المشكلة دي حصلت معايا في العجلة الخلفية شمال، العيب كان من بلية العجلة، غيرتها و المشكلة ماحصلتش تاني.
هتروح لعفشجي أو ميكانيكي بيشتغل في العفشة و يفك العجلة دي و يفك التيل و الطنبورة و يطلع الأكس من الكورونة، تروح بالأكس عند محل قطع الغيار و تشتري بلية زي إللي راكبة على الأكس بالضبط (أنا اشتريت البلية الياباني بـ33 جنيه و كان في صيني بـ12 جنيه)، تروح بيهم عند خراط و تخليه يطفش البلية القديمة و يركب البلية الجديدة و خد البلية القديمة معاك ماترميهاش (الخراط هياخد من 5 إلى 7 جنيه)، تروح بالأكس و راكب عليه البلية الجديدة عند العفشجي تخليه يركبهم (العفشجي هياخد 20 جنيه بالكتير).
كده التكلفة الإجمالية: 33 بلية + 7 عند الخراط + 20 مصنعية العفشجي = 60 جنيه
ملاحظات:
1- احتفظ بالبلية القديمة عشان لو حصل حاجة تاني تاخد البلية و تجيب زيها من غير ما تشيل الأكس لأنه تقييييييييييييل أوييييييييييي و هيقطم إيدك على ما تلاقي حد عنده البلية المطلوبة.
2- خد معاك حتة قماشة قديمة تمسك بيها الأكس لأنه هيبهدلك و يبهدل هدومك لو ماسكه بإيدك كده من غير قماشة.
3- لو المشكلة اتكررت يبقى المشكلة من الفرامل، بس ده احتمال ضعيف.
4- ابقى طمنا عملت إيه ، و إن شاء الله المشكلة دي مش هتكرر تاني.
المفضلات