مالكى سكودا فابيا

**Meshfaker** · 19-05-2009 06:18 PM

السلام عليكم

انا دورت كتير فى المنتدى هنا ومفيش مواضيع كتيره بتتكلم عن الفابيا وخصوصا الموديلات القديمة نسبيا اى من اول سنه 2000

فياريت لو نجمع معلومات من مالكى الفابيا
كل واحد معاه العربيه دى يدخل يكتب المواصفات والمشاكل والحلول وانطباعه عنها

شكرا

**mostafa55** · 23-05-2009 04:16 AM

السلام عليكم

فعلا انا كمان لاحظت الحكاية دى المواضيع اللى بتتكلم عن الفابيا القديمة ( من سنة 2000 ) قليلة جدا فى المنتدى
انا بدور بقالى فترة خصوصا انى ناوى ابيع الفليشيا و اجيب فابيا

اللى اعرفة ان فى منها 1000 و 1200 و 1400 CC
بس مش عارف العيوب و المشاكل خاصة ان معظمهم ( او كلهم ) injection و مليانين sensors

ياريت فعلا مالكى الفابيا يقولولنا على العيوب و المميزات

شكرا

**HASBALAH** · 23-05-2009 09:37 PM

انا بضم صوتي لصوتك
وانا من مالكي الفابيا 1.4 س س mpi موديل 2002 hp
ودي الحاجات الي انا عارفها
انا هبدا بالي عاجبني في الفابيا
اولا : مجموعة فولكس
2- الحمايه بين الماتور والعربه من الداخل جميله جدا وكذلك الحمايه للعربه من الاسفل محميه تماما من اي خبطات من المطبات معرفش ممكن تكون عربيتي انا ولاكلهم كده بامانه لاني جايب العربه عن طريق الجمارك ( العربه مصفحه من اسفل )
3- بصراحه اكتر حاجه عجباني في العربه الكمبيوتر بتاع الرحلات جميل جدا يعرفك اي حاجه بتعملها العربه
4- التقفيل للعربه اكثر من رائع يكفي ان الواحد مايفتحش اي حاجه الا لما يلاقي علامة اسكودا وvw
5- شكل العربه من الامام جميل
6- تسارع العربه من الثبات جميل جدا وانا جربته مع الكورولا 2008
وسبقت
7- استهلاك البنزين كويس جدا ان وصل معايا لي 5.9 لتر/ 100كم
8- الثبات جميل جدا
9- العفشه العربه فيها 2 قضيب حديد بطول العربه من تحت لحماتيتها
بس المشكله الي قابلتني من ساعة مجبت العربه كان صوت مع المطبات في العجله الاماميه وده اتصلح ببساطه وده كان علشان الربط بتاع العجل متقفل للطرق السهله وليست المصريه بالطبع
ودلوقتي بقت زي الفل الحمد لله
10- التابلوه بالنسبة لي هادي وجميل ( المختصر المفيد )
11- الكمبيوتر فيه درجة الحراره من الخارج
12- الحاجه الي نفسي كانت تبقي في العربه ان الارتفاع بتاعها يبقي اعلي شويه زي 307
اما الي مش عاجبني 1- زي منت قلت شكل العربة من الاجناب والخلف مش اد كده
2- الماتور خشن بس انا حبه جدا عن الناعم لانه بيحسسني بسرعة العربه الحقيقيه

**mostafa55** · 25-05-2009 12:19 AM

شكرا على سرعة الرد
انت كدا شوقتنى انى اجيبها و بسرعة
بس الغريب ان محدش فى المنتدى كلة جاب سيرة اسعار قطع الغيار او حد اتكلم على مشاكل شايعة فى العربية ( زى السخونة فى الفليشيا مثلا )
معقول العربية دى خالية من العيوب اوى كدا !!!

**mohamed211** · 25-05-2009 02:56 AM

مساء الخير يا جماعة
فكرة كويسة جدا. أنا برضو ملاحظ إن العربية دي مافيش مواضيع كتير عليها في المنتدي. جايز يكون عدد ملاكها قليلين ..
أنا بقيت واحد منهم (فابيا 2001 1000 cc) من إسبوع بس
يا ريت نعرف بعض نتبادل الخبرات والمعلومات عن العربية دي مع بعض.
أنا للأسف دي أول عربية أجيبها فمش حاعرف أقارنها.
أنا ماعنديش خبرة بالعربيات بس اللى محتاج يسألني علي حاجة فيها مايترددش.

**Meshfaker** · 25-05-2009 03:03 AM

شكرا يا HASBALAH على المشاركة
وشكلها فعلا عربيه جامده من حيث الامكانيات والقوة

بس هى عربيتك مانيوال والا اوتوماتيك ؟؟
وايه اخبار التكييف ؟؟

mostafa55 شكرا على الاهتمام والمشاركة

يا محمد با شا ( mohamed211 ) قولنا انت عن كل اللى انت شايفه فى العربيه من اول الموديل وسعرها عمل معاك كام لحد انت حاسس بايه فيها كويس وايه وحش

وفين باقى الاعضااااااااااااااااء

**HASBALAH** · 25-05-2009 05:25 PM

شكرا يا HASBALAH على المشاركة
وشكلها فعلا عربيه جامده من حيث الامكانيات والقوة

بس هى عربيتك مانيوال والا اوتوماتيك ؟؟
وايه اخبار التكييف ؟؟

العربه مانيوال والتكيف جيد جدا
والعربه بها 2 ثلاجه بالتابلوه 1 امام السائق واسفل لزجاجه مياه 2 امام المسافر للاغراض العامه

**faragalla** · 25-05-2009 05:45 PM

انا معايا فابيا 2002 مانيوال موتور 1000 cc الحمد لله هيا معايا بقالها 3 سنوات و انا فارمها شغل و مبتقولش اى
عربيه ثابته جدا على الطريق انا بمشى بيها على سرعه 160 كم و مبحسش بأى مشاكل خالص العفشه اللى فيها بتاعة الفبريقه مغيرتش غير جلبة المقص الامامى فقط و كمان العربيه دى موتورها على كاتينه يعنى مفيهاش سير تقسيمه و ده اكتر حاجه عجبانى فيها
اما بالنسبه لقطع الغيار فهيا اغلى من الفليشيا طبعا و الشىء اللى مزعلنى فيها فلتر البنزين لانه ب 140 جنيه و مفيش اى نوع محلى منه لانه 3 فتحات مش فتحتين و كمان فلتر الهواء ب 110 لانه نفس الموضوع مفيش منه محلى اما خلاف ذلك فالاسعار عاديه
وبالنسبه للسنسورز اللى فيها ملهاش اى مشاكل نهائى نهائى و كمان العربيه فيها ميزه عجبانى جدا ان مياه الرادياتير لو نقصت بتديلك صفاره و اللمبه تنور فالعربيه عمرها مبتسخن و كمان لو مشيت وفرامل اليد مرفوعه بتديلك صفاره علشان متمشيش عليها و تبوظ التيل
ولو افتكرت حاجه تانيه هبقا اكتبها و شكرا ليكم جميعا على الموضوع الجميل ده

**mohamed211** · 25-05-2009 10:57 PM

أنا بانسبه للفابيا بتاعتي 2001 1000 cc MPI ده تقييمي ليها في الإسبوع دا:
- أنا كنت ناوي أشتري بولو 2001 بس بصراح هفي الأخر فضلت الفابيا علشان مش منتشره زي البولو (دي ميزه بالنسبه لي) وعرفت أن موتورها زي البولو و كان سعرها أحسن بكتير (أنا كنت حجيب بولو 2001 ب 48 ألف علشان حالتها كانت نضيفة بينما الفابيا جبتها ب38 ألف).
- بالنسبه للشكل أنا شايفو إنو جامد وغم إنها صغيره حجما بس صالونها كويس حجما.
- إستهلاك البنزين كويس جدا (علشان 1000 cc , و injection)
- خامات الصالون جيده (علي الأقل أحسن من الكوري)
- قطع الغيار أنا طبعا ماليش خبرة فيها بس جبتلها فانوس خلفي تايواني كان ب 150 جنيه.
- عيبها إن مافيهاش باور (أعتقد هي هاف باور).

لو حد عايز يعرف حاجه تاني ياريت يفكرني

**Meshfaker** · 26-05-2009 06:10 AM

تسلم يا محمد ( mohamed211 ) باشا على ردك
بس معلش انا هرخم عليك شويه عشان كان عندى كام سؤال كده
انا نزلت الكتالتوج بتاع العربيه دى بس تقربيا كان بتاع موديل 2005 فشوفت ان فى كمبيوتر وتكنولوجيا عالية بصراحة وانا بحب الحاجات دى جدااااااااا
فياريت يا باشا تقولنا عربيتك فيها فعلا كمبيوتر والانظمه دى والا ايه ؟؟

ومعلش سؤال تانى ارخم من الاولانى
انت شارى العربيه دى منين ؟؟ اصل انا مش عارف ده السعر الطبيعى والا ايه ؟؟؟