الموضوع: مشكلة في ax يا جماعة ضروري

بص يا باشا أولا لا شكر على واجب
أنا معايا AX و مكنش حد موافق على إني أشتريها و كل الناس خوفوني منها بس أنا لما جيبتها بقيت أشوف الناس بيتراجعوا عن رفضهم للعربيه واحد ورا التاني المهم

كل يوم الصبح لازم تبص على الرادياتيير و تديله ميه بعد ما تكون فكيت البلفين دول إللي إنت خلاص بقيت عارفهم كده عمرك ما حتشتكي من الحرارة تاني

ثانيا لو عاروز تحط ميه خضرا فيه ف الرادياتيير من تحت كوعة ميه فك الأفيز بتاعها حتلاقي الميه كلها سقطت و بعدين استغنى عن لتر و لا نص لتر ميه خضرا و صبه ف الرادياتيير لحد ما تلاقي الميه الخضرا هيه إللي بتسقط من تحت و بعدين اربط الأفيز تاني و زود ميه براحتك

و لو حتنزل أليكس قريب إبقى قوللي عشان نلعب مواتييييييييييير

ربنا يبارك لك ف عربيتك
ملحوظه ما تسمعش كلام أي حمار يقولك ريح الغيار ال ax لا زم تشبعها غيار عشان متخنقش المكنه

تمام يا وليد باشا، ربنا يكرمك ع المعلومات دي، والله أنا أول مرة أعرف ان الميه الخضراء ممكن تبوظ الرايداتير، ع العموم مش ضرورى استخدمها دلوقتي، المهم انت قلت ان في بلفين بس اللى أنا فكيته وشفته بلف واحد فهل ده معناه اني برضه ما ماليتهاش ميه صح واللا ايه؟
وبالنسبة للغيار أنا فعلا بأشبع العربية بس في الوقت نفسه مش بأقرص عليها، وعلى فكرة نفس الرفض لاقيته من كل الناس وأنا باشتريها خاصة عندنا في البيت بس أصريت عليها، وعلشان كده طول الوقت خايف من (الشماتة) لو طلعت فيها مشاكل،

أما عن موضوع الميه الخضرا ده فانا بأملا القربة في عربية والدي (سيينا) على الآخر منها، وبقالي كتير ع الموضوع ده فهل ممكن يسبب مشكلة؟

والف شكر ليك وللجميع على تعبكم معايا

يا صاحبي فيه بلفين هوا و لازم يتفكوا مع بعض و تملى القربه لغاية ما الميه تنزل من البلفين و بعدين تقوم رابطهم تاني
واحد فيهم بين الرادياتيير و المكنه و ده بيتفك بمفتاح إلن 5
و التاني ف نهاية الكبوت ورا على اليمين و ده ممكن تفكه بإيدك عادي
إظبط عربيتك و خللي والدك يسوقها على الطوالي و بعد كده إسأله عن رأيه
هههه

ولا زم تشبعها غيار عشان متخنقش المكنه

تمام يا جماعة
بس هو معدل الحرارة لما تكون طبيعية بتبقى اد ايه، وعلى فكرة انا باشيك دلوقتي يوميا على الميه وبتبقى ناقصة بس مش كتير
--------------------------
كنت عايز اسأل شوية على اسعار قطع الغيار لو حد عنده فكرة ومنين أجيب الاصلي
يعني أسعار السيور وخاصة سير الكاتينة علشان لسه ما غيرتوش
وكمان سلك الدبرياش
وباقي الحاجات الخفيفة زي اللمبات وكده يعني
-------------------------
وسؤال كمان معلش تقلت عليكو، هو أي كهربائي ينفع يشتغل فيها واللا في كتخصصين في السيتروين زي الميكانيكية كده، وكمان أنا بأسمع زنة شوية في تابلوه الكهربا، وكمان الاشارت مش ماشية مظبوط، يعني امبارح مثلا بأجرب أشغل الاشارة اليمين لقيتها منورة الشمال، والكاسيت بيقفل ويفتح مع كل مرة أشغل فيها الاشارة أو المساحات او حتى النور


شكرا جزيلا

معدل الحرارة الطبيعي من 80 إلي 90
أسعار قطع الغيار كمثال:
سير تقسيمه 65
سي دينامو 35
كشاف أمامي 120
فانوس إشارة30
كابل دبرياج 65
إللي فات ده كله جديد
و لو حتجيب إستعمال الخارج حيبقى أرخص
بالنسبه للكهربا
أي كهربائي بيفهم حيقدر يتعامل مع العربيه لإن الضفيرة بتاعتها بسيطه مش معقده للدرجه