الموضوع: هو الخداع و النصب وصل للدرجة دى؟؟

فى وسط البلد بالقاهرة كان هناك من يقف على الرصيف وأمامه صاج معدنى وينادى على بضاعته وهى عبارة عن الكتكوت العجيب اللى بيرقص على أنغام الموسيقى ، وتجد كتكوت حى ملون بألوان زاهية ومبهجة يقفز ويطنطط على أنغام موسيقى تصدر من جهاز تسجيل مع البائع ، ويبيع الكتكوت بــ 5 جنيه ، فى حين أن سعره الحقيقى فى الأماكن الشعبية لايتعدى 25 قرش ، وفجأة وأثناء أنبهار الناس بهذا الكتكوت ومنهم اللى أشترى طبعاً ، وجدنا أمين شرطة يضرب الصاج بقدمه مع سيل من التوبيخ وبعض الألفاظ للبائع " ومش هاتبطل برضه اللى بتعمله " ليكتشف الجمهور المفاجأة أسفل الصاج وهى عبارة عن سبرتاية بلهب نار أسفل الصاج وهى ماجعلت الصاج ساخن جداً وبيلهلب الكتكوت فمايقدرش يقف على الصاج فيقفز من شدة الألم والناس تتفتكر أنه بيرقص صحيح ! ولاحول ولاقوة ألا بالله العلى العظيم

أما حكاية البيض فكما علق الأخوة بأنها حكاية قديمة ومحفوظة فى القاهرة ، ولكن الأخ بسام ناجى بيستعجب بأن أزاى النصاب يكسر 60 بيضة ممكن يأكلوا جيش بحاله ، فيا أخ بسام هوه النصاب معقولة برضه يعمل كده ويستغنى عن 20 جنيه تقريباً برضه مش ضامن هايعرف يجيبهم ولا لأ ، الحكاية ياسيدى أنه بيروح عند أى مزرعة فراخ أو النضيف فيهم بيروح عند أى حلوانى ومن صندوق الزبالة بياخد البيض المكسور ويشترى عليهم 3 بيضات فقط لاغير هم اللى يكسرهم على باقى القشر ليحبك الحكاية
وهناك قصص كثيرة جداً مشابهة تماماً لحكاية البيض ، زى طفل صغير يجلس على الرصيف وجنب منه صينية كبيرة وعليها وعلى الأرض أطباق كشرى وقعت منه وهوه بيعيط بحرقة شديدة جداً ويقولك أن المعلم هايضربنى ويموتنى وأحياناً يكون جنبه واحد تانى يعمل كأنه مش تبعه ويقولك الحكاية دى بدلاً من الطفل وفى الأخر يقولك حاول تديله أى حاجة مساعدة ، حرام الواد شكله غلبان وأصحاب المحلات ماعندهمش رحمة
ونفس القصة بالظبط عربية أيس كريم مقلوبة فى الشارع وواحد حاطط أيده على خده وبيعيط والثانى بيشرحلك الموقف وبرضه حاول تساعده ده باين عليه غلبان !
والقصص كثيرة جداً وكل ماهفتكر حاجة هابقى أقولهالكم