السلام عليكم
استاذى العزيز عمرو اولا انا عرفت كل الناس المحترمين المشتركين بالرابطه وعارف الأسماء دى لأنى قريت كل المشاركات و عرفت ان انتوا بتنزلوا مع بعض لو حد فيكو احتاج مساعدة وانت متقلش عن الناس المحترمين دول فى حاجه ياراجل كفاية النية
نيجى بأه للموضوع المهم و سؤالك عن التكييف
هكرر كلام سمعته كتير من الناس على النت وغيرة سيبك من كلام الصنايعية و فتاويهم الجميله معظمهم بيفتوا او مش عاوزين يوجعوا دماغهم .. اعمل اللى انت شايفه صح ولو مطلعش صح صدقنى مهما كان المبلغ اللى دفعته هتكون اتعلمت برده انا عربيتى 85 ومكيفة لما اشتريتها من سنة كان اللى بيركبها سواقين ومعندهمش ضمير طبعا اى حاجه لزق وخلاص لك ان تتخيل طبعا البهدلة اللى كانت عليها وطبعا التكييف كان ميت وده اول سبب غيرت علشانه العربية كنت محتاج عربية مكيفة وفى نفس الوقت مربوط بمبلغ معين بعت 27 واشتريت ريجاتا وبدأت فى تظبيط الكهربا والتكييف اول حاجه علشان على اساسهم كنت هقرر ابيع ولا اخليها الماتور حالته كانت كويسة غير كده كانت متبهدلة بص ياسيدى ومعلش طولت عليك الصامولة اللى انت بتتكلم عليها خرطها مش موال ولا حاجه والكباس كله بيتفك فى دقيقة والخراطيم بتتجاب جاهزة او بتتعمل عند واحد فى كوبرى التجنيد فى جسر السويس وهجبلك عنوانه والمسألة تستاهل انك تتعب علشانها يوم يا سيدى مش هقولك ساعتين اما بالنسبة لفتوى الصنايعى ان التكييف بتاع الريجاتا ضعيف ده كلام ملوش اى اساس من الصحه مش هقولك تكييف تلاجه بس هقولك كفاية انك فى عز الصيف جايلك هوا ساقع و اسرتك راكبين معاك مرتاحين والهوا الضعيف اللى بتقول عليه طبيعى لأن التكييف مش مشحون ومفيش كباس وفى تسريب الموضوع بيختلف بعد الشحن تماما وعلى فكرة انا كنت بشد شوية حاجات فى العربية وطلعت الماتور لمجرد العند فى الصنايعية وعملت اللى انا عاوزة الكلام ده من اسبوعين ولحد دلوقتى مشحنتش التكييف لأن الجو كويس قولت اخلينى على الشتا بيكون الصنايعية دول مش لاقيين شغل ويتعمل بمزاج علما بأن الكهربائى بتاعى هو نفس بتاع التكييف واد مخلص وسريع ودقيق ومش بيغشنى ولا بيشتغلنى وبرده بعمل اللى فى دماغى بالنسبة للتابلوه فكه مش معضله وتخيل منظر التابلوه عندى كان عامل ازاى على الحالة اللى وصفتها مفيش جزء معملتش فيه شغل هو مش مكسر بس كانت قواعد التثبيت مشرخه القواعد اللى فوق (2) واللى تحت (4) اخدت الورشة لحسابى وفكيت التابلوه وسبت العربية عند السروجى يغير السقف والأرضية وعشت معاه بنفسى كاوية لحام بتتسخن على بوتجاز وسلك مفرغ بتاع الناموس اللى على شباك الحمام او خلف الشبابيك الألوميتال عارفه طبعا عارفة المهم قطعته مربعات صغيرة و حطيت على كل شرخ مربع من الناحيتين ونزلته بالكاوية وطبعا فى فوطة غرقانة مية من تحت التابلوه علشان السلك ميعديش او مبوظش الناحية التانية المهم تعالى اتفرج عليها دلوقتى ما شاء الله لا بيتحرك ولا بيزمر ولا بيزيق وانا ماشى طبعا الطريقة دى شوفتها عند بتاع الفايبر وانا بلحم شرخ فى الإكصدام الخلفى ابو 600 جنيه اما عند الأنابيب الفايبر اللى ورا التابلوه اللى بتدى لفتحات التكييف عبارة عن انبوبتين فيهم واحدة بتدى للفتحة اليمين والنص والتانية بتدى للشمال وبيركبو معشقين فى بعض دول قبل ما اركبهم فى بعض لفيت على كل طرف من كل انبوبة اسفنح لإحكام الهوا ومنع التسريب ولو التابلوه بتاعك متفكش قبل كده ان شاء الله مش هتحتاج تفكهم بس صنايعى يكون محترم علشان يأكد انهم مفيهمش تسريب.. فى خلف الكنسولة انبوبة سيبك بأه من اللى فات وركز فى دى لو فكينا الكنسولة دى ( متثبته بمسمارين فى الجنب )هتلاقى انبوبة مشترك واخدة من فتحة فى صدر العربية وبتدى للأجناب وبتدى للكنبة اللى ورا الأنبوبة دى يا باشا لازم تتقفل ملهاش اى تلاتين لازمة قفلتها بحتة عازل حرارى بخمسة جنيه وسبت الأنبوبة الفايبر مكانها علشان المنظر لأن هتلاقى خلف الفتيس ما بين الكرسيين فتحتين فى الكنسولة محبتش انهم يكونو فاضيين انما منعت الهوا عنهم وبصراحه قولت السواق اولى بشوية الهوا دول وفى كل حال الهوا بيوصل للخلف من الفتحه اللى فى النص .. تعالى بأه نرتب الكلام ده علشان شكلك هتزعل منى اصلى توهتك وكمان انت حسيت ان القصة كبيرة بص يا استاذ عمرو رقم واحد هنفك الكباس اللى فكه مش بياخد دقيقه ونعمل الصامولة فى ربع ساعه عند الخراط بعشرة جنيه 2- هنركب الكباس والمواسير و الراجل هيكبس التكييف هوا ويوصل جهاز قياس ضغط الهوا لمدة نص ساعة ويشوف هيزل الضغط ولا لا علشان طبعا ميروحش الفريون وفلوسه على الأرض وعلى فكرة اى تسريب داخل السيارة مش هيهرب الفريون بالشكل اللى انتى متخيله لذلك خلى التابلوه وفتحاته اخر حاجه 3- فى حالة ان الضغط تمام ومفيش تسريب لا من انابيب ولا أولسيهات هيشحن ويجرب الشحن من 115 جنيه الى 150 حسب نوع الفريون والصنايعى كمان 4- الهوا ضعيف فى شوية حاجات لازم وضرورى تتعمل اولها غسل السربنتينة كويس اوى غسله محترمة ( مكانها أمام الرديتر ) هتحس بفرق شاسع - تنظيف المروحة بتاعة التكييف الموجوده امام قربة المية بتاعة المساحات او خلف التابلوه من الحوض - فى افتكاسة من اختراعى تشغيل مروحة التبريد بمجرد تشغيل التكييف هتبرد العربية طول الوقت و بحس برده بفرق وطبعا لو مش عاوز تبتكر سبها زى ما هي لأن فى معظم الأحوال التكييف بيسخن العربية بالتالى المروحة هتفضل شغالة او على فترات متقاربة جدا 5- مهم جدا ان يكون عزل العربية كويس من الدواسه وخلف التابلوه ومن الحوض كمان فى صاجه فاصله ما بين الماتور و التكييف دى الفابريكة بتاعتها عليها عازل حرارى المفروض بس والله انا ما كنت اعرف كده وعملتها من دماغى وبعد كده شوفتها فى ريجاتا فابريكا طبعا كل الكلام اللى انا بقوله ينطبق على ريجاتا 85 s لأنى معرفش شكل النوفا من جوه ولو ان الفرق مش هيكون كبير على حد علمى 6- حاول دايما ان تكون كهربة العربية مظبوطه و الماتور كمان علشان التكييف ميبرجلش العربية ... اخيرا بأه هتستمتع بتكييف حلو مش تلاجه والتكلفة لن تتعدى 250 جنيه الا اذا كان فى حاجه غير اللى حضرتك قولتها وممكن بعد ردى توصفلى حالة السيارة والتكييف عندك وعلى فكرة ماتور الريجاتا ايا كان موديل العربية يستاهل اننا نشغل التكييف بتاعها وخصوصا انها نازله كده بتكييف اما عن فتوى التكييف اليابانى انا مش معاه لأسباب اولها انى مش بحب اعدل اى حاجه فى الفابريكة الحاجه التانية ان العربية طالما فيها تكييف ليه مشغلوش على ابوه حتى لو هغير معظم اجزائه .. اما عن خوفك من فك التابلوه يا استاذ عمرو احب اقولك انك لو هتركب تكييف يابانى هتفك التابلوه برده والتكلفة هتكون اعلى بكتييييير وانا هستنى ردك و لو احتجتنى فى اى حاجه فى الموضوع ده انا تحت امرك واسف للإطالة بس حبيت الرد يكون وافى مع انه برده منقوص بس بالمناقشة نكملة وخلى بالك ان التكييف بيرفع من ثمن العربية من 2000 الى 3000 جنيه ولو مش هتبيع قولى طموحك ايه فى اكتر من عربية 1500 سى سى مكيفة صالون واسع ما شاء الله ثابته وبعدين بنت اصل وتعرف الصح وعمرها ما تعمل الغلط طول ما انت مراعيها