الموضوع: تقييم النيو سيراتو والمقارنه مع الالنترا

المشاركة الأصلية كتبت بواسطة Fadi Ezzat

شكار على المقارنة الهايلة دى

شكرا ياباشا

المشاركة الأصلية كتبت بواسطة m_o_sakr

بجد تسلم ايدك على المقارنه الموضوعيه الممتازه دى, بس يا ريت حضرتك تقول السيراتو و الإلانترا الى معاك انهى فئه و وكيل ولا خليجى؟؟
بالنسبه لتكييف الإلانترا لو العربيه راكنه فى الشمس فتره طويله او الموتور كان شغال فتره طويله من غير متكون مشغل التكييف لما تيجى تشغل التكييف لازم تعليه علشان تحس بيه بس لو العربيه مش سخنه ولا راكنه فى الشمس لمده طويله بيكون اداء التكييف ممتاز

ربنا يكرمك
النترا بعتها كان معايا مانيوال
سيراتو اوتوماتيك الفئه ب 109 الف بس والله مش فاكر اسمها ex تقريبا علي ما اتذكر

المشاركة الأصلية كتبت بواسطة tamermagdy

تقييمك رائع لكن حاسس انك بتحب السيراتو عن الالنترا

ربنا يكرمك
هو دلوقتي بحب السيراتو اكتر
لكن وقت ماكتبت المقارنه لأ بس هي الامانه بتقتضي التوضيح
الالنترا ممتازه ولكن السيراتو فعلا افضل

المشاركة الأصلية كتبت بواسطة dr.amr

بسم الله الرحمن الرحيم

(اولا و قبل ما اكتب اي حاجه عايز اقول اني مش داخل انقض اي سياره لأن انا بحب الاتنين فياريت ماحدش يهاجمني او يتكلم بعنف لأني بحاول اقيم العربيتين بما يرضي الله وبدون ما انحاز لواحده عن الاخري ولو في حد عنده اعتراض ياريت نتناقش بهدوء لأننا في الاول والاخر اخوات في منتدي واحد ...... وشكرا)

طبعا انا هحاول اقيم النيو سيراتو في شكل مقارنه مع الالنترا لأنها هتفيد ناس كتير مع اني معترض علي النقطه ده لأن الالنترا تتقارن بالسيراتو الشكل القديم اما موضوع مقارنه مع جيل جديد هتكون ظالمه الي حد ما للالنترا

1-الشكل الخارجي (انا مش هحط عليه تقييمات لأنه الحاجه الوحيده اللي ممكن تحكم عليها وهي العربيه واقفه من غير ماتركبها)

2-الشكل الداخلي
-النيو سيراتو: الصراحه اكتر شيء شدني للسيراتو شكلها الداخلي والوانها الداخليه المتناسقه بداية من العدادات الرائعه والكاسيت الجامد جدا والطاره المالتي فنكشن شكلهم جميل جدا وخصوصا بالليل ماشاء الله بجد رائع جدا وكمان في ميزه تانيه انك ماتسمعش صوت طقطقه من التابلوه مع المطبات علي عكس الالنترا .....بس مشكلتها الوحيده الخامات البلاستيك ولكن تقفيلها جيد جدا ومفيش حتت مفارقه عن بعض (8.5)

-الالنترا:افضل شيء في الانترا هي الخامات المستخدمه في التابلوه خامات طريه اعتقد انها من الفوم وبعض الخامات البلاستيكيه في فتحات التكييف واللي بتعمل صوت طقطقه مع المطبات ومع تشغيل التكييف وبرضه تقفيل الطابلوه جيد ولكنه اقل من السيراتو (7)

3-الوسع الداخلي والكنبه الخلفيه
-النيو سيراتو:بصراحه انا بستغرب من اللي بيقول ان الكنبه الخلفيه ضيقه ...انا شايف علي العكس تماما انها واسعه جدا وللعلم انا طويل وكمان في ميزه مش بس انا اللي لاحظتها في كذا شخص لاحظها ان اللي كان بيركب ورا في النترا كان ممكن يشعر بعض الاحيان بدوار ولكن في السيراتو لا (8.5)

-الالنترا:وسع الكنبه جيد ولكن مشكلتها معايا كان الدوار اللي بحس بيه وانا راكب ورا (7.5)

4-التكييف
-النيوسيراتو: ماشاء الله قوي جدا وعمري ماعليته عن 3 في عز الحر وغالبا الصبح علي 2 وبالليل علي واحد (9)

-الالنترا:اكبر مشكله في الالنترا هي التكييف علي الدرجات 1 2 3 ماتحسش بأي حاجه لازم تجيبه علي 4 علشان تحش بيه بس طبعا اي حد بيبقي قاعد ورا كان بيتعب من الحر فعلا ضعيف جدا (6.5)

5-العفشه
-النيو سيراتو:طبعا انا اول ما اخدت العربيه حسيت اني راكب هامر بجد نشوفيه غير عاديه روحت محطة البنزين لقيت الكاوتش علي 55 طبعا حمدت ربنا لأني كنت ناوي ارميها من فوق اي جبل لوكانت هي دي عفشتها بس بصراحه العفشه بتتطري كل مدي وهي مش عفشه يعني تبوظ اللي راكب فيها ممكن اشبهها بعفشة الالنترا الشكل القديم االي هو 2006 (7.5)

-الالنترا: اكبر ميزه للالنترا علي السيراتو هي العفشه الطريه بس برضه انا عايز اوضح علشان مااخدعش حد ان العفشه مثلا مش زي بتاعة الكورولا الشيب القديم هي ادق وصف ليها انها حنينه ولكن مش طريه زي الكورولا (8.5)

6-الثبات علي الطريق وفي المنحنيات
-النيو سيراتو: ثبات رائع جدا العربيه بتديك ثقه رهيبه في الثبات علي الطرق السريعه اما المنحنيات فده حكايه تانيه فعلا انا اول مره اركب عربيه ثباتها علي المنحنيات بالشكل ده .....اللي خلاني اقول كده ملف واحد جربت عليه 3 عربيات ياريس وكانت هتقلب منه وربنا سترها النترا وطبعا كانت افضل من الياريس بس برضه ماكانتش زي ماتوقعت اما السيراتو فماشاء الله (9)

-الالنترا:العربيه ثباتها جيد علي الطرق المستقيمه ولكن في المنحنيات بصراحه مش حلوه بحس ان العربيه بتلب مني وبحس انها محتاجه تكون مركز معاها جدا (7.5)

7-الباور
-النيوسيراتو:الباور تقيل بس مش قوي زي اي باور هيدروليك بس انا بحبه بصراحه (7.5)

-الالنترا:الباور عامل زي المياه مريح جدا في الركن وفي الاماكن الضيقه ولكن في الطرق السريعه لازم تبقي مركز معاه كويس لأنه ممكن يخونك بسرعه وبسهوله (7)

8-الشنطه
تقريبا نفس الوسع في الاتنين

9-استهلاك البنزين
تقريبا نفس الاستهلاك مع العلم ان الالنترا مانيوال والسيراتو اوتوماتيك

10-قوة المحرك
نفس القوه تقريبا مافيش فرق ملحوظ

11- الفرامل
مافيش اختلاف تقريبا

12-العزل
عزل السيراتو افضل من الالنترا قليلا ولكن الاتنين جيدين

13-المرايات الجانبيه
في السيراتو افضل ..... انا مش فاه ليه اللي صمم الالنترا عمل المرايات صغيره كده؟؟

14-صوت المحرك
الالنترا صوت المحرك هادي مابيظهرش غير عند 2.5 ار بي ام
اما السيراتو فصوتها مسموع وفي ناس بتقول عليه خشن بس انا بحب صوته جدا وبقيت احب اسوق وانا فاتح الشباك علشان اسمه صوته هو ذات طابع رياضي

15-التوكيل
مش هقول جديد الكل عارف غبور ونصير .... انا بس هقول ان الالنترا لسه مشحمه من جوه من مطرح الصنايعيه

16-السياره في كلمه

السيراتو: سياره ذات طابع رياضي رشيق
الالنترا :عربيه محترمه ولكنها اتظلمت بوضعها في المقارنه ده


انا خلصت واتمني اني مااكونش نسيت حاجه ولو فيه اي حد عايز يستفسر عن حاجه ياريت يتفضل

مقارنة غير منضبطة وفيها تحيز واااضح للسيراتو مع احترامي ليك .

معظم المعلمومات اللي قلتها عن الالنترا غلط 100 % .

اهنيك على التقيم الرائع والعادل دا