الموضوع: النترا - لانسر شارك

طب دي مقارنه بين الالنترا md و سيفيك الجيل التامن عن تجربه عشان محدش يقول اني بفتي
1-الشكل الهوندا
2-متانة الصاج واحده
3-الارتفاع عن الارض الهوندا تكسب تخيلوا الالنترا بتحك اكتر
4-الثبات اظن مافيش كلام ان الهوندا تكسب الالنترا بعد ال 140 حسيت اني خايف
5-التكييف الهوندا بس الالنترا تكييفها كويس
6-الراحه و وضعيه القياده و متعة القياده الهوندا
4-الصالون و التابلوه الهوندا
5-وسائل الامان طبعا هوندا (4 ايرباج -abs-ebd-multilink)
6-سحب الموتور للامانه فيه كلام
طلعة الالنترا تخطفك لدرجة انك هتحس انها بتطلع حصان غير طلعة الهوندا اللي كويسه بس الالنترا حاجه تانيه
على الطريق لغاية ال 80 الالنترا بتتفوق بسبب الطلعه السريعه على 100 الهوندا هتجيبها على 120 هتكون عديتها بعربيتين على 140 الالنترا مش هتشوف الهوندا خالص و ده في حالة الشد من الثبات لو من الحركه الهوندا هتعدي من ال 90
وعلى فكره الكورولا 2006 بتعدى الالنترا md بعد ال90 و عن تجربه عشان لسه واحد كسر عليا و عربيتي الكورولا سحفت فشتمته فجاب D3 زي حالاتي عشان يلبسني قاصد و برضه فرقت
وفي النهايه برضه الالنترا مش وحشه بس لازم برضه تاخد وضعها و هي حلوه للي عايز حاجه من ريحة الياباني

نسيت اقول الكورولا 1300 اوتوماتيك

السحب على الأوفرتراكينج إجمالا في مصلحة الشارك عن تجربة ... مع إني كنت بجرب الشارك الـ 1500 كمان 4 سرعات اوتو ... بالتالي أتوقع الجديدة هتكون أحسن و أحسن ...

الراحة الداخلية .. أول مرة لانسر تتفوق على الإلنترا في الراحة الداخلية ... عن تجربة سفر يا جماعة كلام مافيهوش تحيز

الثبات ... فرق كبير في مصلحة الشارك

الصالون ... إلنترا صالونها أحسن .. لكن خاماته أي كلام ... الشارك صالونها خاماته أحسن لكن مش شبابي زي إلنترا

الشكل الخارجي ... على المستوى الشخصي بحب شكل الشارك جدا و إلنترا شكلها بالنسبة لي لا يليق إنها تكون عربية 2012 نازله تناهض الشارك و الفليوانس و المازدا !!!!!

أوبشنز الهاي لاين من الإلنترا 2012 أحسن شوية ( حاجات قليلة مش كتيره و ده كمان بسبب إن 2012 شارك هاي لاين أقل في الكماليات من 2011 هاي لاين )

الحاجة الوحيدة اللي عجبتني و انا سايق الإلنترا الجديدة عن الشارك إن قعدتها شوية واطية .. و أنا بحب و أنا سايق أكون قريب من الأرض و في نفس الوقت متابع أبعاد العربية كويس .. الشارك قعدتها مش وحشة لكن علشان أكون جايب أبعاد العربية كويس بكون عالي شوية و أنا بفضل القعدة اللي مش عالية دي ...

المشاركة الأصلية كتبت بواسطة bakkarahmed

انا بقي معايا الاتنين الالنترا بتاعتي والشارك بتاعه والدي بس نظرالتقدمه في السن فالعربيه معايا علي طول باختصار
اولا بالنسبه للشكل والصالون دي مساله ازواق وانا باستريح للالنترا اكتر وبيضايقني طابلوه الشارك ماعدا العدات تعتبر اجمل ما فيه
الوسع الالنترا افضل
الشنطه الالنترا ( الشارك شنطتها مسخوطه خالص)
الطلعه الالنترا افضل بس بعد كده شارك
الهاندلينج الشارك
النظام الصوتي الشارق تتفوق بمراحل
الشارك عربيه محترمه جدا جدا يكفي انك تعمل في يوم حوالي 800 كيلو شبه متصله في عز الصيف ولا تشعر بذره تغير في مستوي الاداء اطلاقا منهم اخر 100 كيلو كنت مشغل التكييف ومعايا والدي و اولادي وزوجتي وكنت ماشي علي 190 فتره وهما نايمين مش حاسسين يحاجه يعني لا هبده مطب ولا ولا هزه ولا صوت عالي والعربيه قمه في الثبات والهانديلين بتاعها ممتاز وبالرغم من ان الباور كهربا بس الدركسيون علي السريع صخره
المشكله ان الشارك ساعات بحس اتها ناقصها لمسه الكوري الحلوه بس

انت راجل محترم و منصف ...
و دي شهادة راجل يمتلك العربيتين و كمان عربيته الأساسية هي الإلنترا و الشارك هي الاحتياطية ، و فعلا الكلام ده كله أنا مجربه و تقريبا عندي نفس الأفكار و الشعور اللي عند حضرتك ...

بالنسبة للأستاذ tarekabosdera أنا شايف إن كلام حضرتك يا أفندم كله متعصب بطريقة زيادة عن اللزوم و الموضوع مش مستاهل .. و كلام حضرتك مش منصف بالمرة .. و أنا مش بشكر في الشارك ولا بقول عليها أحسن عربية ولا بقول على الإلنترا عربية زبالة ولا بشتم ولا بمدح في حد ... أنا مهندس ميكانيكا و متخصص في الاحتراق الداخلي و خبرتي بالعربيات الكوري أكتر من خبرتي بعربيات تانية كتير لإني اتدربت كمهندس في مركز صيانة هيونداي طنطا و مركز كيا كفر الزيات ، و كان الأولى إني أحب العربيات الكوري لما أدخل الأماكن دي .. عايز أقول لحضرتك إننا عملنا في أقل من شهر 28 لفيرنا 2009 و 12 لإلنترا 2009 - 2008 جايبين ماكينه ( يعني محتاجين على الأقل عمرة أو تسقيط موتور جديد بجير بوكس ) و 40 ديسك و اسطوانة لإلنترا 2008 - 2009 - 2010 .... عايز أقولك إن نص الأرقام دي ماحصلش في مركز صيانة كيا .. فانا مش عارف حضرتك على أي أساس بتقولي عمرها طويل و كلام كتير من ده و أنا مهندس و حافظها من جوه !!!!
هيونداي كترتيب تتفوق فعلا خصوصا من 2009 بس ده مش علشان إلنترا ... ده علشان عملت جينيسس و إكواس و خدت فعلا جوايز عالمية في المواتير بتاعت الموديلات دي و للعلم المواتير دي كلها جايه من مراكز خبرة في ألمانيا تابعه لمراكز بحث هيونداي .. يعني اللي حاطين المعادلات بتاعتها ألمان مش كوريين كمان .. غير كده هيونداي مافيش أي إنجاز عملته على المستوى العلمي و الميكانيكي أبدا علشان تقول فيها كل الشعر ده ... مازالت سامسونج و كيا تتفوق على هيونداي في الأمان و الثبات و أنظمة التعليق في كل الإصدارات إجمالا من واقع تقارير عالمية و خبرة و تجربة شخصية .... و برضه الجينيسس و الإكواس من هيونداي لو قارنتهم بأي أي عربية في فئتها السعرية أوروبية أو يابانية أو أمريكية يبقى انت كده بتمسح بكرامة العربيات دي الأرض بمعنى الكلمة و الفيديوهات على اليوتيوب مرطرطه ( مقارنة عربية بعربية بعيدا عن الكماليات و الأوبشنز و الشكل و التصميم و شغل العيال ده ) ....

بعيدا عن كلام المهندسين ... العربيات اللي مع عيلتي يعني اللي أنا سوقتها و بسوقها من و انا في ابتدائي لحد النهارده من كل الماركات ( ألفا روميو - ميتسوبيشي - تويوتا - بي إم - مرسيدس - جيب - هيونداي - كيا - سامسونج - شيفروليه - نيسان - فيات - بيجو - فولكس - أوبل - ......... ) فده برضه مازال رأيي كواحد مجرب العربيات دي و بيحب دايما يشوف الجديد و بحاول أكون منصف والله مافي بالي أتحيز لياباني أو ضد كوري لإني مش هستفيد حاجة ... فأغلب اصدقائي الشخصيين اللي بيقولوا شعر في الكوري غالبا لما باجي أسئلهم انت ركبت إيه غير العربية دي بيسكت أو بيقولي عربية كوري تانية أو عربية قديمة أوي معتقه مش كوري .. بالتالي حكمه مش منصف لإنه ماجربش و كمان مش خبير في السواقة أصلا ...

آسف يا جماعة على الإطالة لكن فيه كلام كتير أوي في الموضوع ده نرفزني ... و أنا لا بقول على الإلنترا زبالة ولا بقول على الشارك واو ........ أنا قولت رأيي قبل كده في الموضوع ده مليون مرة لكن مايصحش يكون عندنا التحيز الأعمى ده لأي عربية أو لأي صناعة ... مقارنة عربية بعربية إلنتر هتكسب في نقط و لانسر هتكسب في نقط تانية و كل واحد يختار اللي يرتاحله و الموضوع بسيط .. لكن ماحدش يجي يقولي ده لانسر دي أفخم ماركة ولا حد يقولي ده هيونداي دي حاجة وهمية ماحصلتش !!!!!