ممكن مساعده فى إختيار السياره المستعمله الأفضل ؟

**Adham** · 21-10-2007 11:40 PM

اللي قاللك كدة كان قصدة علشان فيها بخاخ كهرباء, بس البخاخ الكهرباء اللي بينزل في كاربراتير الجولف دة على ما اظن بيشتغل عالسرعه العالية لكن مش في العادي و السيلانسية, ممكن تسأل حد عندة جولف او يقولنا إجابة مؤكدة

بس انت لو جبت عربية كاربراتيرها عادي مش ببخاخ كهرباء مايبقاش عندك المشكلة دي, ولو اني مش شايف انها مشكلة اصلا

عارف فكرتني بحاجة, زمان كان عندي شيروكو (موديل فولكس فاجن شبة الجولف قوي في كل شيء في الموتور و العفشة وهو اصل العربية الكورادو ) وكان فيها موتور 1800 كنت جايبة استيراد من الشيخ ناصر في بورسعيد قبل ما يفتح في الحرفيين سنة 96 و بعدين بعت العربية دي و بعد شهرين قابلت اخو اللي اشترى العربية دي و قاللي انها مطلعه عنيهم, استغربت قوي لأن العربية دي كانت 100% فسألتة لقيتة راح لميكانيكي اقنعه انالاسبراتير الالكتروني دة زبالة و ان العربية ممكن تقف بية في اي وقت لو قطع قام قطعلة الاكس بتاع الأسبراتير و جابلة اسبراتير فيات و لحمهولة في الاكس وشغل بية الموتور, و طبعا كان فية رفٌة في اكس الاسبراتير فا مش شغال صح و عمال يكسر شواكيش و كل اسبوعين يجيبلة شاكوش و مطلعه عينة من يوم ما اشتراها و مقتنع ان الميكانيكي عمللة الصح علشان يعالج عيب موتور العربية دي, و للعلم لقيتة كمان مش بيغير زيت الموتور خالص من يوم ما اشتراها مني و لقيت زيت الموتور اسود زي وخفيف زي العرقسوس بجد صعبت عليا قوي العربية دي و حسيت اني فرطت فيها لبني آدم كان كبيرة يركب حنطور

المهم انا قصدي من القصة دي ان فية ميكانيكية قديمة عايشة في ايام الجنية الجبس و مقتنعه ان الانجكشن و الاسبراتير الالكتروني دي اختراعات فاشلة و لا تصلح في بلدنا و ممكن توقف العربية في اي وقت و تتصلح بس في التوكيل و بيقنعوا الناس بكدة

ماتمشيش ورا الفتاوي دي, وربنا يوفقك في عربية كويسة تريحك و يكفيك شرها

**M_HaFeZ** · 23-10-2007 01:17 PM

الف شكر ليك ياستاذ احمد ولنصايحك ياستاذ ادهم وعلى فكره اللى قالى الكلام ده مش ميكانيكى ده واحد قريبى وهو مهندس على فكره وشاب اى نعم خبرته مش سنين بس حياته العربيات علشان كده حبيت اساله

كلامك والله جميل ياستاذ ادم :) بس ياريت افهم من الموضوع ده ايه يعنى لو العربيه ايه مغيروش :) معلش اخوك جديد خالص

**Adham** · 23-10-2007 02:35 PM

غريبة ان مهندس ويقول الكلام دة !!!

معلش مش فاهم قصدك ياريت توضح السؤال

**M_HaFeZ** · 23-10-2007 02:45 PM

اقصد ان حضرتك دخلتنى فى اشياء فنيه جدا وانا على حد معرفتى هو نوعى الموتور الكاربراتير القديم والانجكش الجديد لكن التغيير اللى اشترى منك العربيه عمله كان غلط ووبال على العربيه فبس حبيت اعرف ايه اللى مفروض يكون فى الكاربراتير علشان لما اشترى وميكونش حصل فيه زى مالميكانيكى عمل مع الراجل اللى اشترى عربيتك اتمنى انى اكون وصلت وجهه نظرى

**Adham** · 23-10-2007 02:55 PM

والله يا باشا انا من الناس اللي مش بيؤمن بالتعدلات الافتكاسية بتاعه الميكانيكية زي ما قلت لك

علشان كدة انت تبص ولو معاك حد عندة عربية زي اللي بتشتريها او عندة خبرة يبقى احسن, و تشوف الاسبراتير و الكاربراتير او الانجكشن و ممكن ميكانيكي يقوللك عالكاربراتير ان كان بتاع العربية و للا مفتي فية و مركبين مثلا كاربراتير فيات مكانة
اة و الله في ميكانيكي يفتي و يقنع زبون و يركبلة كاربراتير 127 مكان بتاع العربية علشان توفر بنزين :roll:

و لو تحب مشورة فنية مني انا تحت امرك لو انت ساكن او قريب من مدينة نصر عدي عليا بالعربية ابصلك عليها بصة, انا كان عندي عربيتين جولف و شيروكو من سنين و افهم فيهم و في مواتيرهم و حالاتهم و فتايسهم كويسو الحمد لله

و عامة برضة يستحسن انك تكشف كويس عند حد مضمون مركز خدمة تعرفهم يكونوا نضاف و موثوق فيهم و مش بتوع عك و افتكاسات من اللي بالي بالك

**M_HaFeZ** · 23-10-2007 05:19 PM

ربنا يكرمك ياهم باشا وربنا ييسر وقت ماحضر الفلوس ان شاء الله هاقولك

**gad_fcis** · 23-10-2007 06:03 PM

والله ياجماعة الالمانى تحفة بس ساعة لما تفتح بقها مين عالم هيتسد ازاى انما لو اكسيل اكيد هتعرف تلم الموضوع وده الميزة الجامدة اللى انا شايفها فى الاكسيل

**eng_mkhalaf** · 24-10-2007 02:15 PM

يا جماعة أنتم بتتكلموا فى أية جولف طبعا بس أبقى شيك عليها جامد علشان الشباب مبهدلين العربيات كلها وبالنسبة لقطع الغيار متقلقش أنا هظبتك أن شاء اللة
باب الشنطة بالزجاج 120
باب السواق بالزجاج 70 جنية
وكلة إلمانى
موتور 1600 بالفتيس والعفشة والتكييف 4500 وتركيب 500 جنية فى يومين
عايز أية تانى

**M_HaFeZ** · 24-10-2007 04:11 PM

انت راجل جامد والله يا بشمهندس خلف وعلى فكره انا لى زميل مهندس برضه واسمه محمد خلف بس اكيد مش انت :) ده طبعا لو اسمك كان محمد :-)

**احمدعبدالعزيز** · 17-01-2008 11:16 AM

الجولف سياره اكثر من ممتازه لوبنتكلم عن الثبات فهو نادر فى الزمن الجميل ده .
الصاج متين - عفشه قويه - صالون واسع - اما عن قطع الغيار الغاليه فهى معمره جدا وتمنها فيها .