الموضوع: دليل نايل موتورز السياحى

المشاركة الأصلية كتبت بواسطة d . A .\ ayman

العريـــــــــــــش


بصراحة العريش مدينة جميلة وهادية كتير عن كل مدن مصر الساحلية اللى روحتها يعني البلاج بتاعها تلاقيه رايق جدااااااااااااااااااااااا ااااااااااا ودي أحلى حاجة فيها بصراحة

الطريق :

هوة هوة طريق بورسعيد لغاية متوصل لكوبري مبارك السلام اللى قال عليه الأخ modux

يعني بإختصار

بعد الكوبري "ماتنساش وانت على الكوبري تمشي بالراحة عشان تعرف تتفرج على القناة وهية تحتك وياسلام لو فيه سفن معدية بيبقى شكلها لذيذ بس لو السفن ذات طبيعة عسكرية أمريكية مثلا "الكوبري هايتقفل لغاية ما تعدي"

المهم كنا بنقول ايه .. آه ... بعد الكوبري هاتمشي شوية لغاية البوابات وبعدين هاتدخل شمال تبقى القناة على شمالك والصحراء على يمينك ... من هنا يجماعة الطريق هايبقى تحفة فاضي خالص ونضيف جدا بس خدوا بالكوا من الملفات لآن لو سايق بالليل مش بتبان نهائي ودي أوحش حاجة فيه

المهم هاتفضل ماشي على طول حوالى 20 -30 كيلو لغاية ماتلاقي ميدان صغير فيه تلات تفريعات
1- على طول : لغاية بورسعيد من الناحية التانية "ناحية بورفؤاد كده"
2- شمال : هايوديك للقنطرة شرق ودي فيها معدية لو عايز تعدي تاني لطريق بورسعيد ودمياط " وعلى فكرة دي كانت الوسيلة الوحيدة لعبور القناة قبل كوبري مبارك السلام "
3- يمين : وهوة ده اللى احنا عايزينه : للعريش حوالى 150 كيلو من القنطرة وأيام ماكنت بروح كان الطريق بيتعملله ناحية تانية أكيد طبعا خلصت دلوقتي وبقى اتجاهين وعلى فكرة الطريق جميل جدا بس هاتقابل بعض القرى البدوية فيه وممكن تلاقي وانت ماشي عند القرى دي عربية نص نقل أجرة عاكسة الطريق السريع وجاية في وشك أو عيل بيعدي ومش شايف حاجة قدامه فخللى بالك عشان تهدي عند القرى شوية أنا بصراحة مش فاكر أسامي القرى بس هما حوالى خمسة أو ستة منهم واحدة أسمها بير العبد دي فاكرها عشان كان واحد معانا منها

طبعا انت بتشوف وانت ماشي النخل الموجود في تجمعات متقاربة أو متباعدة طول مانت ماشي ومنظر الصحراء المتفرد اللى مش موجود في أي حتة تاني غير في سيناء بمرتفعاتها الكتير جدا ( آه خللى بالك عشان ممكن وانت ماشي تلاقي حتة في الطريق رمل الصحراء دخل عليها شوية وده مش ذنب حد بس الصحراء في سيناء كده مش طبيعية )

وعلى فكرة هاتقابلوا وانتوا ماشيين طريق بيدخل على بحيرة البردويل للى عايز يجيب سمك لسة بيلعب بس انا ماجربتوش ولا مرة لأني حسيت انه طويل شوية وانا كنت أيامها ياإما رايح الشغل ... ياإما راجع من الشغل ...... وبعد كده قبل العريش بشوية حوالي 40 كيلو في قرية كورال بيتش على البحر بس ماعرفش عنها حاجة لكن سمعت انها كويسة وبعد كده أول حاجة هاتقابلها في العريش قرية سما العريش ودي متواضعة شوية على حد علمي

بعد كده هاتقابل المساعيد ( انت كده دخلت العريش ) بس هية قبل العريش البلد بـ 15 كيلوا دي اللى انا كنت قاعد فيها لأن الإستراحات بتاعتنا كانت هناك
هاتقابل على شمالك نادي الشرطة المطعم بتاعة كويس في الصيف مش بطال وأسعاره كويسة
بعد كده هاتقابل القرية بتاعة المقاولين العرب والشرق للتأمين ودول أحلى قريتين في العريش بصراحة وفي بعديهم فندقين كبار على البحر واحد منهم هيلتون أو حاجة زي كده مش فاكر لأنه كان لسة متباع قبل مامشي من العريش على طول بس هوة برضه انضف فندق هناك وبعد كده طبعا العريش البلد وهية عبارة عن شارعين بس رئيسيين واحد داخل البلد والتاني خارج منها فيهم كل حاجة وممكن تلفهم كويس في نهار يوم واحد وفي فندق مكة بين الشارعين دول وقريب من البحر ده انا قعدت فيه شوية أسعاره مش وحشة والخدمه مش حلوة بس مش وحشة برضه وبصراحة أحلى حاجة فيه انه نضيف بس

بعد العريش بقى طريق رفح والحدود والميناء البري للى عايز يروح يشوفها حوالى 75 - 100 كيلو من العريش

المطاعم : بصراحة المطاعم عادية جدا ومش متميزة في واحد اسمه بطيبط وده مشويات وانا كلت فيه كام مرة كده ده في الطريق اللى جاي من البحر وداخل على العريش في التلت الأخراني منه واخد ناصية في حتة واسعة شوية على الشمال ... بس اللى أحلى منه واحد مش فاكر اسمه بس هوة في وشه الناحية التانية بشوية كده ده بصراحة اللى كان كويس جدا أكله كان حلو وهوة مشويات برضه

على فكرة معظم أهل العريش المدينة من الشرقية بالذات مش عارف ليه يعني مش بدو ولا حاجة .. وعلى فكرة كمان البدو هناك قريبين جدا من الصعايدة ومعظمهم طيبين بس اللى وحش فيهم وحش على حق وابن ....... كمان

نيجي بقى لأحلى حاجة خلبت لبى في العريش انك تاخد شاليه في حتة هادية زي المساعيد مثلا "اللى قبل العريش دي فاكرنها" وتقعد على البحر .... البحر رااااااااائع سواء بالنهار أو بالليل

عيبه ان فيه قناديل كتير جدا بس بتبقى في أول شهر سبعة تقريبا وغير كده قليلة وقرصتها وحشة بتكوي يعني خللى معاك زجاجة خل دايما على البلاج تدلقها على القرصة على طول بس انا عمري ماتقرصت منهم برغم انهم كانوا بيبقوا جنبي ساعات بس السائل بتاعهم بيعوم في المية ويلسعك لسعة خفيفة كده

أوحش حاجة في العريش ان مافيهاش مياة صالحة للشرب يعني عشان تشرب هاتقضيها مياه معدنية ( انا نص مرتبي مان بيتصرف على الميه) ... لكن الشاليهات اللى على البحر خط الياه بتاعها بييجي فيه ميه حلوة تقريبا ساعتيين في اليوم عشان تلحق تملى أي حاجة تحوش فيها للاستحمام وعلى فكرة كل الشاليهات هاتلاقي فيها جراكن جاهزة لكده

اخبار طريق العريش ايه دلوقتى ؟؟؟ يعنى فيه قلق و ضرب نار و لا ايه ؟؟؟
و متوسط سعر تأجير الشاليهات فى المواسم كام ؟؟

السلام عليكم

كنت عايز اعرف اروح ازاي شارع 302 المعادي او مساكن ضباط المعادي
وانا إن شاء الله هاجي صحراوي من اسكندريه

شكراا غعلا مواضيع جميلة ورائعة تسلم يابرنس

شكراا غعلا مواضيع جميلة ورائعة تسلم يابرنس