استفسار عن مشكلة في عوامة البنزين
بسم الله
الاخوة الافاضل لي استفسار ارجو افادتي عنه :
من ثلاث اسابيع لقيت مؤشر البنزين في العدادات مش شغال روحت للكهربائي فك العوامة وقالي العوامة عاوزة تتغير .. روحت لكهربائي تاني عشان كنت شاكك قالي نفس الموضوع ..
فعلا جبت عوامة بنزين وركبتها اشتغلت تمام .. مشيت بالعربية فترة والمؤشر مش عاوز ينزل لتحت مع استهلاك البنزين .. روحت فولت العربية المؤشر ارتفع لأخر حاجة .. ومع المشي لقيته نزل لحد شرطتين .. وبعد كده بطل ينزل .. ما اني استهلكت في البنزين اللي اكتر من كده .. روحت للكهربائي فك العوامة وركبها تاني المؤشر اقرا القراية المظبوطة .. قالي دي كانت معلقة .. مشيت فترة بيها برضو نفس المشكلة المؤشر مش عاوز ينزل مع الاستهلاك .. فكيتها روحت للمحل اللي كنت اشتريتها منه .. من هنا لهنا .. اداني الاصلية بتاعتها ودفعت الفرق .. وكان فيه اختلاف بين الاخيرة اللي جبتها واللي القديمة اليوغسلافي .. ان اتجاه الدراع عكس اتجاه الدراع في الجديدة اللي جبتها .. فقالي ممكن يكون هو ده العيب اللي بيخليها اول ما تركب في العربية ما تشتغلشي .. بمعنى ادق فيه حاجة بتقف مع الدراع بتخلية ما يتحركشي .. مع العلم لما بنركب العوامة من غير ما ندخلها في التنك وبنحرك الدراع بالايد فوق وتحت المؤشر بيتحرك تمام خالص على كل الشرط اللي في التابلوه .. ركبنا العوامة الجديدة ادت القراية المظبوطة للبنزين جوه التنك ونفس المشكلة وقف المؤشر وما بينزلشي .. فكيتها بعدها بكام يوم وركبتها تاني راحت مدياني القراية المظبوت تاني .. ونفس المشكلة المؤشر ما بينزلشي مع الاستهلاك .. يا ترى ايه المشكلة ..
ملحوظة : متأكد تماما ان العوامة مظبوطة وما فهاشي مشكلة ..
هل التنك ممكن يكون اتخبط من غير ما احسن او حصل فيه حاجة هو اللي بيعمل المشكلة دي
حاجة تانية: انا كان عندي مشكلة قديمة من اكتر من سنة خاصة بأمبير البنزين وأمبير الحرارة .. وهو اني لو كنت راكن العربية في الشمس وجيت دورت العربية بلاقي المؤشرين بتوع الحرارة والبنزين ارتفعوا ٣ شرط عن الطبيعي ونفس الوقت لو شغلت النور الصغير .. بلاقيهم ينزلوا للآخر ناحية اليمين مع بعض .. والمشكلة دي بتروح لو مشيت على الطريق شوية من غير ما يكون فيه زحمة قدامي .. بمعنى اصح بيكون الهواء دخل للعربية مش عارف من اي ناحية المهم انها ما السفر على طريق طوالي في عز عز الشمس ما بتحصلشي المشكلة دي .. السؤال هل الموضوع ده ليه علاقة بموضوع طرمبة البنزين (لا اعتقد) لأنه ببساطة مؤشر الحرارة زي ما هو .. ما فهوش مشكلة ..
انا عارف اني طولت عليكم بس معلهش كنت حابب اديكم صورة كافية .. لأني بصراحة تعبت مع الصنايعية ومش عارف اعمل .. وجزاكم الله خيرا