انا خلاص هتجنن ومش عارف اعمل ايه
انا معايا نوبيرا 2008 عاملة 14 الف كم ، العربية من ساعة ما جبتها وانا كل شوية في التوكيل باحاول اعالج مشكلة وراء مشكلة لدرجة اني مش حاسس اني معايا عربية زيرو ، وبدأت افقد ثقتي في العربية مع كل مشكلة تحصل في العربية وكل مرة اصبر نفسي واقول دا عيب الانتاج المصري عموما وكل الاخطاء البسيطة دي واردة في الانتاج المصري واهم حاجة المحرك واساسيات العربية سليمة ودا كله لحد الموضوع ما وصل للمتور الي هوا اخر حاجة مصبراني علي العربية دي
بدا الموضوع اول ما اشتريت العربية ومع صيانة الالف وشكوتي من صوت المحرك العالي والخشن والتي انتهت بتقبلي لذلك الصوت نزولا علي اراء جميع مهندسي التوكيل ان ده صوت عادي جدا في الدايوا، ولكن من حوالي شهر تقريبا لاحظت وجود تعريق زيت حول غطاء التاكيهات (عامل البنزينة هو الي نبهني لده) وبدات التفت لصوت المحرك واتابع تعريق الزيت في ان واحد ثم ذهبت لمركز الصيانة وكالعادة قامو بطمانتي وان كله تمام وصوت التكتكة العالي ده هيروح مع المشي (برغم تغامزهم عندما لاحظو صوت التكتكة الصادر من المحرك)
وفعلا بيحصل ان الصوت بيروح مع المشي ولكنه يعود مع كل مرة اعيد فيها تدوير السيارة في اليوم التالي
المشكلة اني قرات موضوع لاحد الزملاء في المنتدي بيشتكي من الصوت ده الي هو طبعا صوت البلوف(الكوستيبانات) في سيارة اشتراها مستعملة
هل من الممكن من الاخوة الزملاء وبالاخص أ/ ممدوح ارشادي لمدي خطورة الموضوع ده وتاثيرة علي العمر الافتراضي للموتور وخصوصا اني مش عايز افتح موتور عربية لسه زيرو حتي ولوكان في الضمان مع العلم اني خلاص بدات اتشائم من العرية دي ومن كل الصناعة المصري الي اصبحت اسوأ من الصيني
أطمن موش كستبانات النوبيرا إلي ممكن تعملهم بدري كدة
بص يا اخي علشان تحكم الصوت دة عالي ولا لأ شوف نوبيرا اخري سليمة لحظة التدوير الصبح و المحرك بارد وقارن وكذلك سمع الصوت لميكانيكي محترم برة التوكيل لو قالك ان في حاجة موش مظبوطة دة موضوع تاني لو طمنك نسبيا سيب العربية وغير نوع الزيت ل visco او زي ما انا بحط total quartez 10000 دي زيوت نسبيا مفيش غش فيها وغير علي 5000 متستناش لأن الحرارة والأتربة و الحركة البطيئة في الزحام لايمكن تعتبرها أمنة علشان تستني 10000 زي المعايير المقررة وصدقني العربية كويسة جدا ومفيهاش حاجة بإذن الله لأن موش محرك النوبيرا او اللانوس إلي ممكن يحصل دة فيهم بسرعة كدة حتي لو استخدامك قاسي و بالنسبة للزيت أوعي يكون المستوي أعلي من الحد الأقصي دة بيقتل المحرك أكتر من لو المستوي أقل من الحج الأدني بشوية أنا غيرت عند ميكانيكي جاري ويدوب إلتفت لقيد الواد بلية كب ال 4 لتر كلهم ولقيت الزيت عالي وللأسف سافرت شرم كدة ولقيت جوان غطي التاكيهات عرق زيت بس عملت مايشبة القسطرة الجراحية دخلت خرطوم رفيع من فتحة المقياس وسحبت حوالي ربع لتر لحد ما مستوي الزيت بقي عند الحد الأعلي و من ساعتها التعريق شبة توقف والعربية بقت أحسن عموما متزعلش نفسك بإذن الله بسيطة