أعزائى و إخوانى فى منتدى بروتون الحبيب
وعدتكم برفع صور العربية و تقرير عن انطباعى بعد ركوبها
معلش اتأخرت عليكم شوية و جمعتلكم كل حاجة الصور و انطباعاتى بعد استعمال لفترة مناسبة و تقرير صيانة ال 1000 بالمرة.


أولا: صور برسونتى حبيبتى




صورها من الداخل







العربية استلمتها من التوكيل يوم 11/7/2009
و رخصت يوم 14/7/2009
مشوارى اليومى لحد الشغل حوالى 50 كم مع شوية مشاوير جانبية عملت حوالى 985 كم يوم 30/7/2009 و روحت عملت صيانة ال 1000 لأنى كنت مسافر بعديها و خفت أتأخر على الصيانة
طبعا خلال الفترة بتاعة التليين كنت ملتزم بكلام أستاذ أسامة حرفيا ما زودتش السرعة عن 100 كم و لا عداد ال RPM عن 30
و طبعا ما شغلتش التكييف خالص رغم الجو الجميل بتاع الصيف ده
و اللى كنت ملاحظه أثناء الفترة دى إن الموتور كان زى ما يكون متكتف و بيفك درجةدرجة أو بمعنى أوضح السرعة بتاعة الغيار كانت بتزيد مع ثبات الRPM يعنى مثلا التالت كان على 3 RPM ما بيعديش 65 كم و بعدين بدأ بنفس ال 3 RPM يوصل ل80 كم
استهلاك البنزين فى فترة التليين جوه البلد كانت حوالى 10 لتر لكل 100 كم. بعد التليين الحقيقة لسه ما حسبتوش

عملت صيانة ال 1000 عند أمير و جوزيف لأنى كنت مستعجل جدا بصراحة و ما كنتش حجزت
المعاملة بصراحة كانت أكثر من رائعة و الوقت اللى خلصت فيه الصيانة كان قياسى حوالى 25 دقيقة و دفعت 150 جنيه زيت و فلتر و برده زى ما حصل مع مدحت ما حسبوليش مصنعية عشان أول مرة

أنا طبعا مش بخبرة الناس اللى اتكلمت قبلى و ماسقتش عربيات كتير بانتظام يعنى جربت أكتر من عربية آه بس ما سقتش غير 3 عربيات تحديدا قبلها لمدة طويلة (ريتمو - سويفت - مازدا 323)
و نزود عليهم عربية قعدت معايا 10 أيام كنت ببيعها لصاحبتها لانسر أوتو كريستالة

ماشاء الله ما فيش أى مقارنة بين كل اللى فات و البيرسونا مع كامل احترامى و تقديرى لأصحاب العربيات السابقة و خاصة الكريستالة

العربية مقارنة بالعربيات القديمة اللى عدت عليا ناعمة فى سواقتها مش فى العفشة عشان الناس ما تفهمنيش غلط و برده باستثناء السويفت و الكريستالة عفشتها جميلة جدا بالنسبة لى
الهبدة اللى الناس كلها بتتكلم عنها و الدتى نفسها ما حستهاش و أنا بسألها سؤال مباشر بعد كل مطب

العربية عالية و ما بتحكش خالص ماشاء الله مهما كان المطب عالى و غير منتظم لدرجة إن والدى و احنا واخدين مطب سىء جدا و عالى أوى فى طريق الاسماعيلية السويس كان عايز يزعق معايا إنى ما أخدتوش بالجنب (تعابينى زى ما بيقولوا) بس لما شاف العربية عدت عادى جدا قاللى لو كنا بالمازدا دلوقتى كان زمان الأرضية اتشقت.

الثبات مش هزود حاجة على كلام الناس الخبرة اللى هنا بس هقوللكم إن لولا القصور الذاتى و تركيز والدى فى الطريق ما كانش بياخد باله أصلا إننا على ملف مهما كانت سرعتى و أنا أصلا ما بجريش يعنى آخر ما وصلتلوا بعد التليين 120 كم/ساعة

الفرامل حلوة ماشاء الله وموضوع مسافتها طويلة برده مش حاسس بيها أوى مقارنة بالعربيات اللى ركبتها

الكماليات عموما محسسانى إنى راكب BMW بستعملها بغرور و تعالى بصراحة المالتى فانكشن الكل بيحسدنى عليه لما تجيلى مكالمة مثلا و بضغطة صغيرة على التارة أعمل MUTE للراديو

أو الباركينج سيسورز اللى كل اللى بيركب العربية بيبقى مستغرب أوى إنه عندى فى العربية

التكييف ماشاء الله تحفة بجد و يكفى إنى أقوللكم إن لحد اللحظ دى عمرى ما شغلته على آخره و إنى و العرببة منقوعة فى الشمس 4 ساعات و مسافر بيها الساعة 3 العصر يعنى فى عز الحر أسرتى كلها كانت بتطلب منى أوطى التكييف أو أقفله خالص من قبل ما نطلع على الطريق الصحرواى و اضطريت فعلا إنى أعلى درجة الحرارة و أوجهه ناحية الأرض عشان ما أقفلوش


الباور بتاع العربية ناعم و جميل مع الأخد فى الاعتبار إن دى أول عربية أسوقها بباور فماعنديش مجال للمقارنة بس أكتر حاجة مضايقانى فى العربية اليوتيرن و الركنة موضوع المدى القصير للدركسيون ده معصبنى فيهم جدا و ده يمكن العيب اللى غايظنى لحد دلوقتى + عيب برده غبى شوية مكان الأذرع أو الشدادات بتاعة الشنطة و البنزين مزنوقين جدا و بضطر أفتح الباب عشان أعرف أفتحهم

الفتيس كويس ماعدا العضة القوية أوى اللى فى التانى هى غلسة بصراحة و مازالت قارفانى بس أدينى بتعود عليها

لحد دلوقتى ما قابلتنيش أى عيوب تقفيل الحمد لله من أى نوع حتى لما المالتى فانكشن علق مرة أيمن قاللى أصلحه إزاى و اتظبط الحمد لله

الشنطة بقى دى حكاية لوحدها و ليها تقرير خاص أسيبكم مع الصور


دى جزء من الحاجات اللى كانت شايلاها الشنطة و الحاجات بالكامل كالتالى

1- شنطة سفر ضخمة (75سم طول * 50سم عرض * 30 سم ارتفاع)
2- شنطة سفر كبيرة (55 سم طول * 42 سم عرض * 20 سم ارتفاع)
3- أيس بوكس 26.4 لتر
4- بدالة كبيرة
5- شنطتين سفر صغيرين
6- شنطة ظهر كبيرة
7- شنطة لاب توب
8- 3 كراتين مانجو (2 كرتونة سطحية بتاعة فاكهة و كرتونة كبيرة)
9- كيس زى أكياس كارفور كده مليان مشتريات صغيرة بس على آخره
10- عدة العربية طبعا و شنطة الغطاء الجميل بتاع أيمن اللى يتدفس فى أى حتة من غير مساحة
و والله كان لسه فيه فراغ لو عايزين نحط حاجة تانية بس مش صلبة يعنى هدوم قماش حاجة زى الغطاء كده

دى بالذات عشان الناس اللى سألتنى جبت برسونا ليه و ما جبتش جين2
هى دى إجابتى