بتحب مصر..؟

انا بتكلم على البلد من الحكومة