الموضوع: ..وسائل الحمايه والدفاع عن النفس.....موضوع للمناقشه....

انا بقى نفسيتي تعبانه جدااااااا من موقف حصلي النهارده
انا في الغالب مبعرفش امسك اعصابي بس في نفس الوقت مبمدش ايدي على أي شخص الاول الا اذا هو مد ايده عليا ودي محصلتش بقالها فتره كبيره اكتر من 5 سنوات
النهارده بقى حصلت
وزعلان جدا من نفسي اني مديت ايدي على شخص وكانت مجرد زقه ومنع انو يمد ايده عليا ومن غير شتيمه واحده ولا حتى لفظ سئ
انا مبخافش لكن جوايا بيحصل نوع من الخوف على نفسي
اخاف اتعور في وشي مثلا لاقدر الله (وان شاء الله مش هتحصل )

المكان كان في شبرا الخيمه ( وما ادراكم ما هذه المنطقه )
عبث وعدم نظام وعدم اخلاقيات وعدم وعدم من هنا لحد اسوان مثلا
بيئه متشرده ناس ضايعه في الاخلاق قذاره ما بعدها قذاره
الحمد لله طلعت من البيئه ( الحي ) ده وقدرت اكون لنفسي شخصيه محترمه تحترم في اي مكان بس للاسف بيتقال عليه غلبان لمجرد الاحترام اللي بيتفهم غلط
بجد النهارده ومن كام سنه متخانقتش فيها ومش عاوز اصلا ده حصل
وبسببها ضاعت مني نضاره شمس غالية الثمن
ومتدايق اوي وعمال بلوم في نفسي من اللي ورطت نفسي فيه ومحبش اني اكون بتخانق في وسط الشارع ابدا ولا حد يحس بيا ولا صوتي يعلى ( مسالم مسالم يعني )
بس بجد اكتشفت انو غلط والمسالم ده بيكون كتير اوي فريسه
والحق لازم يتاخد عنوه وباديا عشان محدش هيجيبو ليا
( معلش ان قلت افضفض عشان مخنوق جدااااااااا ) ومازلت

انا كان نفسي في اليكتريك او اي وسيلة دفاع غير ايدي عشان مكانش ليا نفس اضرب خااااااالص ولذلك منعت المتهجم عليا فقط

بصراحه وسيلة الدفاع هي أأمن حاجه للناس المسالمه

اسف اني غيرت الموضوع بس لاقيته بيشترك في اللي حصل معايا النهارده

الناس بقت شرسه جداااا ولسانهم عاوز القطع وتوقع اي حاجه من اي حد لذلك لازم وسيلة دفاع عشان البلد مبقتش مسالمه ومفيش اخلاق خالص بالعكس تماما
بس ياترى هو الواحد لازم يكون ليه سلطه عشان يعرف يدافع عن نفسو !!!! ( أكيد )

عموما قدر الله وما شاء فعل
حسبي الله ونعم الوكيل ( مليش غيرك يارب )
الجهل اتعمم وبقى الاساس ولا ايه مش عارف
الاخلاق انعدمت والسئ بقى قدوه ولا ايه مش فاهم

خير وسيله للهجوم الدفاع
ولازم وسيله للدفاع
ممكن طلب صغير ( منين اقدر اجيب الكتريك شوك ) انا هعمل سيرش على الاماكن على الانترنت وياريت لوحد يعرف مكان يقول عليه
شكراااا

المشاركة الأصلية كتبت بواسطة أشرف فتحى

انا متأكد ان ثمانين من الميه على القل مننا مسالم ومش بتاع مشاكل...ومش ممكن نتخيل اننا نمسك فى حد ونضربه....لكن لو الحد ده هو اللى جالك ومسكك وعايز يضربك .....هتعمل أيه؟
.

هاكسر دماغة
انا اللى يخلينى اتعب فى حياتى عشان احافظ على كرامتى و اعيش حياة كريمة و يجى حد ياخد منى كرامتى دى يبقى بيقتلنى

المشاركة الأصلية كتبت بواسطة Terrible_DaRsH

العكس صحيح :)

تصدق اه

اولا انا مختلف معاك يا استاذ اشرف فى الموضوع ده
موضوع الرد اللى انا رديته كان هزار وكان قصدى بالحته الاستعمال الصورة ( دبابة ) مش اربي جية :)
علشان اعتقد الموضوع مينفعش يتاخد الا انه هزار فى هزار

بعد ما قريت ردود كل الاخوة الاعضاء تعالى ابدأ معايا نتخيلها كده :
هتلاقى واحد عمال يلمع فى الطبنجه بتعته والتانى بيغير ماسورة سلاحه الصوت عشان يشتغل 9 مللى علشان يبقى زي ابو طبنجه
والتالت رايح يملى ازايز مولوتوف من البنزينه ومولع فيها فى طرفها وداخل على الخناقه يقول : وووووووووووسع المولتووووووووووووووووووو وووف
والرابع بيسأل عن تركيبة الشطه بالكحول والخامس شايلة عصاية بيسبول او معدن
والسادس خبط بنت ونازل يخوفها بسلاح الصوت راحت هيا نازلاله بالاليكتريك شوك وبتهوشه
تخيل بنت نازله من عربيتها تتخانق باليكتريك شوك والله حاجه تضحك ( اكيد بتخش عليه تهته وتقولة : بوووء اوعى لغذك )
وفوق ده كله واحد واقف فى البلكونه عمال يحشي فى قنابل ( محدش يزعل منى يا جماعه انا بهزر وده اللى تخيلته فى دماغى)

طبعا كل الكلام ده لازم يتاخد على انه هزار مش على محمل الجد علشان لو الكلام ده اتاخد جد وفكرنا فيه تبقى مصيبة سودا
معقوله احنا وصلنا للدرجة اننا ازاى نأذي بعض بالصورة دي ؟؟
معقوله كل واحد فينا عايز يمشي وشايل جوه هدومه خنجر يطعن بيه اول واحد يحتك بيه ؟؟
معقولة - وده الاهم - اننا بقينا بنبذل كل المجهود والوقت ده فى التفكير ازاى نأذي بعض ؟ وناسين عدونا الحقيقي اللى بيحاربنا فى كل حاجه سواء سياسيا او اقتصاديا او امنيا او حتى شوية الميه بتاعت النيل اللى بيوصلو لينا بيحاربنا فيهم بأقذر الطرق كل ده احنا نسيينه وعمالين نتربص لبعض ونفكر ازاي ننتقم من بعض ؟؟
بجد مش عارف أقول اية .........

فيه بعد تانى أحب أكلمك فيه يا استاذ اشرف وهي ( ثقافة السلاح ) يعنى ايه الكلمة دى ؟
معناها ان السلاح يتحول لثقافة ان كل انسان يمشي شايل سلاحه معاه سواء كان سيلف ديفنس او اليكتريك شوك او سلاح نارى او عصاية بيس بول او حتى سلاح ابيض
والثقافة دي بتبدي زى ما حضرتك فكرت كده بتبقى للدفاع عن النفس
لكن بعد فترة زمنية صغيرة بتتحول لثقافه انى لازم قبل ما اخرج من بيتي يبقى معايا سلاح
مش معقول يبقى كل الل ماشيين حوليا معاهم اسلحه وانا معييش على الاقل يكون معايا سلاح يحميني منهم
وده طبعا ليه اسوء الاثر على الحياة الاجتماعيه تلاقى كل واحد ماشي خايف من اللى جنبه ومتوقع منه الشر في اى وقت واللى جنبه عنده نفس الشعور ناحيته وهكذا
وساعتها الدنيا بتتحول لغاية فعلا

فكرة حضرتك ان يكون معاك سلاح للدفاع بيه عن نفسك ممكن تنفع دلؤتى لكن كمان فترة لما تنتشر ثقافة السلاح هتلاقى اللى خبطك ده نازلك بسلاح هوا كمان يبقى ايه الوضع ساعتها ؟؟ ( وخصوصا ان سعره مش غالى بالنسبة ليك ولا حتى لسائق الميكروباص : ثمن شغل اسبوع )

صدقني افضل طريقة تعامل فى الحالات دى الطريقه اللى اتعامل بيها الدكتور hamadamdph
وتأكد لو انتشرت ثقافة حمل السلاح بين الناس الطريقة دي حتى مش هيبقى ليها اى نتيجه عارف ليه ؟
علشان ساعتها الل نازل يتخانق هيقول ده خاف منى اول ما لاقني نازله بالاليكتريك شوك واعرف ان ديما السلاح بيخدع و بيغري

وافتكر ديما قول الشاعر :

حسب المسيء شعوره ومقاله في سره ياليتني لم أذنب

وآسف على الاطاله وياريت محدش يزعل مني