الموضوع: ..وسائل الحمايه والدفاع عن النفس.....موضوع للمناقشه....

صدقني لو حصل معايا اي حاجة من اللى انت قولتها وانا فى حالتى الطبيعية مش هتخانق ولا هبهدل نفسي
لازم تعرف انك لو اتخانقت مع حد اقل منك يبقى انت كده نزلت لمستواه
ممكن آخد حقى بالف طريقة تانيه غير انى اتخانق وبهدل نفسي

النقطه اللى انا بتكلم فيها لو انا شيلت سيلف ديفنس وانت شيلت سيلف ديفنس كمان سنه الناس كلها هيبقى معاهم السيلف ديفنس
يعنى اللى كسر عليك او شتمك او بلطج عليك هينزلك ومعاه سيلف ديفنس هوا كمان
هيبقى ساعتها ايه الوضع ؟؟

المشاركة الأصلية كتبت بواسطة sha2e

اولا انا مختلف معاك يا استاذ اشرف فى الموضوع ده
موضوع الرد اللى انا رديته كان هزار وكان قصدى بالحته الاستعمال الصورة ( دبابة ) مش اربي جية :)
علشان اعتقد الموضوع مينفعش يتاخد الا انه هزار فى هزار

بعد ما قريت ردود كل الاخوة الاعضاء تعالى ابدأ معايا نتخيلها كده :
هتلاقى واحد عمال يلمع فى الطبنجه بتعته والتانى بيغير ماسورة سلاحه الصوت عشان يشتغل 9 مللى علشان يبقى زي ابو طبنجه
والتالت رايح يملى ازايز مولوتوف من البنزينه ومولع فيها فى طرفها وداخل على الخناقه يقول : وووووووووووسع المولتووووووووووووووووووو وووف
والرابع بيسأل عن تركيبة الشطه بالكحول والخامس شايلة عصاية بيسبول او معدن
والسادس خبط بنت ونازل يخوفها بسلاح الصوت راحت هيا نازلاله بالاليكتريك شوك وبتهوشه
تخيل بنت نازله من عربيتها تتخانق باليكتريك شوك والله حاجه تضحك ( اكيد بتخش عليه تهته وتقولة : بوووء اوعى لغذك )
وفوق ده كله واحد واقف فى البلكونه عمال يحشي فى قنابل ( محدش يزعل منى يا جماعه انا بهزر وده اللى تخيلته فى دماغى)

طبعا كل الكلام ده لازم يتاخد على انه هزار مش على محمل الجد علشان لو الكلام ده اتاخد جد وفكرنا فيه تبقى مصيبة سودا
معقوله احنا وصلنا للدرجة اننا ازاى نأذي بعض بالصورة دي ؟؟
معقوله كل واحد فينا عايز يمشي وشايل جوه هدومه خنجر يطعن بيه اول واحد يحتك بيه ؟؟
معقولة - وده الاهم - اننا بقينا بنبذل كل المجهود والوقت ده فى التفكير ازاى نأذي بعض ؟ وناسين عدونا الحقيقي اللى بيحاربنا فى كل حاجه سواء سياسيا او اقتصاديا او امنيا او حتى شوية الميه بتاعت النيل اللى بيوصلو لينا بيحاربنا فيهم بأقذر الطرق كل ده احنا نسيينه وعمالين نتربص لبعض ونفكر ازاي ننتقم من بعض ؟؟
بجد مش عارف أقول اية

فيه بعد تانى أحب أكلمك فيه يا استاذ اشرف وهي ( ثقافة السلاح ) يعنى ايه الكلمة دى ؟
معناها ان السلاح يتحول لثقافة ان كل انسان يمشي شايل سلاح معاه سواء كان سيلف ديفنس او اليكتريك شوك او سلاح نارى او عصاية بيس بول او حتى سلاح ابيض
والثقافة دي بتبدي زى ما حضرتك فكرت كده بتبقى للدفاع عن النفس
لكن بعد فترة زمنية صغيرة بتتحول لثقافه انى لازم قبل ما اخرج من بيتي يبقى معايا سلاح
مش معقول يبقى كل الل ماشيين حوليا معاهم اسلحه وانا معييش على الاقل يكون معايا سلاح يحميني منهم
وده طبعا ليه اسوء الاثر على الحياة الاجتماعيه تلاقى كل واحد ماشي خايف من اللى جنبه ومتوقع منه الشر في اى وقت واللى جنبه عنده نفس الشعور ناحيته وهكذا
وساعتها الدنيا بتتحول لغاية فعلا

فكرة حضرتك ان يكون معاك سلاح للدفاع بيه عن نفسك ممكن تنفع دلؤتى لكن كمان فترة لما تنتشر ثقافة السلاح هتلاقى اللى خبطك ده نازلك بسلاح هوا كمان يبقى ايه الوضع ساعتها ؟؟ ( وخصوصا ان سعره مش غالى بالنسبة ليك ولا حتى لسائق الميكروباص : ثمن شغل اسبوع )

صدقني افضل طريقة تعامل فى الحالات دى الطريقه اللى اتعامل بيها الدكتور hamadamdph
وتأكد لو انتشرت ثقافة حمل السلاح بين الناس الطريقة دي مش هيبقى ليها اى نتيجه عارف ليه علشان ساعتها الل نازل يتخانق هيقول ده خاف منى اول ما لاقني نازله بالاليكتريك شوك واعرف ان ديما السلاح بيخدع و بيغري

وافتكر ديما قول الشاعر :

حسب المسيء شعوره ومقاله في سره ياليتني لم أذنب

وآسف على الاطاله وياريت محدش يزعل مني

على العكس تماما......أنا سعيد بمشاركه حضرتك وتفاعلك معايا فى الحوار.....

أنا على فكره مش من مروجى ثقافه السلاح حسب حضرتك ما عرفتها وعمرى ما فكرت انى اكون سبب لأذيه شخص من أى نوع......

والفكره من طرح الموضوع المناقشه.......بمعنى.....

المقصود إننا نفكر سوا إيه أنسب طريقه ندافع بيها عن أنفسنا فى حاله التعرض للخطر او التعدى......

نوضح كمان....

سلوكيات حضرتك...تختلف عن سلوكياتى ....عن سلوكيات شخص أخر.....

نقول مثل.....

أنا أكتر من مره عربيتى تتخبط ...او عربيه تريح عليها فى إشاره وكنت دايما بكتفى بإشاره أسف من الشخص المخطئ وحتى مبنزلش ابص على اثر الخبطه.....

كفايه أدبه وإعتذاره......وفاكر مره الخبطه كانت شديده شويه ومصحوبه بصوت كسر فانوس وبصيت فى المرايه لاقيت عربيه 127 بيشاورلى انا اسف وبيشاور على عربيتى بمعنى عربيتك مفيهاش حاجه....إبتسمتله ومشيت وقلت قدر الله وما شاء فعل...

المواقف كتير والامثله كتير لكن مقصود كلامى انى محتاج وسيله دفاع...لوقف الاعتداء فى حاله وجوده....

مش لازم سلاح ...بس لو الموقف حكم تدافع عن نفسك...هتتصرف إزاى؟؟؟

حضرتك متخيل الصوره؟!!

العدو الخارجى موجود ومعروف وربنا امرنا نستعدله بما استطعنا ونعدله العده.....لكن ده مش معناه ان الدنيا حلوه وانى انسى مشاكلى الداخليه.....لو مقدرتش أحافظ على امن بناتى وزوجتى فى عربيتى وبيتى هحافظ إزاى على وطنى ودينى؟

حضرتك أنا حسب معلوماتى الضئيله إن حكم الدين فى المتلصص ( اللى بيبص على محتوى الدار فى غفله من أهله ) أن يقام عليه الحد وتفقأ عينه.....وإن القذف للمحصنات ب ثمانون جلده......وكل ده مش مرتبط حتى لو الجيش فى سريه حرب....

ارجع وأقول إن البيئه والنشأه هى اللى هتحكمك إمتى تدافع عن نفسك وده بيكون بعد ما تتعرض لخطر حقيقى.......وممكن الخطر ده يؤدى لكارثه.....لو كنت فى حل إنى أحكيلك كنت حكيتلك على تجارب إخوه معانا فى المنتدى فى الموضوع ده ...لكن الافضل يشاركونا بتجاربهم....

أخر حاجه....طبعا مفيش اى مشاكل إننا نختلف او نتفق فى الرأى ...أمال إسمها مناقشه ليه؟!
وبالنسبه لموضوع الدبابه الاستعمال والار بى جى ...طبعا مفهوم ان الموضوع هزار وكان لازم التعليق عليه يكون بهزار برضو ويمكن دا كان واضح فى مشاركه كتبتها لكن النت فصل عندى قبل ما يتم إرسالها وموصلتش.....

سعدت بمناقشه معك وانتظر تفاعلك ومشاركاتك......من غير دبابات....

وهل الامريكان ستيك ممنوع ????

المشاركة الأصلية كتبت بواسطة hamadamdph

سيدي العزيز
انا اصلا متشكر ليكم على المناقشة المفيدة دي
وعايز اقولك ان انا عارف ان مش معظم بس كل اللي مشاركين في الموضوع عمرهم ما حيتسببوا في ضرر لاي حد حتى لو كان خابطهم جامد.
وعارف كمان ان اصل الموضوع عن الدفاع عن النفس لو الواحد اتعرض لهجوم مش للتهويش من الاساس, لان في الاساس انك مش حتستخدم غير لما الامور تتطور للاعتداء على النفس والبدن والشرف ساعتها الواحد ممكن تهون عليه حياته نفسها, انا مش درويش ولا بحب انضرب واسكت, انما الواحد بس بيحاول انه يلم المواضيع لاني عمري ما اتخانقت وانا شاب الا وندمت على الخناقة حتى لو كنت طالع منها منتصر......

انما ليا عند حضرتك عتاب من باب اننا كلنا اخوات في المنتدى : ليه نشرت طريقة صنع البخاخ على المنتدى كده
انا برضه عارف انك عملت كده من باب الخوف على اخواتك من الهجوم او الاعتداء.

بس تعرف من خلال قعدة الواحد على النت, اقدر اقولك ان الوصفة دي حتنتشر زي زي ايه مش عارف بس انت متخيل حتنتشر اد ايه؟؟؟؟
دي ممكن تنطبع على ورق والناس يوزعوها على اصحابهم
ممكن تتبعت على ماسجات على الموبايلات وتبدأ المسج ب "خلطة الدفاع عن النفس"
ممكن تنتشر على المنتديات بتاعة البنات من عينة "منتديات عاشقة الحياة" اختى الحبيبة جاءتنا بعد طول انتظار الخلطة السحرية خليها على طول معاكي لما حد يهاجمك
الواحد لما كان بيجيله ايميل عبيط فيه معلومات مغلوطة او خبر متفبرك زي الايميلات اللي كلنا عارفينهم عن مش عارف ايه لو مبعتش الايميل ده لعشرة من اصحابك سقف بيتكو حيقع عليكو الحاجات اللي انت عارفها دي,
لما كان الواحد يمسح الايميل ده يبص يلاقيه يلف ويرجع له من واحد ثاني , يابني انا مش لسه ماسحك من كام يوم....


احب اسال حضرتك هل تحب تكون مسؤول عن انتشار هذه الخلطة؟
على فكرة انا نفسي اول واحد كنت عايز اعرف اعملها ازاي !!!
وانا نفسي كنت عايز اعملها بس معتقدش اني لما عرفتها ممكن اعملها, ليه؟؟؟

اقول حضرتك ومعلهش استحملني شوية
الخلطة دي عبارة عن فلفل + بصل + شطة
كل دول تحت بند اسمه المهيجات او irritants

يعني لما اي مادة من دول بيتحطوا على الجلد او الاغشية المخاطية(الانف, العين , الفم) حيهيجوا المناطق دي .
يهيجوها يعني يتسببوا في توسيع الاوعية الدموية في هذه المناطق مع استحضار الخلايا المناعية
بكلمة اخرى وبدون الكلكعة اللي فاتت : التهاب

المشكلة ان الالتهاب ده بيجيب معاه خلايا المناعة يعني الحاجات اللي بتهاجم الاجسام الغريبة عشان كده اللي بياكل كشري بالشطة بيبقى لونه عامل زي الدم.

المشكلة ان خلايا المناعة في الحالة دي حتفرز محتوياتها في وش الشطة والفلفل والبصل لانها حتفتكر انها بكتيريا مثلا وبتهاجم الجسم.

هو ده اللي احنا عايزينه في الاول , اننا نطلع عين اللي ادامنا عشان مياذينيش في جسمي او كرامتي.

بس حضرتك حاجة خطيرة جداا جداا
زيت جونسون!!!!

عارف حضرتك ايه الفكرة منه اصلا
الفكرة قديمة من ايام العرب القدماء وهما عارفين ان خلايا الجسم كله معمولة من الدهون ودي حقيقة
يعني فيه قاعدة طبية ان اي شيء دهني حيخترق الجسم لان الدهون تخترق الدهون انما الميا لأ.
وعشان كده احنا كل الدهانات اللي بنستخدمها على الجلد من اول مرهم التسلخات لحاد فير اند لافلي لازم يكون دهني عشان الجلد يشربه.

حضرتك لما حطيت الزيت انت حولت الmedia من بيئة مائية لبيئة دهنية.

يعني لما حترشه على اي حد مش حينزل على عينه او مناخيره , لا , دا حيخترقهم جوا الخلايا..


طب وبعدين

العين اول حته فيها القرنية هي الجزء الوحيد في جسمنا اللي شفاف لان ربنا خلقها معموله من الياف متوازية مش متقاطعة.
لما حضرتك حترش المهيجات دي عليها حتتهاجم العين بخلايا المناعة حتتغير تركيبة الالياف
كأنك حولت الازاز من ازاز شفاف لازاز مصنفر زي بتاع المطابخ : شفاف العين يبيض : بمعنى اصح العمى

هل حضرتك تقصد تعميه؟؟ انا عارف انه لأ.
هل حضرتك ليك الحق انك تعميه؟؟ ومتزعلش مني من الذي اعطاك الحق انك تعمي شخص اهانك حتى لو امام اسرتك
هل حضرتك على استعداد انك تعتمد في ردك على خلية من خلايا مناعته : يا ترى الخلية حتتصرف عدل ولا حتستغبى؟
هل عندك استعداد انه لما يتعمي يقعد طول حياته يحسبن عليك
او تتخيل مثلا انه لما يخلف ميعرفش يشوف ابنه الجديد عشان انت في يوم من الايام قررت ان صبرك نفذ وحتستخدم معاه الاسلحة البيولوجية......


بالنسبة للجهاز التنفسي نفس اللي بيحصل بيكون زي اللي بيحصل في العين, بس بيكون على هيئة انقباض في عضلات الشعب الهوائية.

بمعنى اصح هيجيله ازمة ربو خصوصا لو عنده اساسا استعداد للربو او كان عنده وهو صغير

اسأل حضرتك ثاني وانا عارف انك خايف على الناس زي مانت خايف على نفسك.
هل انت على استعداد انك تتسبب في انه يقعد يكح لحاد ما يزرق؟
هل انت على استعداد انه يتحرم من نفسه اللي ربنا جعله سر حياتنا ؟؟ افرض انه كان عنده سكر ولا ضغط مش ممكن يغمى عليه ؟ طيب ايه ممكن يحصل له بعد كده

انا عارف اني غلس وطولت عليك انا آسف
بس اناشدك يا اخي انك تحاول انك تمسح الطريقة دي عشان مناخدش ذنوب حد يستخدمها غلط....

مفيش مشاكل حضرتك ...

و انا هراسل ا لإدارة عشان تمسح المشاركة