الموضوع: تجربتي و تقيمي للكرولا mmt

المشاركة الأصلية كتبت بواسطة horas3000

اول ما وصلت مصر طلبت من مكتب التاجير اللي بتعامل معاة انو يبعتلي عربية زي كل سنة و بالفعل تاني يوم لقيتهم باعتينلي تويوتا كرولا موديل 2008 المزودة بعلبة التروس ال mmt الفئة الاولي. في الاول كنت خايف و مقلق من العربية خصوصا بعد الكلام الكتير اللي سمعتة عن العربية و في اول محاولة لقيادة العربية ايقنت انها مش عادية و محتاجة اسلوب مختلف في السواقة و ده الراي اللي كونته من خلال تجربتي للعربية في غضون 3 اسابيع داخل القاهرة و علي طرق السفر.

اولا: العربية ليست اوتوماتيك و هي لا تمت للاوتوماتيك بصلة. العربية مش يتمشي لوحدها اول متجيب الغيار زي الاوتوماتيك لما تجيب علي ال d كمان بتريح علي المطالع و المنازل و بتكرك في الطلوع كانك سايق مانيوال و مش مظبت رجلك علي الدبرياج و ده كان غير مريح ليا بالمرة لكن مع الوقت اتعودت.

ثانيا: داخل المدينة العربية مريحة و رشيقة و سهلة القيادة و علوها عن الاض مناسب لكن موضوع الغيارات ده بياخد من تركيز الواحد كتير خصوصا في الزحمة عشان كدة اكتر من مرة اقلبها مانيوال و اتحكم انا في الغيارات. برضه و بسبب النقلات العربية سحبها ضعيف خصوصا علي وضعية ال e لان العربية بتبقي تقيلة جدا في الطلعة و الوضع بيكون احسن علي ال es لكن التحكم بالمانيوال هو احسن حاجة و اهم ميزة فيه ان العربية بتنزل بالنقلات لوحدها عند تخفيض السرعة و بالتالي الواحد بيركز في التسارع بس و ده شيئ لطيف. و بالنسبة للموضوع ده فيه عيب رخم الا و هو ان دواسات النقل اللي ورا الدريكسيون بتلف معاه و علي الملفات مبتعرفش توصلهم و في اكتر من مرة ادوس علي ال - بدل ال + لذلك علي الملفات لازم تستخدم عصا النقل نفسها تجنبا للغلط..

ثالثا: علي طريق السفر موضوع النقلات ده شبه بيختفي و القيادة علي المانيوال ممتعة جدا و بتقدر تستغل قوة المتور كويس و الوصول الي السرعات بشكل اسرع. بالنسبة للثبات العربية بشكل عام ثباتها جيد لكنه مش رائع و احسن حاجة ان نظام التعليق بيتعامل مع الطريق بشكل كويس و ده يرجع الي نعوميتة عشان كده لبس المطبات و الحفر الشعور بيهم بيبقي مخفف. و بسبب النعومية ده بعد ال 160 ابتديت اقلق من العربية و ثقتي بيها بتقل (يمكن بسبب تعودي علي الالماني) لكن بشكل عام العربية ثباتها احسن من عربيات كتير في فئتها لكن لسه قدامها كتيييير عشان تقرب من ثبات الالماني.


اخيرا: بشكل عام العربية كويسة و يمكن مع السوفت وير الجديد اللي نزل العربية تكون احسن و ان كنت شايف ان موضوع ال mmt عبارة عن افتكاسه ملهاش لازمةو راي ان العربية تاخد 7 من 10 كتقييم عام و ان كنت شايف ان السعر اللي بتتباع بية كتير شوية

في النهايةاتمني ان يحوز تقييمي علي اعجابكم و ان يكون مفيد ليكم

------- تقيم سهل وجميل -- ولكن يوجد بعض الملاحظات اتمني ان تفيدك وهي


---- العربية هي في الاساس مانيول واصبح الان الجميع يعرف ذلك ولكن تقوم بالنقل كاتوماتيك ولكن بالتحكم من خلال السائق ولكن الاتوماتيك تتحكم العربية في الحركة دون تدخل السائق ولكن في الmmt ممكن ان تتحكم في سرعة وسحب العربية فمثلا داخل البلد موضوع السواقة علي وضع e وانا بسوق عليه علي طول ولكن في طريقة سهلة جدا وبسيطة تجعلك تتحكم في العربية عكس العربية الاتوماتيك وهي انك بسهوله لما تكون في اشارة او بتطلع مطب او في وضع الحركة البطيئة بكل بساطه بضغط علي الزر خلف الدريكسيون + يعطي سحب للعربية غير عادي عكس الاتوماتيك العربية تتحكم في الحركة...
وفي حالة ان العربية في وضع الحركة علي الطريق وتوريد ان تشد بيها وتسحب مجرد ان تضغط علي الزر خلف الديكسيون - في هذه الحاله تقوم بالتحكم في العربية والموضوع ليس فيه اي وجع دماغ او اي شي ...

ومع كل ده -- لما تكون علي وضع es العربية اكثر قوي مم يتخيل الناس .. وعلي ذلك بيكون مع بالعربية اشياء غير موجوده في اي عربية اخري وهي : -
المانيول -- بدون دبرياج - سهولة التحكم
الاتوماتيك --- مع قوة التحكم في العربية عكس الاتوماتيك الصريح
الاتوماتيك بالوضع الرياضي -- es قوة جبارة للعربية
.......
اخيرا العربية بتتحرك وانت واقف بدون الضغط علي البنزين كما انها اتوماتيك ...


بالنسبة للطريق السريع عن تجربة سفر علي الطريق الصحراوي ...

اولا العربية عند سرعة 120 او 140 لا تشعر بانك علي هذه السرعة --- ثبات وسهولة حركة ---
انا من طبيعتي لا اتعدي سرعة اكثر من 120 اول مره اجيب 140 لم تشعر بالسرعة ايضا -- وعن تجربة ايضا مرة عربية مازدا 3 من جنبي وكان سرعته بتذيد قلت واحد شجعني اذود الي ان وصلت الي 160 ولكن بدون احساس بالسرعة ثبات ماشاء الله --- قلت اهدي لان كان معي الاسره ---

التقيم في نفس الفئتها 9/10

الفتيس ليس افتكاس لان دول اوربا كلها بتعتمد عليه ... وكمان في العربيات الحديثه موجد فيها من فترة ..

بالنسبة للسعر اعتقد ان سعر اي عربية في مصر مبالغ فيه ولكن بالمقارنه مع اي عربية في فئتها هو موازي او اقل منها ...