مشكلة مع المدرسة المصرية للغات

**noureymo** · 19-08-2009 06:05 PM

السلام عليكم يا جماعة وكل سنة وانتم طيبين
المشكلة ببساطة ان بنتي رايحة اولى ابتدائي في المدرسة المصرية للغات فرع التجمع الخامس السنة الي فاتت بنتي دخلت kg2 في المدرسة والاتوبيس كان بيوديها ويجيبها بعد ما ضيعنا حوالي اسبوعين بنقنع في المدرسة انهم يروحولها عند البيت (بيت جدها) المهم السنة دي جدها نقل بيت تاني يبعد حوالي اربع دقايق عن البيت القديم
المدام راحت السنة دي تدفع المصاريف وتغير العنوان
اخدوا الاستمارة والمصاريف ومصاريف الباص والمدام مشيت وبعد نص ساعة كلموها وقالولها ما بنرحش العنوان ده
طبعا مامتها كلمتني وقالتلي وكلمنا مشرفة الباص والمديرة بتاعتها وربنا قدرنا واقنعناهم انهم ياخدوا الاتوبيس ويجربوا العنوان ويتأكدوا انه هيوفرلهم اربع دقايق عن العنوان الاولاني علشان العنوان الجديد على الشارع الرئيسي وفعلا راحوا امبارح وكلمونا وقالولنا خلاص الموضوع انتهى وهنكلمكم بكرة علشان تكون قلنا لادارة المدرسة واعتمدنا خط السير
المهم كلمونا النهاردة وقالوا ان الاستاذة مديرة الحركة رفضت طبعا مامتها اول ما سمعت كده ارتبكت ومش عارفة تعمل ايه وكلمتني
طبعا انا كلمت المدرسة من هنا في ابوظبي ووصلت للاستاذة الفاضلة مديرة الحركة وقعدت اكلمها نص ساعة تقريبا علشان تقتنع
وكل ما تقولي سبب اديها حل مقنع جدا لدرجة انها في الآخر قالتلي مش هنروح ومن غير نقاش
هي بصراحة ما تجاوزتش في الكلام لكن كانت حد جامد جدا ومش عاوز يقدر المشكلة الي احنا فيها لدرجة اني فهمتها ان احنا ممكن نروح الصبح عند المكان الي هي عاوزاه والبنت تركب من هناك وبعد الضهر تودي البنت البيت علشان ما فيش حد هياخدها ومامتها بتشتغل بعيد شوية ومافيش حد يا خدها خالص
في نفس الوقت كانت المدام وصلت المدرسة والمشرفات قدروا المشكلة وتقريبا ماعندهمش مانع خلاص بس لازم السيدة الفاضلة مديرة الحركة تديهم الاذن وطبعا المدام راحتلها وبرده رفضت
المشكلة اني مش في مصر وبيني وبينكم حتى لو في مصر مش عارف اعمل ايه الموضوع ممكن يكون باين صغير لكن فعلا موضوع كبير بالنسبة لينا
يا ترى يا جماعة حد قابل مشكلة زي دي قبل كده ويا ريت حد يقترح عليا اي اقتراح اصلي بصراحة بعد المكالمة دي والطريقة الي عمر ما حد كلمني بيها دي قبل كده وان كان ما فيهاش ولا كلمة فيها غلط او تجاوز حاسس باهانة على الاقل علشان احساسي انها تقريبا بتقول هو ده النظام ولو مش عاجبكم اتصرفوا وكمان تقؤيبا قالت انتم ازاي تاخدوا بيت جديد من غير ما تقولوا للمدرسة
اسف جدا يا جماعة وارجو تقدير الظرف
كل سنة وانتم طيبين

**ahmed4000** · 19-08-2009 06:12 PM

ايه نوعية البشر دى
هو انا المفروض استاذن قبل مغير العنوان ولا ده اتوبيس نقل عام مبيقفش الا محطات معينة
اقصى حاجة نسمع كلامهم فيها ونقول معلش هو الميعاد

لكن اى مكان انت ساكن فيه لازم يجى ياخدك من قدامه بدون جدال

اطلب تكلم حد اكبر منها يكون بيفهم شوية

ولو الوقت مش ضيق والموضوع مش سهل كنت قلتلك هدد انك حتمشى من المدرسة المتخلفة دى

**noureymo** · 19-08-2009 06:32 PM

شكرا لاهتمام حضرتك يا استاذ احمد
بصراحة موضوع التهديد بالنقل ده في دماغي وبفكر اعمله بس المشكلة الحقيقية ان البنت مش هتتقبل الموضوع علشان انا اتكلمت معاها قبل كده في اتلموضوع ده وهي مرتبطة بالمدرسة وباصحابها
وبعدين الدراسة بعد تلات اسابيع خلاص وصعب اوي موضوع النقل
تخيل حضرتك ان المدام راحت لمديرة مدرسة البنات وقالتلها الموضوع وبرده ما فيش حل تقريبا الموضوع في ايد الاستاذة الي اتكلمت معاها بس وما فيش حد تاني يقدر ياخد قرار في الموضوع ده
انا بفكر ابعت ايميلات للوزارة وبفكر اني احاول اجيب نمرة مكتب الوزير بس بصراحة خايف على البنت

**ahmed4000** · 20-08-2009 09:38 AM

والله مجتمع غريب
يعنى لو مدرسة حكومة كنا قلنا ممكن
لكن مدرسة خاصة وكبيرة وتعمل كده
يعنى هما عايزين منك ايه تنقل سكنك لحتة تانية

برده راى تروح لمدير اكبر من الاتنين

مش عارف حينفع معاك ولا لا بس ممكن تشوف تاكسى او عربية موثوق فيها وتوصلها كل يوم
انا بشوف الموضوع ده فى كل حتة بس مش عارف تكلفته ايه

**AhMeD EzZ** · 20-08-2009 12:54 PM

هي مش مدرسة
مستر ناجي و ميس فاتن

**Ahmed Selim** · 20-08-2009 01:23 PM

شوف مين مدير السيدة اللى كلمتها و أطلب تكلمه فى التليفون.

و قوله صراحة.....أنهم لو لم يوفرا حل للمشكلة دى اللى هى أصلاً المفروض متكونش مشكلة.....هتنقل البنت من المدرسة....و لو ملحقتش الترم ده هيبقى على الترم التانى و أنك هتقدم شكوى فى الوزارة مع نقل البنت كمان.

و معلش حتى لو الموضوع رسى على نقلها.....هى صغيرة لسة و أرتباطها بالمدرسة و أصحابها اللى هناك شوية وهتنساه.

**elassar2010** · 20-08-2009 01:57 PM

خلى اخو حضرتك او خال بنتك مثلا يروح المدرسة ويتكلم معاهم بحدة يا يوفقوا انهم ياخدوا بنتك من قدام البيت يا ياخد الملف بتاع بنتك وهتلاقى الف مدرسة هتوافق
وبالنسبة لبنتك هتزعل شوية وبعدين هتصاحب البنات الى معاها فى الفصل وهتنسى المدرسة القديمة

**aliabutaleb** · 20-08-2009 02:02 PM

مظنش ان العنف هايجيب طريقة
المدارس غير الحكومية دي عزبة
ومديرها ناظر العزبة
وكلها بيمشوا بمنطق اللي مش عاجبه يمشي وهاييجي بداله عشرات
طبعاً دلوقتي احنا قبل العام الدراسي بكام يوم
لو فيه بديل بمستوى كويس انا رأيي إنك تحول بنتك لمدرسة تانية
إنما لو مفيش غير كدة يبقى
أنا رايي حضرتك دور على معرفة في وزارة التربية والتعليم ويا سلام لو إدارة التعليم الخاص تخلص الموضوع بتليفون صغير
وطبعاً لو معرفة من الشرطة بس تكون في منصب كبير أكيد هاتجيب نتيجة ان شاء الله

**د.أحمد سمير** · 20-08-2009 03:10 PM

الحل الأفضل هو ما قالوه الإخوة من التهديد بالنقل من المدرسة أو النقل الفعلي ..

الحل العملي : اللي أعرفه أن هذه المدرسة فيها مدرسات أو مشرفات بينقلوا الطلاب بفلوس أقل من الباص ..
المشكلة هي عدم الأمان النسبي وحشرهم للولاد فوق بعض ..
لكن لو لم يكن هناك حلاً .. فلا يوجد سوى هذا الحل وبشوية توصية أو فلوس زيادة أمور البنت هاتتظبط مع الميس صاحبة العربية ..

تقبل خالص مودتي

-

الموضوع: مشكلة مع المدرسة المصرية للغات

LinkBack

أدوات الموضوع

عرض

-

-

-

-

-

المواضيع المتشابهه

معلومات عن axon للغات

مشكلة فى فتيس افيو 2007 المصرية هل لديكم حل لها ؟

مدارس المستقبل للغات

مشكلة دخول الأتوبيسات المصرية للمغرب

الكلمات الدلالية لهذا الموضوع

المفضلات

المفضلات

ضوابط المشاركة