اول امبارح وانا ماشية في شارع عين شمس (وحسبي الله ونعم الوكيل في ده شارع وفي اللي صممه اصلا من كتر القرف اللي بشوفه فيه نفسي يلغوه واشوفلي طريق تاني امشي فيه ) المهم انا ماشية في طريقي عادي والطريق ده اللي ساق فيه قبل كده عارف إنه كتير بيتقفل قفلة سودة من غير حوادث ولا بتاع لكن بسبب كثرة الفتحات اللي في الرصيف واللي بيطلق عليها عبثاً "يوتيرنات" وكمان التقاطعات الزبالة اللي فيه عمال على بطال وطبعا معظم العربيات فيه ميكروباص ونص نقل والملاكي حدّث ولا حرج سلوكهم انيل من الباقيين والتقطاعات دي كلها بدون اي عسكري لعبة حتى يقف يشاور للعربيات وغالبا العربيات بتمشي في الطريق ده بالمجهودات الذاتية يعني لما الطريق بتقفل ويتلعبك تلاقي سواقين الميكروباص او التباعين بتوعهم أو المارة نفسهم (لو كانوا فاضيين وحابين يتسلوا) ينزلوا عشان يسلكوا الطريق ويوجهوا العربيات بنفسهم ووسع يافلان واستني انت وعدّي انت وهكذا لحد ماشوية عربيات تفلت من الزحمة وترجع تتلعبك تاني .
المهم انا قدري كتب عليا اني اعدي في الشارع ده يومياً وطبعا الحمد لله الذي لايحمد على مكروه سواه
وانا ماشية في طريقي عادي وسايقة على سرعة قليلة في شارع عين شمس الرئيسي وقبل الكنيسة في فتحة من ناحية الشمال وقصادها شارع يمين (انا اللي اعرفه ان الاحقية للي جاي على طول واللي قاطع الطريق ده المفروض يستني الطريق يفضي وبعدين يعدي) المهم مشيت وعربيتي عدت تلتين الفتحة وخلاص هاكمل طريقي علي طول الاقي واحد بعربية لونها سمني أو بيج تقريبا ريتمو او حاجة شبهها (إعذروني مش قادرة افتكر كويس لإن الحاجات اللي حصلت وقت الحادثة شبه اتمسحت من ذاكرتي تماما مش عارفة ازاي) المهم انا بصيتله وباين جدا اني هاعدي قبليه واسيبه يقطع الطريق بعدي لكنه مصبرش فراح رمي بوز عربيته قبلي وعدي عربيته بالعافية ومكنش في مسافة بينا تقريبا لدرجة اني افتكرته خبطني بس طبعا اول مارمي بوزه اضطريت اني افرمل وبعدين هو عدي ولا كإن اللي كسر عليها دي موجودة اصلا بمنتهي قلة الذوق ، انا للأسف اتنرفزت ودمي اتحرق من الحركة دي وغالبا كنت سايبة العربية علي الغيار التاني ومن كتر النرفزة روحت دايسة على دواسة البنزين جامد وطلعت بالعربية امريكاني (غصب عني ) وغالبا برده الدريكسيون كان ملفوف المهم معرفش حصل ايه كده (اللحظتين بتوع الحادثة دول واقعين من ذاكرتي تماما زي مايكون غبت عن الوعي في الوقت ده) ومفوقتش غير لما لاقيتني لابسة في الرصيف وسمعت صوت بوووووووم طراااااااااخ والعربية كل مافيها فصل تماما وانا رجلي علي البنزين وعمالة ادوس والعربية بتنط ومش بتتحرك وفوقت لنفسي طبعا اكتشفت انها فصلت قمت استجمعت قوايا ودورتها وعدلت نفسي وجيت عشان الحق اللي منه لله اللي كان السبب في اللبسة دي طبعا هيهات لإني اولاً حسيت العربية معووجة وبتمشي بالعافية عرفت ان الكاوتش فرقع ومرضتش امشي عليها عشان غلط والموضوع ميتطورش للأسوأ المهم هديت نفسي وشغلت الفلاشر وركنت على جنب ونزلت (طبعا كنت متوقعة اني هانزل الاقي مصيبة سودة منيلة بستين نيلة ) لكنها طلعت مصيبة سودة بس أولاً لاقيت الكاوتش الشمال على الأرض تماما ومتفرتك والطاسة معووجة ومتجرحة ومتشلفطة كنت قصاد البنزينة ولسة هاروح لاقيت علي الناحية التانية لاقيت بتاع كاوتش روحلته قلتله الكاوتش فرقع وتعالي شوف ايه اللي حصل وشوف هانعمل ايه قاللي معاكي عدة وكوريك قلتله معايا كل حاجة العربية لسة زيرو روحت ولأول مرة افتح شنطة العدة واستعمل المفك والكوريك بتوع العربية.
فك الطاسة ولاقي الجنط معووج عوجة بشعة وفك العجلة وروحنا على المحل بتاعه ، الكاوتش اتقطع قطعتين كبار لايقلوا عن 1سم واتكحتت منه حتة برده نفس الحجم بإختصار الكاوتش مبقاش نافع تاني وكذلك الحال بالنسبة للجنط لإنه حاول يستعدله معرفش وغالبا برده الجنط كده بخ .
المهم قاللي ممكن الحملك الكاوتش واركبلك شنبر بس الموضوع هايكون مكلف انا عندي فردة مستعمله ب 140 جنيه مبقتش عارفة اعمل ايه المهم كلمت أخ عزيز له باع قوي في عالم السيارات اقترح عليا اني مشتريش منه مستعمل ولا حاجة واخليه يركبلي الاستبن واروح وبعدين نبقي نشوف القصة ايه.
وبالفعل عملت كده وروحت وانا منهارة وبعيط وكنت اصلا بعيط اول ماشوفت منظر الكاوتش والجنط وهما مبقوش نافعين تاني ودي كانت الخساير الواضحة الله اعلم بقي في حاجة تانية اتأثرت ولا لأ .

المهم اتصلت بالتوكيل امبارح وحكيت على اللي حصل حجزلي معاد يوم السبت كلمت مندوبة التأمين قالتلي تحبي تصلحي فين قلتلها التوكيل قالتلي طيب روحي التوكيل وهناك اعملي مقايسة وابعتهالي علي الفاكس ومندوب التأمين يجيلك على التوكيل تاني يوم ويصور ويتناقش مع التوكيل وبعدين تتصلح وتجيبلنا الفاتورة ونطلعلك الشيك وكده.
المهم كلمت التوكيل تاني عشان أسألهم لو في رسوم عشان اكشف على العربية واعمل مقايسة واديها لشركة التأمين قاللي بتدفعي 300 جنيه مقدم لو صلحتى عندنا بيتخصموا من الفاتورة لو مصلحتيش مبتسترديهمش تاني وبيعتبروا تمن المقايسة .

كلمت مركز كارفان الرحاب قاللي حضرتك تشرفينا ونشوف حصل ايه قلتله طب جمعة وسبت قاللي بلاش بيكونوا زحمة اوي لو تقدري تيجي النهاردة الموضوع مش هياخد وقت كبير واحنا شغالين لحد 8:30 مساءاً سألته على رسوم الكشف عشان هاعمل مقايسة وأوديها لشركة التأمين لو الموضوع طلع كبير قاللي حضرتك شرفينا بس الاول ونشوف ومتحمليش هم حاجة.
عموما انا هاروح النهاردة ان شاء الله اشوف ايه النظام وربنا يستر ميكونش سمَعت في حاجة تانية في العربية من تحت رغم اني روحت بنزينة شل الكوربة امبارح رفعتها و كشفلي عليها وانا شوفتها معاه طمني قاللي مفيهاش حاجة وكله سليم والجنط والكاوتش هما اللي خدوا الخبطة كلها وباقي العربية متأثرش والحمد لله.
بجد الموضوع ده منكد عليا اوي عشان العربية لسة ملحقتش افرح بيها ويحصلها كدة منه لله اللي كان السبب عشان حدفته قدام عربيتي بالشكل ده هي اللي عملت ده كله وانا طبعا منكرش اني غلطانة لإني اتنرفزت واتغابيت علي العربية وطلعت نرفزتي فيها .
عموما الحمد لله على كل شئ وقدر الله وماشاء فعل.
انا دلوقتي المفروض اللي متأكدة منه اني لازم اجيب فردة كاوتش جديد وجنط جديد ولسة هاشوف في حاجة تاني ولا لأ.
الكاوتش بتاعي كومهو R 14" 185/65 والجنط 14

سألت في التوكيل سعر الكاوتش 450 وسعر الجنط 600 جنيه .
سألت برده عند موزعين كومهو لاقيت سعر الكومهو فيتنامي ب 235 والكوري مكنش موجود ولسة هايجيله قاللي هايكون في حدود 260 جنيه اما الجنوط طبعا هاتكون مستعملة ومعرفش رنج الاسعار ايه.
عموما ربنا يستر واشوف كشف النهاردة هايقولوا ايه.

ودي كانت أول حادثة قوية لعربيتي النيو اكسنت 2010
إهئ إهئ إهئ
قولولي رأيكم ايه وماهي الحلول المتاحة حالياً في مثل هاذوها الموقف