الموضوع: عفشة وإطارات وأيه رآيكم

السلام عليكم ،،
وكل عام وانتم بخير

العربية كانت عندي عايمة علي الاخر مع صوت صفارة جامد وانا علي الطريق وكنت عارف السبب و هو الاطارات كانت ممسوحة علي الاخر .. ثانيا المساعدين الخلفين كانوا ضايعين خالص يعني مزيكة حسب الله وانا ماشي بسيارة متميزة عن الغير . نزلت اشتريت عدد الاطارات ماركة بيريللي التركي مقاس 14/185/65 بسعر 320 للاطار بعد تركيبهم روحت للعفشجي ركب ليه جلب المقصات في العجل الامامي والمساعدين المونرو في وظبط كل حاجة واخد 70 جنية .. السؤال كويس ولا انضحك عليه ؟؟؟
بعدها طلعت للميكانيكي ركب ليه سير الكاتينة ولاحظ تهريب زيت جاي من عند غطاء التاكيهات فاشتريت له جوان غطا تكيهات بـ 25 وقال ان فهوة البوابة عندك مش نظيفة ومحتاجة تنظيف فاشتريت له اسبراي الخاص بالتنظيف الكاربرتير واخذ يضخ الاسبراي وهو بيزود بنزين من سلك الاكسيرتير
بعد ما قفل وكله تمام طلب مني 80 جنية مش عارف دة كتير ولا معقول .. المهم بعد ما مشيت من عنده لاقيت لمبة في التابلوه مكتوب عليها servic مضاءة والعربية وانا واقف كأنها عاوزة تبطل وتقف فرجعت ليه اعد يضغط علي خرطوم فهوه البوابه واكد علي القفيذ بعدها لاقيت اللمبة طفت بس مازال صوت الماتور مش عجبني خالص حسيت كانه عليّ وعاوز يبطل بس مش بيبطل
وكمان خليته يركب ليه فلتر بنزين gm بـ 35
بعدها روحت لمركز قريب مني ظبط زوايا كمبيوتر بـ 15 واعطاني كارت متابعة للعربية
نيجي للنتيجة :
العربية اصبحت ثابتة في السرعات وفي البطيء
لمبة servis انطفئت
العربية بعد ظبط الزوايا اصبحت حاجة تانية خالص
دة كل الحكاية واسف علي الاطالة وعاوز رأيكم في الموضوع
وكل عام وانتم بخير ،،