الموضوع: حوار ودي حول تخصص المنتدى

المشاركة الأصلية كتبت بواسطة karim_monir

استاذ بحري
كون اني انتقد سياسة شخص غير اني انتقد شخصة
الاول ده انتقاد فعل
الثاني ده شخصنة
لما اقول المسئول عن تخطيط ميدان رمسيس ده اخطأ وكان المفروض انه يعمل كذا وكذا هو ده النقد البناء
نقد مع اقتراح حلول او توجيه دعوة لعصف ذهني من الاعضاء
لكن لما اقول ان مسئولين المرور دول ولاد تيت وتيت عشان خلونا نقف 4 ساعات في الميدان هو ده الشخصنة
يا ريت تكون النقطة وضحت

الأخ الفاضل كريم
أولا ألف شكر على ردكم الكريم وعلى استجابتكم ودمج الموضوعين ونسأل الله أن يوفقنا جميعا للخير

أنا موافق تماما لكلام حضرتك في هذه الجزئية و الأسلوب ده بالفعل هو الأسلوب البناء واللي ممكن نستفيد منه كلنا وتستفيد منه البلد مش مجرد الشتيمة لتنفيث الغل والغضب وخلاص وكل حاجة تفضل زي ما هي

حتة من أخوك بأه
عندي سؤال تعليقا على إجابة حضرتك وعاوز أطرحه ومتردد فهل ممكن تديني الأمان ولا أطرحه وخلاص واللي يحصل يحصل وعموما هو في حدود المتفق عليه ومفيهوش شئ خارج السياق
يعني سؤال موظف كويس في إطار السيناريو الدرامي...
أأأقصد المناقشة الودية

ألف شكر يا أستاذ كريم وده المتوقع من شخص محترم زي حضرتك
وحقيقي بتحرجني بذوقك لدرجة إني بافكر ما أقولش السؤال
ولكن عموما أقوله وربنا يستر

طيب حضرتك ذكرت على سبيل المثال (المسؤول عن تنظيم المرور في ميدان رمسيس)
فهل نفس الأمر يمكن تطبيقه عند ذكر المسؤول عن تنظيم المرور في المرور في البلد كلها
(أظن السؤال واضح)

المشاركة الأصلية كتبت بواسطة karim_monir

ربنا يكرمك ويجازيك كل خير
والله انا وانت وبقية الاعضاء المحترمين من اعضاء المنتدى ربنا سبحانه وتعالى يسر لنا مكان نجتمع فيه في الله
بهدف الافادة والاستفادة وتقضية الوقت فيما ينفع ويرضى المولى عز وجل
وانا وانت وبقية الاعضاء برضه عارفين ان الديموقراطية في بلدنا لسه ما اتحققتش بشكل كامل ومباشر
وان في ناس فوق النقد
وان نقدهم يعرضنا لمشاكل كتير خاصة انه هايكون نقد شخصي
ولو قولت ده نقد لصفتة فده هايجربعض مدعى الشهرة للطعن في شخصة
ونخالف قوانين المنتدى
ونخالف قوانين الدولة
ويتقفل المكان الجميل اللي بيضم النخبة الرائعة دي

كلام حضرتك هادئ جدا وجميل جدا والصراحة أنا تأسرني الشخصيات الهادئة العاقلة التي تقول ما تريد قوله دون تشنج أو ضجيج
وأنا موافق تماما على كلام حضرتك وربنا يوفق الجميع للخير ويعينك ويعين بقية المشرفين على المحافظة على المنتدى وعلى استقراره

المشكلة الحقيقية زي ما حضرتك قلت إن في ناس كتير لا تستطيع إسداء النصيحة إلا بأسلوب جارح وهذا أمر غير لائق سواء كانت هناك ديموقراطية أم لا لأن النصيحة ينبغي أن تكون بأدب وإحسان على أي الأحوال
وفي المقابل ينبغي أن يتقبل الإنسان النصح بصدر رحب ويستجيب له لأن غياب الاستجابة للنصح هو ما يؤدي إلى الكبت عند الناس وأول ما الواحد بيلاقي فرصة زي النت مثلا تلاقيه بينفجر وبيقول كلام خارج عن الأدب واللياقة
قصدي إن المسؤولية مشتركة بين الحاكم والمحكوم
وعموما الطريق لسه طويل ومحتاج صبر ولازم نتكاتف من أجل رفع سقف الإصلاح وتصحيح الأوضاع في حدود الأدب والإمكانيات المتاحة وواحدة واحدة ربنا يفرجها وتتصلح أحوالنا
وبرضه مينفعش نكون ملكيين أكثر من الملك ونكتف نفسنا بإدينا طالما في متسع في بعض الأمور

شكرا مرة تانية لتجاوب حضرتك وضروري نتقابل إن شاء الله سواء كان في مقابلة القاهرة لو ظروفي تيسرت أو لو نزلت إسكندرية تشرفنا ونقوم معاك بالواجب