الموضوع: مشربتش من نيلها .... فعلا ؟؟

دعوات التغيير للأفضل وحملات النصح والإرشاد بالتأكيد اتجاه نحتاج له طوال الوقت لتحسين حال بلدنا العزيزة ومعالجه السلوك السيئ والرقى بفكرنا وفعلنا

ولكن دائما ما يراودني شعور غريب جدا من جانب الأشخاص أصحاب الوعظ والإرشاد والسباقين بالنصح , ترى بعضا منهم يعتبر الموضوع أكل عيش لطبيعة عمله في مجال الصحافة أو الإعلام , تجد البعض يعتبرها وجاهه من باب انه قرأ كثيرا ومستواه الاستيعابي الفكري تعدى حدود عامه البشر بمراحل ووصل إلى قمة الرقى وأصبح هدفه هو النصح لا أكثر , نرى البعض يعتبرها سرد لخلاصه خبراته في الحياة بالخارج وكيف أن الغرب منظمين لأبعد الحدود ولديهم احدث أساليب النظام والتخاطب الفكري والوعي ومهارات عديدة لم نسمع بها من قبل

الاعتراض ليس على الناصح بالعكس فمشكورا قد قدم نصيحة , ولن أتكلم عن كون نصف تلك النصائح خاطئة أو على الأقل لا تناسب طبيعة عادتنا وطبيعة حياتنا اليومية فالأخ صاحب النصيحة عمل اللي عليه وزيادة حبه

الشعور الذي يراودني نحو تلك الشخصيات هو شعور منفصمى الشخصية !!!

تجد الأخ الواعظ يتشدق بعبارات الالتزام والتفاني في خدمه قوانين المرور وهو أول من يخالفها , تجده أعلى صوت في المطالبة بمنع غيره من الانتظار الخاطئ وتعطيل مصالح الغير وهو أول من ينتظر صف ثاني , تجده أول الحاضرين في شكوى من حال الشارع وكيف أصبحت الأمور أكثر من مجرد خانقه وقد يكون هو السبب الرئيسي في تلك المشكلة

لا انصح بالسكوت ولست من أعداء تلك النوعية إلا أن الهدف بسيط , ابدأ بنفسك عزيزي الواعظ وحسن من سلوكك والتزم قد الإمكان , فبالرغم من أن المنتدى أو خلافه عالم افتراضي إلا انه يحاكى حياتك اليومية بشكل أو بأخر , فمنا من لديه الشخصية الدفاعية المتحضرة في المنتدى والشخصية الهجومية الهمجية في خارج المنتدى

نرجوكم إما أن تكونوا متحضرين عملا وقولا , أو أن تظهروا لنا أخطاءكم فنعمل على تصحيحها سويا , فمن بين الناقمين على حال الشارع يزعجني دائما النوعية المتشائمة المتكبرة والمستعرضين لحضارة الغرب بكل فخر وكأنه تجرد من كونه مصري أو جزء من حال الشارع ولديه من الأخطاء يوميا ما ينحيه تماما عن كونه

مـشربش مــن نـيـلها

المشاركة الأصلية كتبت بواسطة ahmed0nouh

بالظبط ده اللى انا بتكلم عنه واقصده , ليه دايما بنقول حال الشارع وحش والسلوك سئ واحنا مش واخدين بالنا اننا جزء لا يتجزء من السلوك ده

انا زيك بالظبط بنتقد وبلاحظ اوى اخطاء غيرى وبحاول على قد ما اقدر معملش زيهم , لكن انا مقتنع تماما انى وانا سرحان وجيت من الشمال لليمين فى مره علشان الحق الشارع بتاعى غلطان وجزء من الشارع الغير منظم , وانا متاخر على شغلى وباخد غرز وبجرى فوق حد السرعه همجى ومش حضارى , وانا بجرى وبهدى بس فى الحته اللى فيها رادار متهرب من القانون وانا بركن صف تانى فى شارع 6 حارات علشان اجيب حاجه فى دقيقتين مازلت متعدى على حق غيرى

كل ده انا عارف انى بعمله غلط وانا مش مثالى ساعات بكون صح وساعات الشارع بيضطرنى ابقى غلط او انا من غير اضطرار بعمل حاجه غلط علشان خدت عليها انى اعملها غلط , الهدف كله ايه ننصح ونوعى وده المطلوب لكن دايما نتكلم بصيغه اننا متحضرين وباقى الشارع شويه غجر ده اللى بيزعلنى

احييك على اللى انت بتعمله لاى هدف كان وفعلا الاعتراف بالخطأ هو اول طريق النجاح , زى ما انت قولت مش مصر ولا الشعب المصرى اللى وحش

احنا سواء فى المنتدى او خارجه اللى وحشين وهمجيين وبنمشى غلط لو كل واحد فينا بص لنفسه وحسن من سلوكه ولو عاده واحده يبطلها فى الاسبوع 6 شهور وهنلاقى الوضع اتغير تماما بدل ما نفضل محلك سر وبس عمالين نشاور على بعض ونقول بص بيعمل ايه !!!

كلامك صحيح

أنا كتير - مش أحيانا - باتصرف غلط

مرة ..

كنت ماشي بالليل و قافل القزاز و باسمع أسامة منير و مزاجي عنب .... و فجأة لاقيت سواق تاكسي جه جنبي و قرب مني قوي و بيقوللي بزغيق (يعني انت اتعلمت كده ؟؟ ينفع كده )

أول ما نزل عليا إني قولتله : خير ؟ بالهداوة بس (لأن كان مزاجي كويس مش عايز اتخانق مش أكتر)


قاللي بلا هداوة بلا قرف ..انت تلبسني في الرصيف و تقولي هداوة ....و كان منفعل جدا و عمال يتكلم بحدة و قرب يشتم ..لحد ما قاطعته " أنا أسف يا سيدي" و الله ما شوفتك ولا قصدت و فضل يأنب و يقوللي أسف ازاي هو انت في الشارع لوحدك ..فقاطعته تاني " أنا غلطان حقك عليا"


و تحول الراجل من وحش كاسر الى المصري الجدع ..الطيب اللي ضحكته بالدنيا فورا

و قاللي "و المصحف انت عسل" وبس انت كنت هاتموتني لما نزلت من الشرع و خدت يمينك و أنا .....(وحكالي الحكاية)

اكتشفت من كلامه انى بكل بساطة اتغابيت عليه جدا جدا و أنا لو مكانه و هاكلم اللي عمل فيا كده كنت بدأت بـ(ياحمار ) على طول...


المهم ان الحكاية دي من زمان من ييجي سنة ونص

ومش قادر أنسى الموقف لأني اتعلمت منه كتير ..


1 - اسمع الأول طالما ما فيش شتيمة و قلة أدب

2 - ان انا مش نبي ...بغلط و ممكن اعمل بلاوي ..ومش معنى اني مش قاصد اني ما عتذرش (جتى لسواق ميكروباص)

3 - كلمة انا غلطان دي سحرية .....احسن كتيييييييير من انا اسف

4 - الناس كويسة ....بس جرب تكلمهم انت كويس الأول (بس طبعا في ناس ولاد 65 في 82 ودول بالجزمة على طول)


ما عدتش باقفل القزاز للأخر و اعلى الراديو او الكاسيت قوي لأن ده بيعزلك صوتيا عن الشارع

اهتمامي زاد بالمرايات اكتر من الأول