السهم الاخضر اللى فوق .. اول سهم فوق على حاجة عاملة زى الخرطوم :
اسمة : سـلك الشفاط " لو واصل ف الكربراتير عندك يبقى هو لو مش واصل يبقى مش هو لان الصورة مش مواضحة قوي"
مميزاتة : فية حاجة زى بكرة تحت الدريكسيون عندك البكرة دى لما بتشدها بتفتح باب ف الكربراتير علشان يسخن الموتور بسرعة
الصبح قبل متتحرك وخصوصا لو الجو ساقعة .. بيخلي صوت الموتور يعلي شوية كأنك ضاغط بنزين برجلك
عيوبة : ملوش عيوب حتى لو نسيتة .. هياكل بنزين بس شوية وهيسخن العربية لو وقفت ف اشارة او ماشى بطيئ لذا لازم
تطفية بعد متستخدمة .. وهو مش ضروري تستخدمة .. نادراَ لما بشغلة .. بسيب العربية تـسخن براحتها وبمزاج تحس ان العربية بحس انها مبسوطة بكدة ... لو مستعجل بشغلة طبعاَ .
ملحوظة : يجب الضغط على دواسة البنزين للربع مثلا وفى نفس الوقت شد الشفاط .. والسبب انى لما فكيت الكربراتير
قطع قدامى ضغط على باب الشفاط ف الكربراتير اللى بيسخن الموتور " الباب العلوي " شوفت طريقتة الميكانيكية بنفسى
وقعدت اجرب والعب لقيتة تقيل جداَ فى حالة عدم الضغط على دواسة البنزين .. طيب لو حصل وحضرتك نسيت تضغط
بنزين وشديت سلك الشفاط .. مش هيحصل حاجة ف وقتها .. هيكون بس تـقيل معاك ورخم وانت بتسحبة .. بس مع الوقت
هيتقطع السلك وتشتري غيرة بـ 18 ج بحالهم :) .. لما ضغط على الجزء اللى بيضغط علية دواسة البنزين برجلك وضغط
على فتح الباب بتاع الشفاط لقيتة سلس جدا ف ايدي " الكلام دة والكربراتير مفكوك ف ايدي برة وفاتح باطنة ومجهزة للاجراء عملية جراحية " وبالتالى لما حد يستخدم الشفاط اضغط بنزين وشد الشفاط .. العربية سخنت وتمام وهتتحرك .. اضغط بنزين تانى لحد الربع ونزل الشفاط علشان يرجع مكانة .. هتلاقية سلس ومية ف ايدك
ملحوظة اخري مهمة : تمن السلك 18 ج .. اسمة سلك شفاط ... لما تيجي تشترية قولة عايز سلك شفاط 128 .. هو نفسة بتاعنا هو بعينة وغباوتة . انما لو قلت لة ريجاتا لو غبي هيقولك مش عندى ! لو اللى واقف ناصح هيقولك هات 30 ج وتبص ع الكيس تلاقي مكتوب علية فيات 128 ! .. انا رميت الكيس للاسف كنت هصورهولك . تمام كدة ؟
السهم اللى على الخرطوم الغليظ اللى راكب ف العمة دة خرطوم الفايظ .. او الفائض .. دة بيخرج ابخرة الموتور ولو لا قدر الله بيطلع قطرات زيت او بخار ابيض معناها ان الموتور محتاج شمبر ولو دة موجود لا قدر الله بعيد عن السامعين ومالكها امين .. لازم تفكة من العمة علشان ميبهدش الكربراتير بعد فترة طويلة .. فك الخرطوم دة بعد مترجع من مشوار والعربية دايرة بص علية .. ليقت ابخرة عادية ماشى ركبة .. لقيت دخان ابيض كثيف ورائحة زيت شديدة " زيت محروق " وجوة زيت وبيطلع زيت برة وحياتة كلها مزيتة يبقى خلية مفكوك برة مش هيحصل اي حاجة ف العربية متقلقش .. سبب تركيبة ف العمة : الخواجة عملة علشان يطلع ابخرة الموتور زي مقولنا .. وهو بيضرب كوباية الشاي الصبح .. قالك نعملة مكان ف العمة ونركبة فيها .. لية يا خواجة ؟ قالك علشان يساعد فى تسخين العربية الصبح ومتاخدش وقت طويل .. فكرتة حلوة لو حالة الموتور كويسة .. وفاشلة لو حالة الموتور مش حلوة لازم يتفك وتربطة بحاجة بحيث انة ميدخلش جوة مروحة الريداتير يدمرها لقدر الله .. يتفك ويتربط بأفيز ف حتة ونقول للخواجة بلاش تشرب شاي مصري هو السبب
عندك تسريب من فـلتر الزيت .. بتاع الزيت اللى ركب لك الفلتر مضغطش علية كويس .. او مركبش فلتر نضيف علشان متخسرش زيت وفلتر .. فية حل مؤقت .. انك تتابع كل يوم / يومين مقاس الزيت .. لو لقيت الزيت نقص للنصف او للعلامة min اوعى تتحرك بالعربية .. وهات لها جركن زيت زودها .. واطلع بيها على بتاع الزيت الغبي دة
الموضوع دة حصل عندى والتسريب هتلاقية حوالين الفلتر ... بس علشان منظلمش الراجل ونكون متأكدين ياريت
لو تحاول تصور مكان التسريب ... او تشرح اكتر .. انا متأكد من كلامى بس لزيادة تأكيد ومنظلمش حد
والاحسن تخلي ميكانيكي يبص لك عليها وهى واقفة وتديلة خمسة ج ولا عشرة ج وتريح دماغك .
بس شكي 90 % فلتر الزيت ركب غلط ومش مظبوط .
المفضلات