أسف على التأخير جارى الرد على الكل
عرض للطباعة
أسف على التأخير جارى الرد على الكل
بص هوا تكييف ال octavia a5 فعلاً فيه مشاكل كتير بس ان شاء الله اتمنى انك تكون بعيد عن المشاكل دى
الاول انت بتقول الفيوزات تمام . طيب هيا المراوح شغالة فى حالة سخونة العربية ولا لأ ولو شغالة شغالة السرعتين (البطئ والسريع ) ولا لأ . تمام كدا
بعد كدا لو دايرة التبريد مفهاش فريون التكييف مش هيشتغل ولا المراوح هتشتغل مع التكييف لو فيها مبردوا مش شغال يبقى ممكن يكون حساس ضغط الفريون فيه مشكلة .
شكراً لمشاركتك . بس الوضع فى ال a5 مختلف شويا اللى حضرتك غيرته دا يعتبر كنترول المراوح فى ال a4 انما فى ال a5 دا مش موجود والكنترول موجود فى المروحة الكبيرة ودى عبارة عن شريحة الكترونية وليس مجموعة كتاوتات زى ال a4 ومعلش اسمحلى دى الميزة فى التوكيل (لو كنت جيت التوكيل مكنتش هتجيب حساس الضغط دا على الفاضى بس اكيد كنت هتدفع قد تمنه مرتين مصنعية :):) )
معظم الاستفسارات دى انت محتاج معرض او حد عنده فكرة بالمبيعات لشركة skoda انا مهندس صيانة فقط . بالنسبة لموضوع التكيف ادر اقوللك ان فعلاً كومبروسور ال a4 أأمن من الa5 بمعنى معظم المشاكل فى التكييف موجودة فى ال a5 مش ال A4 وعلى فكرة تكييف ال a4 اقوى من ال a5 فعلاً بس احب اقول ان موضوع التكييف فى ال a5 فى الموديلات الجديدة
اكرر ساجاوب فى حدود معلوماتى عن الناحية الفنية وليس التسويقية
التوكيل فى رايى مستواه جيد . بالنسبة لقطع الغيار هيا الان متوفرة اصلية ومعنديش فكرة التقليد اخباره ايه بس يتهيألى مش كتير لان العربية مش منتشرة
انا لو معايا 89000 انا مغرم بحاجة اسمها gen 2 !!!! (فى ناس كتير هتموتنى كدا صح :) )
انا رايى الشخصى ال a5 عربية محترمة جداً وتستاهل كل جنيه يدفع فيها بس فى السعر اللى حضرتك بتتكلم فيه انا استبعد الكيا لانها اقل كفاءة والكروز طبعاً عربية محترمة جدا من شركة ليها سمعة كبيرة بس انا بحس الكروز شويا OVER PRICED غالية على امكانيتها ومعرفش حاجة عن توكيلها بس انا عايز افكرك ان فى عندك عربية انا بشوفها قوية جداً وانا هفكر فيها لو معايا المبلغ دا وهيا ال HONDA CIVIC دى عربية من العربيات اللى مش واخدة حقها بس هيا فعلاً عربية قوية .
طبعأ لو حضرتك بتفكر انك تمشى بالعربية شويا وتبعها يبقى انصحك بالاوكتافيا طبعاً وال كيا انا شايف هيبقى مستقبل سعرها كويس و بالتوفيق
اولاً لمبة الزيت دى اسمها لمبة ظغط الزيت تمام كدا يعنى دى المسؤولة عن حساب مستوى ضغط الزيت . طلمبة الزين هيا المسئولة عن عملية تزيت المحرك بالكامل من الدخل بدون الدخول فى تفاصيل فنية الصفاية دى بتبقى موجود فى بداية الطلمبة لزالة الشوائب انما التروس دى اللى الطلمبة بتاخد حركتها من الكرنك بواسطتها
عشلت ملخبطكش اكتر من كدا
جرب حساس ضغط الزيت الاول وبعدين الطلمبة لو كل دا اللمبة مطفتش يبقى فى حاجة ميكانيكية فى الموتور بتهرب ظغط الزيت ممكن نكون سبايك الكرنك
ان شاء الله سوف اكون متواجد فى الفترة القادمة باستمرار كان فى مشاكل فى النت واتحلت وبعتذر عن تاخيرى مرة تانية
حمد الله على السلامة :)
يص بقى انا عندى كام سؤال كده فيا رب تقدر تساعدنى فيهم. العربية سكودا فابيا هاتش باك 1400 موديل 2001 عامله 295000. كان فى سواق زمان هوه اللى بيوديها التوكيل و متابع معاها بس من اول 240000, بقت مسؤوليتى.
أنا بغير الزيت كل 10000, فلتر الهواء و البنزين كل 20000, بغسل الرادياتير كل 6 شهور و بحط مياه خضراء. سمعن أن السيور المفروض تتغير كل 50000, الكلام ده صح ولا مش تمام ؟
كل كام يوم ألاقى بوجيه فصل و العربية بتبرجل, جربن ال 2و3و4 شمعة و مافيش أختلاف كبير, موضوع ان البوجيه يبوظ عيب فل موبينه ولا فى حاجة تانيه مع العلم انو مكان البوجيه اللى بيبوظ بيختلف كل مره
فى بقى مصيبة فل العربية اسمها epc مره واحده تنور و العربية تقلب توك توك, أقصى سرعة 80, مفيش حاجة اسمها سحب, لو شلت رجلى من على البنزين تبطل. بتيجى لوحدها و تروح لوحدها. توكيل دير الملاك قال انو ده عشان أنا مركب زينون بس الموضوع ده من قبل الزينون و جربت شيلت الزينون لقيته برده بيحصل. الميكانيكى قاللى لو حصل اطفى العربية و افصل البطارية 5ربع ساعة و كله هيبقى تمام, بس حاسس انو الموضوع ده أكيد له حل أحسن من كده
معلش طولت عليك بس بجد العربية ده غاليى على أوى و بكون مضايق اوى لما يكون فيها حاجة
الف حمد لله علي سلامتك وحشتنا يا بشمهندس يوسف
انا كنت سألت حضرتك السؤال ده و انت رديت الاجاباة ده و دلوقتي انا عرفت ان ال a4 خلاص مش هينزلوا منها موديل 2010 عشان كده انا ان شاء الله ناوي اجيب a5 موديل 2006 او 2007 بس كان ليه سؤال عند حضرتك طبعا انا في الحالة ده لازم اكشف علي العربية كويس فهل تنصحني اني اكشف عليها قبل ما اشتريها في التوكيل -انا سمعت انهم بياخدوا 200 جنيه و يكشفوا علي العربية- و لا اخد ميكانيكي كويس و اذا حضرتك تعرف ميكانيكي كويس يا ريت تديني نمرته او تنصحني اعمل ايه عشان ميضحكش عليه و خصوصا انا مليش خبرة في موضوع العربيات
و اسف لازعاج حضرتك
و ربنا يجعله في ميزان حسناتك
بالنسبة للزيت تمام ب متنساش تغير معاه الفلتر كمان. فلتر الهواء كل 20.000 تمام خلى البنزين كل 40.000 . السيور بتتغير كل 60.000 مش 50.000 وياريت لو عايز تطمن تغير الطقم كامل السيور بالشداد والبلية . والمياه الحمراء او الخضراء بتتغير كل 40.000 كيلو
بالنسبة لموضوع ال epc بص يا سيدى هوا المشكلة دى غالباً بتبقى اما مكنة الاستوب وواضح انها مش دى فى حالتك وتانى حاجة ممكن تكون البوابة او دواسة البنزين الكهربا بتاعتهم فيها حاجة وطبعاً ملهاش علاقة بالزينون . المفروض ان اى حد بيتعامل مع جهاز كشف الاعطال يخلصلك القصة دى بسرعة
اخيراً بالنسبة للبوجيهات ممكن تكون المشكلة فى الموبينة نفسها وممكن تكون السلوك نفسها فيها حاجة وممكن يكون حساس الكرنك ضعيف ودا بيهرتل الدنيا جامد اوى بس متخلهاش تتلت بصفة مستمرة كدا . واخبار البويجهات لما بطلعها عاملة ازاى عليها زيت مثلاً ولا مرطبة ولا طبيعية .
خليك فى موديل 2007 احسن واتاكد من حالة التكييف والفتيس كويس واتاكد غير زيت فتيس ولا لأ عند 60.000 كيلو لان دى حاجة مهمة اوى . بالنسبة للكشف هوا عندنا بيتكلف 150 ودا فحص شامل على كل حاجة فى العربية من عفشة لكهرباء لدهان لكمبيوتر وطبعاً ميكانيكا . انصحك تروح بيها مكان متخصص لان بجد بيبقى فى حاجات مبتبنش الا بالجهاز . عندك مثلاً كتير اوى فى ال a5 كنترول ال abs بيبقى فيه مشكلة ومحتاج يتغير بيقوموا فاكين التابلوه و طافيين الللمبة بتاعة ال abs بمنديل صغير او ورقة سودا علشان متنورش قدامك والجميل ان العربيا لو الكنترول فيه حاجة الناس فاكره ان العربيا مش هيبقى فيها فرامل لأ بيبقى فيها فرامل بس مفهاش abs وطبعاً الفرق السما عن العما :) ! وممكن نفس الموضوع يتعمل مع كنترول ال airbag اللى عامل حادثة بيطفو اللمبة علشان ميغيروش الكنترول وبكدا حضرتك بتبقى ماشى بايرباج سليم وكل حاجة بس الكنترول بتاعه مش هيديله أمر اصلاً يضرب :) ! فريح دماغك ووديها لمكان متخصص . بالتوفيق
1000 شكرا
و الله ربنا يكرمك فعلا و ينور عليك
بس معلش ليه استفسار يعني كده حضرتك بترجح اني اروح التوكيل؟؟؟؟ و اذا كده انهي فرع من فروع التوكيل يكون احسن تنصحني بيه حضرتك؟
و لا حضرتك تقصد حد متخصص بره التوكيل؟؟؟ ولو كده ممكن حضرتك ترشح لي حد يكون مضمون و عنده أمانة و ضمير...
و هل موديل 2007 افضل من 2006 و في ايه؟
و تاني حاجة ايه الي ممكن يكون في الاوكتافيا مستخبي و يخلي العربية غير صالحة او تكون مقلب في الشرا؟؟
اسف لازعاج حضرتك و الله بس ما صدقت لقيت حد متخصص زي حضرتك ممكن يفيدني
و ربنا يعزك و يعلمك من علمه
انا رايى التوكيل اغلى طبعاً بس فيه ناس خبرة اكتر روح اى توكيل معتمد هيعمللك كشف تمام ولو عايز تشرفنا فى التوكيل اللى انا شغال فيه عهمللك الفحص بنفسى وهواعتقد بيتكلف 150 جنيه. بص بيبقى فيه حاحات كتير ممكن يبقى فيه طلمبة بنزين وممكن لعب فى الكنترولات زى ما ضربتللك مثل كدا وممكن حساسات فيها مشاكل وممكن كذا حاجة علشان تطمن لازم العربية تتحط على جهاز أعطال والاهم يكون اللى شغال على الجهاز دا يبقى فاهم
لا يا باشا انت فهمتنى غلط انا بتكلم على المراوح اللى بره فى الكبود اللى راكبه على الريداتير دى بتشتغل مع التكيف وبتشتغل مع حرارة العربية ولها سرعتين هل المراوح دى بتشتغل مع التكييف اصلاً ولا لأ وهل الكمبروسور بيلقط حركة اصلاً ولا لأ. بس بدال مفيش اى تحميل على الموتور يبقى بنسبة كبيرة اوى كدا الكمبروسور مبيشتغلش ودا ممكن يكون بسبب حساس ضغط الفريون وممكن تكون العربية مفهاش فريون اصلاً وممكن لاقدر الله الكمبرورسور يكون محروق .
السلام عليكم يا باشمهندس، انا عندى ايه فور 2006، المشكلة عندى صوت تزييق بيطلع م الابواب مع السرعة 60 او اعلى و طبعا بكون قافل القزاز كلهرو اى هزة للعربية تلاقيها بتزيق من عند الابواب خاصة الباب اللى ورا السواق، قالولى اجيب مادة اسمها wd 40 و رشيتها ع المفصلات بس لسه الصوت موجود، انت رايك ايه الحل
عاوز أركب فلتر k&n و بوجيهات سبليت فاير و أسلاك لسيارة A5
هل يرفع من أداء السيارة أم لا و هل يؤثر على عمر الموتور
أولا الف شكر علي نصايح حضرتك الغالية
و كان ليه سؤال بخصوص ال a5 هل من الافضل بما اني هاجيبها مستعملة اني اجبها وكيل و لا خليجي و انا سمعت انكم بتصلحوا الاتنين عادي لكن زي ما اتقالي ان الخليجي انعم و تكييفه احسن و مميزات تانية كتير عن المصري
فحضرتك تنصح بايه؟
السلام عليكم
ما هو الفرق بين كل من المواتير mpi fsi tsi
مرحبا يا مهندس انا معايا Skoda Felicia 96
بتصرف بنزين كتيييييييير بطريقه مش معقوله ومع العلم انو ماتورها 1.3
شو الحل
وهل من الممكن اني اركب ماتور 1.6 بدون اي تغير على البودي
ارجو الرد وشكرا على الموضوع المميز
في واحد قالي ان الفابيا ال 1200 بتاعتي ميتعملهاش عمرة
ايه السبب والحل ايه لو حصل للموتور حاجة
لو سمحت ممكن اعرف صيانة ال 60 الف a4 2003بكام
ال MPI هو Multi Point Ingection وده الي مستخدم في الاوكتافيا والجيتا والباسات المانيوال وهو 102 حصان وبيستخدم بنزين 92 و95
ال fsi هو محرك أعلي كفاءة بس بيستخدم بنزين 95 فقط ومستخدم في الباسات الأتوماتيك 115 حصان
ال tsi هو محرك تيربو وأعلي كفاءة من السابقين يعني ال 1400 بيدي 120 حصان بس بأستخدام 95 فقط وهو موجود في الباسات التيربو ودي تمنها غالي حوالي 260000 يعني تجيب مرسيدس أ حسن 156 حصان وبنزين 92
أرجو اني أكون افادتك
السلام عليكم يا باشمهندس :Y_hi_3[1]:
انا اسمى وائل وعند سكودا فليشيا هاتسعدنى اتبرع باى معلومه لاخوك الغلبان:stink[1]:
اولا:العربيه لما بتكون بارده باسمع صوت شخلله جامده اوى فى الفتيس ولما ادوس دبرياج الصوت بيروح مع العلم انى وانا ماشى الصوت موجود حتى لودست دبرياج
علما بان موديل عربيتى 95
ثانيا:لاحظت فى الفتره الاخيره ان العبيه بتدخن دخنه بيضه مش عارف ليه والموضوع دا قلقنى
ثالثا:رشحلى ميكانيكى ابن حلال فاهم فى السكودا علما بانى ساكن فى القناطر الخيريه:ask:
كنت عايز اعرف الفليشيا ال95 بيتغيرلها زيت كام كيلو متر وكام لتر زيت
وايه رائ حضرتك فى زيت التعاون الازرق
وهل زيت الفتيس هو فالفالين 90 ولا ايه
ولو مفيهاش توتر ممكن رقم موبايلك
بالله عليك ترد عليا
اشتريت فليشيا من قريب
فى التابلوه بتاعها لمبه حمراء منورة على طول
هى موجودة فى منتصف التابلوه لاسفل
بعد ازن الباش مهندس دى لمبة فرامل اليد تلاقى الزرار بتاعها اتكسر ولا حاجة ومعلقة
السلام عليكم
لو سمحت انا معايا فيليشيا 98عندى مشكلة فى التدوير الصبح مش بتدور على طول والناس قالولى دى شغالة على حاجة اشمها تشوك او السخان تقريا مش بتدور على طول بتدور من ثالث او رابع مرة ولمة بتدور بلاقى دواسة البنزين نزلت لوحدها وصوت العربية عالى انا عايز افهم اية الموضوع دة والحل لو سمحت مع العلم انى جربت ادوس بنزين قبل ما ادور وجربت بردو من غير ما ادوس بنزين بس الكلام دة الصبح بص اما فى وسط النهار بتدور عادى لو كنت دورتها قبل كدة الصبح ارجو الرد لو سمحت