عايز أعدل الطنابير علشان أقدر أحط جنوط

**speed demon666** · 13-06-2009 05:40 PM

السلام عليكم ورحمة الله وبركاته

انا كان عندي استفسار , ديلوقتي انا عربيتي بيركب عليها جنوط 3 مسمار و أنا عايز اني أركب جنوط تانيا بس 4 مسمار
ناس قالولي حط فلنشه بس انا قلقان منها , بالصدفه شوفت تاكسي مركب جنوط و مظبط العربيه أحلى تظبيط و قفتو و اتكلمت معاه و قاللي معدل في راس الكوبلن و حاطط راس كوبلن 128 فيات بالطنابير بيتاعتها
فا انا مش عارف هل ده صحيح ولا ايه لو مش صحيح حد يقوللي أعمل الموضوع ده ازاي

و شكرا

**speed demon666** · 15-06-2009 11:36 AM

هو محدش يعرف في الموضوع ده ولا ايه ..... ولا رد كده خالص .... طب عدو سلمو على الاقل

**HeMa_LanCeR** · 15-06-2009 11:44 AM

طيب نوع العربيه ايه اصلا ؟
ومدام انت شوفت التاكسي معمول كده يبقي فعلا بنفع التعديل

**Ashraf_Ashraf** · 15-06-2009 12:19 PM

فلانشه ايه لا طبعا انت بتتكلم فى امان وسلامه ولا منظر
عاوز تعدل يبقى تعدل السره والبلى والطنبوره بالكوبلن انصحك بلاش شغل السوق دا عمر يامان
وربنا يحفظك

**استشارى ميكانيكا نايل موتورز** · 15-06-2009 04:04 PM

تم مناقشة موضوع الفلنشات سابقا و عرض المخاطر التى قد تتعرض لها فى حالة انهيار الفلانشة

استشارى المنتدى

**speed demon666** · 15-06-2009 08:33 PM

المشاركة الأصلية كتبت بواسطة HeMa_LanCeR

طيب نوع العربيه ايه اصلا ؟
ومدام انت شوفت التاكسي معمول كده يبقي فعلا بنفع التعديل

السيارة سيتروين ax

انا بالنسبة لي مش موافق على موضوع الفلنشه تماما حتى لو هيحولها لفيراري ( يارييت )

انا اللي أقصده ان التعديلات اللي عملها دي ليها تأثير على السياره ولا لأ أصل هو تاكسي فا ممكن متكنش فارقى معاه , أصل الموضوع ده كلفه حوالي 600 أو 800 مش فاكر كويس , فأنا علشان كده بسأل

**DELL** · 17-06-2009 04:49 AM

عربيتك دي عايزة تعديل عفشة هتجبلها عفشة دايو استعمال وتروح لعفشجي بيفهم يعدلهالك ويركبلك العفشة الجديدة وبعدين تركب طنبورة 4 مسامر عادي بقي زي اي عربية وجنط عادي سعر عفشة الدايو دي من 400 الي 500 جنية تقريبا وعلا فكرة انا شوفت جنوط 3 مسمار اسبور في بورسعيد بس كانت شكل واحد

**speed demon666** · 20-06-2009 05:16 AM

هل حضرتك متأكد من الموضوع ده , لأن دي أول مرة أسمع موضوع ان عفشة الدايو بتركب على ستروين

**aYaBooY** · 22-06-2009 04:11 PM

موضوع التعديل ده هاتلاقي كتير اوى عاملينة من الناس الي معاها رينو 12 و 18 و الستروين
موضوع عفشة الدايو لو ينفع فعلا يبقي دوس فيه ممكن يكون مكلف اكتر بس هايفيدك ان كوبلن الدايو عمرة الافتراضي اكتر من كبالن الـ128
اما لو باقي العفشة عندك كويسة يبقي ممكن تغير الصورة و البلي بتاعها بلي الـ 128 الجوز بـ80 و الطنابير استيراد 70 جنيه و جديد ممكن تلاقيهم في حدود 130 او 150 اما جوز الكبالن صيني 110 و ايطالي 220 بس متجبهمش استعمال
بس طبعا الموضوع ممكن يؤثر على الفرامل علشان اكيد طنابير الستروين مختلفة عن الـ128
اما موضوع الفلنشة ده فكك منه خــــالص
و عموما العربيات الي بتتعدل كدة قيمتها بتنزل شوية فانت لو تعرف تدور في الحرفيين على جنوط اسبور 3 مسمار او في بورسعيد يكون افضل و فيه حاجة تانية انا مش عارف انت عامل حسابك عليها او فكرت فيها ولا لا
انت عندك الصاج مغطي الكاوتش و ده معناه انك لو ركبت جنوط عريضة هاتحتاج تغير مساعدين و سوست ورا و طبعا لازم سوست و مساعدين لحاجة تركب عليها و تكون عالية و ناشفة و ده هايؤثر جدا على ثبات العربية و خصوصا لو انت بتحب تشد و تجري
و اي خدمة

**speed demon666** · 24-06-2009 02:40 PM

المشاركة الأصلية كتبت بواسطة ayabooy

و عموما العربيات الي بتتعدل كدة قيمتها بتنزل شوية فانت لو تعرف تدور في الحرفيين على جنوط اسبور 3 مسمار او في بورسعيد يكون افضل و فيه حاجة تانية انا مش عارف انت عامل حسابك عليها او فكرت فيها ولا لا
انت عندك الصاج مغطي الكاوتش و ده معناه انك لو ركبت جنوط عريضة هاتحتاج تغير مساعدين و سوست ورا و طبعا لازم سوست و مساعدين لحاجة تركب عليها و تكون عالية و ناشفة و ده هايؤثر جدا على ثبات العربية و خصوصا لو انت بتحب تشد و تجري
و اي خدمة

انا فعلا كنت لقيت طقم جنوط سبور 3 مسمار و سعرهم معقول بس قولت استنى و أشوف حكايت اني أحولها ل 4 مسمار
و بالنسنة للعرض انا كنت عامل حسابي ان انا أغير الصاج للشكل الجي تي و هو مابيكونش قافل على الكوتش بيبقى زي العربيات العاديه نص دايره