انا في المعتاد مش بدقق قوي في الحاجات دي بس والله انا دمي محروق من شبكة فودافون دي...

انا مشترك في عرض الكارت كارتين وكمان اصحاب بلس وبعمل حسابي ان الأرقام اللي بكلمها كتير بتصل بيهم في اوقات الرصيد المجاني.وكمان حاططهم على اصحاب بلس...

الغريبة اني لقيت رصيدي بيخلص برضه وبطريقة مستفزة جدا...

قلت اكلم خدمة العملاء واشوف السبب ايه بعد ما الموضوع اتكرر اكتر من مرة...

سألتهم قالولي ان الرصيد المجاني بيستخدم من الساعة 1 ص الى 9 ص...بس بيبدأ استخدامه بعد ما ينتهي الرصيد الأساسي!!!
يعني عشان استفيد من العرض قدامي حل من اتنين... مشحنش اصلا عشان ما يضيعش عليا الرصيد الأساسي...وطبعا لو ماشحنتش مش هاخد رصيد اضافي اصلا
والحل التاني اني اشحن واخلص رصيدي يوم بيوم عشان استفيد من العرض!!!

المهم اخدت الكلمتين دول وبلمت...وقلت في نفسي اللهم اخزيك يا شيطان...اللهم اني صائم


قلت اسأل على موضوع ان الدقيقة بقت ب 19 قرش لكل الشبكات -زي اتصالات يعني- يقوم الأستاذ المحترم يقوللي ان ده للخطوط الجديدة بس...شفتوا قلة ادب اكتر من كده!!!
يعني العميل القديم اللي متمسك بالشبكة بتاعتهم يا يقفل الخط ويشتري خط جديد او يدور على حيطة ويخبط دماغه فيها...

هارجع واقول انا الغلطان اني متمسك بالشبكة دي اصلا ييجي 10 سنين لحد النهاردة...
طب ما انا اريح دماغي واجيب خط اتصالات بالعند في فودافون واعمل كل اتصالاتي منه وخط فودافون اسيبه مرمي من غير ما اشحنه زي الكلب في اي موبايل قديم عندي لحد ما الناس تنساه...


بس والله حاجة في منتهى قلة الذوق وسرقة عيني عينك

حسبي الله ونعم الوكيل