الموضوع: اخيرا اشتريت التمبرا اللي نفسي فيها ... ادخلوا احكيلكوا

بسم الله الرحمن الرحيم


نزلت يوم الجمعة اللي فات سوق السيارات بتاع مدينة نصر اخدت معايا قريب ليا خبرة في العربيات و نازل حاطت هدف ليا اني ابص بس علي التمبرا

المهم لقيت حوالي 5 او 6 عربيات بس في السوق كله - الاسعار من 35000 وانت طالع علي حسب امكانيات العربية و حالتها و ده طبعا السعر المبدئي للعربية و انت و شطرتك في الفصال

فضلنا نبص علي كل العربيات اللي في السوق لحد ما جت العروسة بتاعتي ( عربيتي يعني )

موديل 99 - 1600 سي سي - زجاج كهرباء امامي فقط - سنتر - باور - فبريقة بالكامل من الداخل - كوتش جديد تيوبلس - العربية متأمن عليها - كاسيت و سماعات بايونير - تكييف شغال

السعر : الراجل ابتدي معايا من 36000 و ده كان تاني اقل سعر سمعتة لاني سمعت 38000 في عربية موديل 90 عدادات ديجيتال

المهم بعد الفصال المرير طبعا الراجل راسة و الف سيف ماينزل شلن عن 34500

الحمد لله اشتريتها علي 34500

الحاجات بقي اللي مش عجباني في العربية

1- التكييف بتاعها بيطلع هواء سائع بس مالوش تأثير علي صالون العربية يعني لو حطيت وشي قدام فتحات التكييف بحس الجو حلو غير كده مش بحس ان التكييف بيعمل حاجة غير تغير بسيط قوي مع اني بشغلة علي low


2- معظم كاوتش البيبان و الشبابيك عاوز يتغير

3- الزجاج الكهرباء بتاع الباب اليمين بيزيق كده مع الطلوع و النزول

4 - العربية عاوزة مساعد امامي - و انا ناوي اغير كل المساعدين ان شاء الله

5- الاكسدامات اللي قدام و ورا متعلقين بمسامير

6- طبعا الفيبرة بتاعت العدادات مشروخة من فوق

7 - العربية ماشية كتير قوي الصراحة عاملة 262000 كيلو لانها كانت عربية شركة و بعدين اللي انا اشتريتها منه اشتراها من الشركة دي لانها كانت شركتة اللي بيشتغل فيها اصلا ، و بسؤال البايع قالي انها عاملة عمرة من 70000 كيلو يعني تقريبا و هي عاملة 192000 كيلو

8- للاسف كان بيحطلها بنزين 80

9- العربية كاربيراتير مش هاف انجيكشين

ده طبعا تشخيص مبدئي بالنظر لواحد مبتدئ زيي

المهم بقي بعد كل ده طبعا ماكتفيتش بخبرة قريبي قالي تعالا نرفعها بقي و روحنا علي واحد سمكري و ميكانيكي الورشة بتاعتهم في شارع قريبي يعني حبايبنا - السمكري كمان معاه تيبو بتاعتة شخصيا

المهم السمكري رفع العربية و بص علي كل حاجة فيها و جه قالنا العربية زي الفل و خلصوا فيها دلوقتي حالا

الميكانيكي فتح العربية و قد يفلي في كل حتة فيها و جه قالنا المكنة بتاعتها زي الفل و مافيهاش اي حاجة و العربية زي الفل

و بعد كده الحمد لله كتبنا العقود مع الراجل صاحب العربية و ان شاء الله رايح ارخص يوم السبت اللي جاي ... ادعولي بقي


ها بقي يا احلي منتدي

تنصحوني اعمل ايه و ايه رأيكوا في العربية .... ياريت اي حد عنده اي ملحوظة و سؤال يقولة عشان استفاد و نستفيد كلنا

تفتكروا العربية بعد ما عملت عمرة ده يعيبها ولا ايه

التكييف تفتكروا عاوز شحن بس ولا فيه حاجة

اجيب الكاوتش بتاع البيبان ده منين ؟