الموضوع: دليل نايل موتورز السياحى

المشاركة الأصلية كتبت بواسطة hossam_hassan

هبتدى بمدينة الغردقة:

1 - الطريق : احسن طريق هو طريق القطامية - العين السخنه و مدخله من الطريق الدائرى بعد كارفور بحوالى 5 كيلو و تقسيمة الطريق من القاهرة للغردقة كالأتى (القطامية - العين السخنه المسافة حوالى 120 كم و السرعة القصوى 120 و توجد بنزينة وطنية فى أول و منتصف و أخر الطريق) ثم (العين السخنه - الزعفرانة المسافة حوالى 70 كم و السرعة القصوى 90 و توجد بنزينة مصر للبترول فى أول الطريق و بنزينة التعاون فى الزعفرانة) ثم (الزعفرانة - رأس غارب المسافة حوالى 120 كم و السرعة القصوى 90 و توجد بنزينة موبيل فى رأس غارب) و أخيرا (رأس غارب - الغردقة المسافة حوالى 100 كم و السرعة القصوى 90) و مدخل الجونة قبل الغردقة بحوالى 23 كيلو، كل الطريق حلو و اتجاه واحد و العجل مش كتير ما عدا المسافة من العين السخنه - الزعفرانة اتجاهين و ياريت محدش يستعجل فيها لأنها خطر.

2 - المدينة : الغردقة مدينة جميلة و اسعارها معتدلة، يعنى ماتفرقش حاجة عن القاهرة، تنقسم الى جزئيين أساسيين (الدهار) و دى منطقة سكن أغلب سكان الغردقة من عائلات و موظفين و عاملين بالفنادق و هناك تحس انك فى احد الأحياء الشعبية و شوارعها نظيفة و متسفلتة و بها بعض الفنادق المتوسطة من 2 - 3 نجوم و لو عاوز اقامة نضيفة بسعر معقول فى فندق أو شقة يبقى هتلاقى طلبك هناك و فيها كمان شارع الحجاز اللى فيه ورش الميكانيكا و كل ما يتعلق بالسيارات بس مش هتلاقى غير 5% صنايعية كويسين علشان أغلب العربيات فى البلد جديدة. الجزء التانى من المدينة هى منطقة (السقالة) و بتمتد من ميدان السقالة حتى مطلع الهضبة مرورا بالشارع الرئيسى بالمنطقة و هو شارع شيراتون اللى بيضم مجموعة كبيرة من البازارات و المطاعم و الفنادق و هو بالأضافة للشوارع المتفرعة منه يعتبر المقر الرئيسى لمكاتب شركات السياحة و المكان المفضل لسكن الأجانب العاملين بشركات السياحة و الفنادق، و على فكرة الغردقة فيها ميزة جامدة وهى ان اللى مامعاهوش عربية يقدر يتنقل بسهولة بالميكروباصات بس هى مش زى ميكروباصات القاهرة بتبقى انضف و اجدد و اسعارها كويسة، يعنى بجنيه تجيب البلد من أولها لأخرها.

3 - الأقامة: الغردقة مدينة شتوية، يعنى لا انصح اى حد يروحها فى الصيف لأن الجو بيبقى ناااااااااااااااااااار، لو بتنزل فى فنادق هتلاقى تنوع كبير و اسعار كويسة (مقارنة بشرم الشيخ) و على قد ميزانيتك هتلاقى طلبك بس ماتسافرش من غير حجز ولو تحب تأجر شقة برضوا هتلاقى طلبك باسعار مقاربة للأسكندرية و الغردقة فيها 8 شواطىء عامة كويسة جدا كمواقع و نضافة.


4 - الأكل و الفسح: أحلى حاجة فى الغردقة ان كل واحد بيلاقى الفسحة اللى تناسبه و على حسب امكانياته و ده علشان التنوع اللى فيها و علشان فيها عائلات مقيمة هناك مش زى شرم الشيخ اللى كل حاجة فيها معمولة على مقاس الأجانب، المهم انصحكم تقضوا يوم كامل للصيد فى البحر و مش لازم عن طريق شركة أو فندق، روح الميناء السياحى و رتب مع ريس مركب قبلها بيومين و ممكن يضمك على مجموعة، أما بالنسبة للأكل فمتفوتوش المطاعم دى

- بيتا سفينكس: أكل على كل زوق جميل و نضيف قوى، متفرع من شارع شيراتون/ الشارع اللى على ناصيته مكدونالدز.
- أسماك الميناء أو الجوكر: الأتنين قريبين من بعض فى ميدان السقالة و أسعارهم زى بعض بس الميناء قعدته و خدمته احسن.
- بولز: مطعم امريكى و ايطالى بعد منزل الهضبة قبل الماريوت، زى تشيليز و البيتزا هناك ايطالى اصلى
- فول أبو أية: شارع شيراتون قبل ميدان عروسة البحر، كل و ادعيلى انا و ابو اية :d :d :d


يا ريت أكون قدمت معلومات مفيدة و لو حد عنده أى أسئلة أنا فى الخدمة.

أحب بس اعمل تحديث لبعض المعلومات:

- السرعة القصوى فى المسافة من الزعفرانة للغردقة بقت 110 كم فى الساعة.
- للأسف مطعم أسماك الميناء مستوى الخدمة نزل و اسعاره عليت بدون مناسبة، يعنى كيلو الجمبرى الجامبو عنده بقى ب 300 جنيه مع ان نفس الحجم و النوع عند الجوكر ب 180 و قيس على كده كل الأسعار و على فكرة الجوكر كمان عمل تجديدات و الخدمة عنده اتحسنت و بقت اسرع.
- مطعم أسماك جديد فتح قدام ميناء الصيادين اسمه الحلقة، يعتبر كويس من ناحية الجودة و النضافة و الاسعار و يميزه ان الاولاد اللى شغالين فيه تحس انهم حابين المكان و بيهتموا بالزبائن بجد.
- فى مطعم اسمه كل و حلى موجود قدام مبارك 5 عند بنزينة التعاون، بيقدم اكل شرقى بسيط، فول و طعمية و شكشوكة و الخ الخ، المطعم فى قعدة كويسة و ممكن تيك اواى و اسعاره تعتبر ممتازة علشان الاكل حلو و فى اعتناء بالنضافة.
- البيتزاريا اللى فى فندق بيلا فيستا رجعت زى زمان و اللى عاوز ياكل بيتزا ممتازة ممكن يجربها.


الهم بقى ان الصيف السنة دى مش قد كده و الفنادق بتهاود فى الأسعار، يعنى اللى عاوز يروح الغردقة انصحة يستغل الفرصة و هتبقى فسحة كويسة ان شاء الله و على فكرة الجو هناك احسن من القاهرة، طبعا مش زى الساحل بس بيتهيألى هتتكلف اقل من الساحل و تستمتع اكتر.

المشاركة الأصلية كتبت بواسطة m.mosaad

واضح انك مرجع
الف شكر علي الوصف الدقيق

سؤال بقي انا ان شاء الله هحجز في مجاويش خلال العيد لان اسعارها كويسة كنت عايز اعرف هل مستواها كويس يعني انا عارف انها مش سوبر هي اربع نجوم بس ايه اخبار النضافه و الخدمه لانهم عاميلن عرض كويس و اقل كتير جداااااااااااااااا من العين السخنه اللي بيستهبلوا في اسعارها في العيد ؟

سؤال تاني و اعذرني علي الرخامه تنصح اروح بالعربيه و لا بالسوبر جيت يعني هل المواصلات مريحه بين مجاويش دي و المحلات و الشوارع اللي انت قلت عليها و لا اريح نفسي و اروح بالعربيه ؟

و شكرا مقدما علي اهتمامك

للأسف انا مدخلتش مجاويش من سنين و مقدر افتى، بس عموما فرق الاسعار بينها و بين العين السخنة مش دليل على فرق المستوى، الطلب على العين السخنة عالى جدا بس، بالنسبة للعربية فانا انصحك تيجى بيها، هتريحك و تخليك على راحتك خصوصا ان العيد هيبقى زحمة.

انا لسه جاى من شرم الشيخ وكنت حاجز فى تروبيكانا سي بيتش
المميزات
فندق كبير 4 نجوم
حمامات السباحه على مساحه 4000 متر
العاب مائيه
البوفيه ممتاز... فى محل داخل الفندق اسعار الميه ب 3 جند والكولا 1 لتر ب 4 جند يعنى اسعار عاديه
مستوى الغرف ممتاز جدا وتنظيف الغرف يوميا... الفندق فعلا نضيف جدا جدا لانه لسه مبقالوش غير سنه
فى كمان شاتيل باص من الفندق ل خليج نعمه مجانى بس مش كل الاوقات
العيوب
بعيد عن نعمه حوالى 22 كيلو
البحر مش حلو اوى

المشاركة الأصلية كتبت بواسطة r_gamal1

انا لسه جاى من شرم الشيخ وكنت حاجز فى تروبيكانا سي بيتش
المميزات
فندق كبير 4 نجوم
حمامات السباحه على مساحه 4000 متر
العاب مائيه
البوفيه ممتاز... فى محل داخل الفندق اسعار الميه ب 3 جند والكولا 1 لتر ب 4 جند يعنى اسعار عاديه
مستوى الغرف ممتاز جدا وتنظيف الغرف يوميا... الفندق فعلا نضيف جدا جدا لانه لسه مبقالوش غير سنه
فى كمان شاتيل باص من الفندق ل خليج نعمه مجانى بس مش كل الاوقات
العيوب
بعيد عن نعمه حوالى 22 كيلو
البحر مش حلو اوى

طيب أسعاره إيه

المشاركة الأصلية كتبت بواسطة n.y.s.m.a

طيب أسعاره إيه

الغرفه الدبل 600 جنيه الليله فطار وعشاء اوبن بوفيه وكمان زودو سرير صغير ل بنتى من غير اى مصاريف زيادة
الغرفه ال تريبل 870 الليله