يعنى ايه التيل بتاع الفرامل دا

**l0new0lf** · 27-06-2009 06:49 AM

تيل لزق يعنى لما تروح تملا التيل, مادة التيل بتتلزق على القباقيب (زى التيل الاصلى) و ده بس الوحيد اللى ممكن نملا بيه التيل الامامى(السكينه) علشان مستحيل عمل ثقوب فيه للتثبيت بالبرشام و محدش بيستعمله الا اللى مش لاقى تيل السكينه الاصلى بتاعه لان فيه ناس بتقول انه بيفك لوحده
تيل شنبر (قصدك برشام) مادة التيل بتتثبت على القباقيب ببرشام و ده الشائع فى ملو القباقيب لسهولة عمل ثقوب فيها و ده ارخص من اللزق لان البرشام بياخد من تخانة الماده الحاكه , فبيتغير على فترات اسرع من اللزق و خصوصا لما يكون صنايعى نص و مركب البرشام عالى
تقريبا الميكانبكى قصده يقول ان فى كل جنب كان فيه فرده اتملت و فرده لا (فيه ناس بتعمل كده علشان متملاش الاربع قباقيب) لان مفيش حد بيملا قباقيب باللزق.

**نور العمر** · 28-06-2009 09:22 PM

[gdwl]شكرا يا بشمهمندس سمير[/gdwl]

سؤال ممكن يكون مكرر ... إيه هو ماستر الضفدعة .. وليه مسميينه كدة ... وده شوفتو متركب عند العجلة بيبان لما تتشال .. وإيه دوره
وليه كتير من ميكانيكية 127 بيقولو ده بيتلغي .. ونركب بداله
مشترك ... ( وإيه هو المشترك ) ؟؟؟

وفرامل اليد ... ليها نظام لوحدها عن دواسة الفرامل

وسؤال كمان معلش ... إيه قصة ( هوا في الفرامل ) وليه بيحصل ويظهر هوا فجأة يخاللي الفرامل تهرب ... انا بترعب من الموضوع ده
وعملت حادثة بسببه قبل كدة... ومن خوفي غيرت ماستر الفرامل العمومي كله للاحتياط .... وهربت تاني مني ... بس كنت قادرة اتحكم في العربية والسواقة لحد ما وصلت لميكانيكي...

بعتذر .... اسألتي كتيير
وشكرا جزيلا

**samirayad** · 01-07-2009 07:42 PM

المشاركة الأصلية كتبت بواسطة ayman_elkholy

نشكرك يا باشمهندس سمير على التوضيح الاكثر من رائع .
ولى استفسار على السريع منذ فترة وانا اسمع صفارة اثناء الفرامل بس مش فى جميع الاوقات وكل لما اروح للميكانيكى يديها صنفرة ويبقى الوضع على ما هو علية والتيل مليان فعلا يا ترى المشكلة تكون فى اية . واسف على الاطالة

فعلا ...فى الغالب ده بسبب عدم أنتظام توزيع حبيبات التخشين بتاعة التيل ( عيب صب حبيبات )

المشاركة الأصلية كتبت بواسطة ahmed.omar

ممكن تكون فى حبيبات رمل لازقه ع التيل واستنى برضه البروفيسور أ/سمير يقول رأيه

أولا بأشكرك على الثقه الغاليه ........بس واضح برضه أن العيب فى صب حبيبات التخشين اللى بتكون وقت صب الماده الخشنه للتيل ........

**samirayad** · 02-07-2009 06:17 PM

سؤال ممكن يكون مكرر ... إيه هو ماستر الضفدعة .. وليه مسميينه كدة ...

الصراحه الأسم غريب عليا برضه ......بس أى عربيه فيها ماستر رئيسى لرفع ضغط الزيت مبدئيا ....وأرساله الى الأربع مساتر الفرعيه ( وكل واحد بيخدم على عجله وقت الفرامل )........وليه مسمينه كده ......أكيد لأنه شبه الضفدعه أما فى الشكل .....أو فى حركانها (بتنط فجاه بسبب رجليها الخلفيه أطوال من الأماميه ) بتقفز يعنى !!!!!!!!!!!!.........وعلشان كده أحتمال يكون ماستر زياده بيكون بعد الرئيسى علشان يعمل قفز أو رفع لضغط زيت الفرامل بهدف رفع قيمة ضغطه قبل الوصول للفرامل الفرعيه .....مثلا

وليه كتير من ميكانيكية 127 بيقولو ده بيتلغي .. ونركب بداله
مشترك ... ( وإيه هو المشترك ) ؟؟؟

أى مشترك فى أى منظومه بيكون الهدف منه تعويض مكان الجزء الذى تم أستقطاعه من المنظومه ( فهنا شيلنا الضفدعه ......حنحط مكانها مشترك تعويضى )..........بس أعتقد الآداء الفرملى بيقل لما نشيل الماستر الضفدعه ده ونحط مكانه المشترك لأنه كان بينطط ضغط الزيت شويه مثلا زى الضفدعه مابتنط .....ههههههههههههه......لأن ده المنطق فعلا !!!!!!!!!!!!!!!!

وفرامل اليد ... ليها نظام لوحدها عن دواسة الفرامل

فرامل اليد ليها نظام تحكم خاص بيها (عباره عن مجموعة وايرات من أول يد الفرامل وواصله الى الطنابير الخلفيه ) بحيث مع رفع اليد .......التيل الخلفى بيكلبش على الطنابير الخلفيه .....وبالتالى منع العربيه من الحركه ...............وملهاش دعوه الفرامل بتاعة اليد بدورة الفرامل العاديه...................

إيه قصة ( هوا في الفرامل ) وليه بيحصل ويظهر هوا فجأة يخاللي الفرامل تهرب ... انا بترعب من الموضوع ده

هواء دورة الفرامل بيدخل الدوره عامة وقت تغيير زيت الفرامل أو تزويده ......وبالتالى الزيت وهو بيتزود بياخد هواء قدامه وبالتالى المواسير والخراطيم بيبقى فيها هواء وزيت وده بيقلل الآداء الفرملى .................وده بنحسه مع أستعمال الفرامل .....وبيتم أخراج الهواء بالطريقه بتاعة الأستنزاف المعروفه لأخراج الهواء

وعملت حادثة بسببه قبل كدة... ومن خوفي غيرت ماستر الفرامل العمومي كله للاحتياط .... وهربت تاني مني ... بس كنت قادرة اتحكم في العربية والسواقة لحد ما وصلت لميكانيكي...

بعتذر .... اسألتي كتيير :zb_sor1[1]:
وشكرا جزيلا
__________________

حمدا لله على سلامتك ............وتحت أمرك أختى الفاضله ..................

**ahlawy2oo8** · 04-07-2009 12:07 PM

يا لهووووووووووووووووووووى
هو انتوا عندكوا كام سنة عشان تعرفوا الحاجات دى كلها ؟
:d :d
انا مش بحسد و الله بس انا عندى 18 سنة و بعرف اسوق الحمد لله و على اخر الشهر هيبقى معايا رخصة ان شاء الله و نفسى اعرف زيكو
هل ده ممكن ؟ مع العلم انى ان شاء الله السنة اللى جاية اولى ميكانيكا باور هندسة المنصورة
:o :o