الموضوع: تقييم الفيرنا بعد 12 الف كيلو :)

بسم الله الرحمن الرحيم

و اخيرا حان موعد تقييمي للفيرنا 1600 بعد 12 الف كيلو
و الذي ارجو ان يكون شاملا لكل تساؤلاتكم
وفي البدايه اتوجه بالشكر لصديقي العزيز AHMEDCAR لمعاونته الصادقه لي في التقرير بالصور و المعلومات

سيارتي بعد ال 12 الف كمثال للسياره"هاف اوبشن "

سياره احمد كار بعد ال24 الف كمثال للسياره "فول اوبشن "

طبعا في التقرير ده التزمت ان اكون عادلا تماما في كلامي
بدون تحيز للسياره
و محاولا مقارناتها بمثيلاتها سواء في الفئه او السعر

المحرك

و هو 1600 ثنائي الكامه DOHC 106 حصان

اقوي ما يميز العربيه و نقطه تميزها الرئيسيه عن منافسيها اللانوس و الاسبيرانزا a516
واعتقد انه الي اكسبها شهرتها و انتشارها ايضا " و خصوصا بين الشباب محبي السرعه "
لانه فعلا يعطيك اغراء غير طبيعي للجري و ثقه غير طبيعيه انك ممكن تتجاوز اي عربيه ولو لفتره من الوقت " ده بالنسبه للي بيحبو يقولو انهم سبقو بي ام و غيرها من الوحوش الكبيره الي تقريبا تمنها يساوي 6 او 7 عربيات فيرنا "
ولو ان السرعه خطر طبعا و رأيي انك قبل ماتفكر تسرع فكر ازاي هتوقفها لو حصل شئ مفاجئ و احتجت تقف
و لكننا نعود و نقول ان الافضل " من وجهه نظري للسياره دي هو الموتور ال 1500 " هيكون اهدي عليها و مناسب لوزنها اكتر و مناسب لنظام الفرامل بها و هتكون سريعه برضه و مش زي الطلقه كده حتي مننساش ان لوحه العدادات الي بالفيرنا هي الخاصه ب 1500 لان الموتور ال 1600 سرعته القصوي تصل لحوالي 220 و بالبحث في المنتدي هتلاقو فيديوهات كتير لعربيات عدت ال 200 و المؤشر كمل لتحت !!!

صوت الموتور نفسه هادي و لكن يظهر صوته في الفيرنا لقله العزل الموجود بالكبوت و الدليل اركب الماتركس و الجتز و مش هتسمعه خالص مع انه نفس موتور لفيرنا

تأثير التكييف ممتاز و تاثيره على العربيه بسيط جدا بالمقارنه بعربيات تانيه كتير هو طبيعى انه بياثر على ادء العربيه لكن تقدر و انت مشغل التكييف انك تعمل كل اللى انت عاوزه بعكس عربيات تانيه بتحس انك راكب بطه

استهلاك البنزين حوالي 10 كيلو لكل لتر تقريبا بالتكييف و هي نسبه معقوله بالنسبه لعربيه 1600

الفتيس

وضعيته مريحه لليد و خصوصا لو العربيه فول اوبشن مع موجود مسند اليد

اول ماستلمت العربيه حسيت فيه بخشونه لكن بالتدريج بقي تمام جدا حبيت بس اذكر المعلومه دي علشان فيه ناس بتقلق من النقطه دي بعد ماتستلم العربيه
ملحوظه :العربيه تصل لاحسن اداء ليها علي 5000 كيلو يعني قبل كده ممكن تلاقي حاجات مش مظبطه او الاستهلاك عالي عن المعدل الي كاتبه او الصوت عالي متقلقش زي مالناس فعلا نصحتني و فعلا لقيته ان فعلا العربيه بتبقي حاجه تانيه خاااااااااااالص

نظام التعليق

العربيه عفشتها يعتمد عليها فعلا و هو مايفسر اقبال سائقي التاكسيات عليها و خصوصا بالاقاليم المشتهره بالطرق المكسره هي ممكن تكون ناشفه شويه بس يعتمد عليها فعلا
و ده بسبب اعتمدها على نظام التعليق المنفصل لكل عجله فى الخلف المعروف ب ماكفريسون macpherson
العفشه فعلا من كلام اصدقاء كثيريين معهم السياره منذ فتره كبيروه و قطعوا بيها كيلو مترات عده يعتمد عليها بجداره

لكن ما يعيبنا هنا هو ان العربيه منخفضه و سهله الحك في اي مطب لو كان حد قاعد علي الكنبه و ده سببه الشكمان المصري المنتج بمصانع ابو اليزيد و الي منجحش من وجهه نظري يصمم شكمان كمثيله الكوري بحيث يكون صغير الحجم و بالتالي يقل الاحتكاك في المطبات
لكن برضه ولله الحمد الفيرنا مصفحه من اسفل فمتقلقش اوي من الاحتكاك مش هيضر بالعربيه
ارجحها في قوه العفشه عن اللانوس و اللاسبيرانزا
لكنها من حيث موضوع ارتفاعها عن الارض و الحك و حلافه الافضليه للانوس و الاسبيرانزا

الباور

هيدروليك متوسط النعومه يتيح لك التحكم بكفائه في السياره

الفرامل

هي لا تتتناسب مع الموتور ال 1600 و قوته الصراحه لكن ادائها معقول (لكن فى سرعات حتى 120 جيده و الاداء متميز فى الفرامل احسن من الانوس بكثير و يمكن ملاكها نفسهم اشتكوا منها كتير لكن بعد 120 سيئه )

الثبات

بعكس مايقال عن السياره اري ان ثباتها معقووووووول جدا حتي 120 و بعد كده يأخد في الانخفاض و اعتقد انه بيبقي في الضياع بعد ال 150
بس قبل ماحد يعترض علي كلامي
ممكن حد يقولي ايه الطريق الي يتمشي فيه علي اكتر من 120 في بلدنا و متلاقيش فيه نئره و لا مطب و لا حد بيعدي الشارع ادامك

المناوره بالعربيه و التحكم رائع حتي سرعه ال 100 و يأخد في الانخفاض بعد ذلك
و لازم نحط في الاعتبار ان دي سياره مدينه لا هي سياره طرق سريعه و لا سياره سباقات فمش مطلوب منها اكتر من كده و عامه الي عاوز يجري اكتر من كده يا يجنط و تأثير التجنيط حلو جدا مع الي جنطو خصوصا جنوط 14 يا يركب عربيه اكبر

الابعاد

العربيه سهله القياده جدا و ابعادها واضحه الكبوت مرئي للسائق لكن الشنطه غير مرئيه عامه ابعادها من السهل جدا جدا التعود عليها و مش هتاخد وقت فيها و اعتقد انها افضل من اللانوس و الاسبيرانزا في النقطه دي

الوسع الداخلي

في الامام مفيش مشاكل واسعه و وضعيه قياده مريحه الخلف يعبيها الضيق " مقارنه باللانوس و الاسبيرانزا" هي تشيل 3 اه بس مش هيكونو مرتاحين

المقاعد

مصريه و مش مريحه اوي لكنها تعطي وضعيه قياده جيده و بالطبع مزوده بامكانيه تعديل مستوي الظهر و مستوي بعد الكرسي عن عجله القياده ( لكن قعدتها اريح من الانوس و الاسبرنزا بشهاده من ملاك السياره نفسهم )

الشنطه

واسعه جدا اوسع من شنطه اللانوس " تشعر ان مصمم الفيرنا اهتم بالشنطه علي حساب الكنبه و مصمم اللانوس اهتم بالعكس "
يوجد ذراع فتح الشنطه من الداخل في الفول اوبشن و لايوجد في الهاف
و يمكن ثني الكنبه الخلفيه لتوسيع الشنطه
الاستبن و الكوريك في مكانهم المعتاد اسفل السجاده

التكييف

ممتاز جدا في تبريده
طبعا بكر مش تاتش بكل الخصائص العاديه دوره هواء مفتوح ام مغلقه بارد/ساخن الهواء للوجه او للوجه و الارجل و هكذا
التأثير علي السحب بسيط لقوه الموتور

الاضائه الداخليه

عدد مصباح واحد في منتصف السقف متوسطه القوه و غير مزود بمصابيح للقرائه في الهاف و مزود ه بها في الفول اوبشن

مساحه التخرين الداخليه

عدد 2 درج بالتابلوه و 3 بالهاف اوبشن اذا حسبنا مكان ساعه التابلوه مساحه تخرين " الصراحه بحط فيها المناديل J "
و مساحتين بالابواب الاماميه

النظام الصوتي

الهاف اوبشن كاسيت شرايط ماركه رودستار متوسط الجوده
الفل ابشن سي دي رودستار متوسط الجوده ايضا
الكاسيتات دي طبعا مصريه التقفيل

السماعات انتاج شركه جولد ي تقريبا هي عامه مصريه و بصراحه غير جيده

العزل

متوسط الكفائه بالنسبه لعزل الطريق لكن صوت الموتور مسموع بوضوع لضعف عزل الموتور

الاطارات

اما اطارات نسر مصري
او لاسا تركي
و انصح بتغييرها
غير جيده

المشكلات التي واجهتني علي مدار سنتين من الاستخدام من يناير 2008

1ظبط زوايا و ترصيص
2الكاسيت علق مره و تم تصليحه
3تغيير التيل " عيب صناعه "


صور اخري للسياره

الاستيكر علي الزجاج الخلفي

الفانوس الامامي و الخلفي


مقدمه الفيرنا

و بس كده

ارجو ان اكون قد اعطيتكم فكره عن السياره محاولا باقصي ماعندي الحياديه
و لاي تساؤلات عن السياره يرجي زياره موضوع
دليل شامل عن الفيرنا بواسطه اسئله الاعضاء

[caution] الموضوع حصري لنايل موتورز و لايسمح بالنقل[/caution]