مشكلة في ax يا جماعة ضروري

**megoghanem** · 07-06-2009 12:47 AM

السلام عليكم
الرجاء مساعدتي في مشكلة خطيرة، أنا لسه جايب العربية ما بقاليش أسبوع، ودورت كتير على القربة اللى أزود منها مية الرايداتير ملاقيتهاش، فزوت النيه من بوز الرايداتير مباشرة، وبعين العربية بقت بتسخن بطريقة تخوف، يعني عداد الحرارة بيوصل لحد 100 واللمبة لحمراء بتنو كتير واضطريت أقف كذا مرة في مشوار واحد، وبعدين ركنتها في شارع جانبي وورحت مواصلات

يا ريت لو حد يعرف المشكلة دي من ايه، وازاي اتصرف معاها، أنا سألت حد معاه ايه اكس برضه قالي انها ممكن تكون أخدت هوا لما زودت الميه/ وقالي سيبها لما تبرد خالص وبعديم فك أفيز الميه وافضل زود ميه من الرايداتير لحد ما تلاقي الميه نازلة من الناحية التانية بدون رغاوي، فهل الكلام ده صح، وفين أفضل ميكاميكي وكهربائي للتعامل معها مع العلم ان انا ساكن في الهرم

وحزاكم الله كل خير رجاء الرد عليا بسرعة علشان أشوفها بكرة

وآسف على الازعاج

**otefa** · 07-06-2009 12:49 AM

الكلام صح 100%

**pharonicking** · 07-06-2009 01:22 AM

بس ايه اللى يخليها تنقص مية؟ اكيد فيه سبب تانى؟

**waledwaled** · 07-06-2009 01:42 AM

بص يا باشا
أولا لمبة الحرارة دي تخص مروحة الرادياتير يعني لما العريه بتسخن و المروحه مش بتشتغل اللمبه بتنور بس طبعا لإن مفيش أمبير حرارة إنت بتبقى ماشي و مش عارف المكنه سخنه و لا إيه وضعها
ثانيا فيه بلفين زي بتوع العجل واحد جنب الرادياتير و التاني ورا ناحين اليمين دول لازم تلفهم نص لفه و بعدين تبتدي تزود ميه لحد ما تاميه تنزل منهم من غير أي فقاقيع و بعدين تقوم رابط عليهم تاني
عشان دورة التبريد مايبقاش دخلها أي هوا

**megoghanem** · 07-06-2009 09:28 AM

شكرا للجميع على سرعة الرد، بس سؤال لـwaled أنا مش فاهم بالظبط اللمبة الحمرا دي بتنور ليه، يعني لو نورت طبيعي واللا بيقبى في مشكلة’ وأنا هأعمل الخطوات دي النهاردة بإذن الله لكن لو العربية استمرت تسخن ايه اللي أعمله ، وايه هي الاحتمالات اللى بتخليها تسخن مع العلم أنا كشفت كذا مرة على الزيت ولقيته كويس ، وآسف على تعبكم جميعا لكن معلش العربية اول اسبوع ليها معايا وبتعمل كده، قدر الله وما شاء فعل

**otefa** · 07-06-2009 11:19 AM

المشاركة الأصلية كتبت بواسطة pharonicking

بس ايه اللى يخليها تنقص مية؟ اكيد فيه سبب تانى؟

ياباشا هو مقلش ان المية بتنقص ده كان بيعمل شيك اب علشان واخد العربية جديد ففتح الرادياتير والعربية سخنة
فعلشان يزود ميه لازم يستني لما تبرد ويعملها تنفيس لان بيكون تكون فقاعات هواء بتعمل زي عزل للحرارة بتخلي الثرموستات ماتفتحش في الوقت الصح فتسخن العربية

**waledwaled** · 07-06-2009 02:17 PM

اللمبه الحمرا دي مرتبطه فقط بالحساس بتاع الحراره إللي بيشغل مروحة الرادياتيير
يعني لو العربيه سخنه و المروحه مشتغلتش يبقى كده مفروض اللمبه تنور و إنت مفروض تراجع على الحساس و المروحه

**megoghanem** · 07-06-2009 04:45 PM

بس أنا بأسمع صوت المروحة وبرضه اللمبة بتقبى منورة، يبقى العيب منين؟

**waledwaled** · 07-06-2009 09:31 PM

المشاركة الأصلية كتبت بواسطة megoghanem

بس أنا بأسمع صوت المروحة وبرضه اللمبة بتقبى منورة، يبقى العيب منين؟

كده يا باشا لابد من الكشف على الباترون (الحساس بتاع الحرارة ) و تغييرة بس ما تقلقش ده حوار كبيرة أوي 200 جنيه بالتركيب بكل حاجه و عليك و على أمير و جوزيف
لكن خللي بالك و أنا رأيي إوعي تطلع بالعربيه و هيه كده عشان ما تجيبش منك جوان أو تلاقي وش السلندر قفع منك لا قدر الله
خللي واحد صاحبك يقطرك للميكانيكي
أنا عربيتي ax جابت جوان بسبب الحراره لإن البيه الميكانيكي كان سايب المروحه مربطهاش
و كنت آجي أمشي بالعربيه بعد 10 دقايق ألاقي اللمبه نورت و كنت حأتجنن و إذا قرصت على العربيه شويه ألاقي كل الميه إللي ف الرادياتير سقطت من تحت
المهم الحمد لله بس زي ما بأقولك متمشيش بيها إلا و الحرارة مظبوطه إن الستروين بالذات حساسه أوي لموضوع الحرارة ده

**megoghanem** · 08-06-2009 08:50 PM

الحمد لله المشكلة اتحلت
طلعت بالفعل مجرد هوا في الرايداتير ومكانش فيه ميه بشكل شبه تام، بس الحمد لله دلوقتي عرفت الطريقة، وأشكر كل من شارك في الموضوع وآسف على ازعاجكم بكثرة الأسئلة بس يا ريت تستحملوني أحسن أنا كنت خلاص اتعقدت من العربية رغم اني جايبها بإلى سعر ممكم، إضافة إلى تأكيد الناس اللى شافوها كلهم ان حالتها ممتازة، شكرا للجميع وبالأخص الأخ Waled بس حابب أعرف في النهاية لو المشكلة دي اتكررت يبقى فيها مشكلة في الرايداتير، والمفروض اني ازود الميه كل اد ايه، وازاي افضيها خالص علشان أملاها ميه خضراء وشكرا مرة تانية