مشكلة "الخنقة و التنتيشة" في الكريستاله
السلام عليكم اخواني الكرام .. كل عام و انتم بخير
المشكلة ببساطة حصلت لما دخل علينا الصيف و بدأت استخدم المكيف في عربيتي .. فلاحظت انها بدأت تستهلك بنزين بشكل كبير .. يعني كانت بتعمل 420 كيلو متر في التفويلة و بقت تعمل 320 تقريبا بعد ما بقيت بشغل المكيف .. قلقت ساعتها و رحت لواحد بتاع كربوريتورات و كشف على البوجيهات و قالي عربيتك سليمة و مفيهاش حاجه .. بس لو عايزنا نفك الكاربوراتير بالمرة و ننضفه عشان تطمن يبقه مفيش مشكلة .. و سمعت كلامه و نضفت الكاربوراتير و من ساعتها و مش عارف اتهنى على العربية.
اللي حصل ان العربية بقت تنتش و انا طالع على الاول .. احس انها مخنوقة و مرة واحده تفك الخنقة لدرجة انها بتعمل امريكاني .. طبعا الموضوع ده احرجني بشكل كبير في الملفات وانا جاي اطلع و الخنقة تحصل .. انما بعد الطلعة بتجري و بتفتح و تبقه زي الفل .
فيه ناس دلتني على بنزينة "شل" و قالولي فيه جهاز اسمه "جاز 5" ده حيظبطلك الكاربوراتير .. و بالفعل رحت و ظبطت الكاربوراتير على الجهاز ده (طريقة شغله انه بيظبط كمية دخول الهوا مع البنزين) و بعدها العربية اتحسنت كتير .. قعدت على الكلام ده شهرين تقريبا قبل ما العربية تبدأ الخنقة و التنتيشة من تاني و تقرفني .. رجعت تاني للبنزينة و الراجل ظبطها تاني لكن ما بقتش زي الاول .. غيرت البوجيهات و فلتر الهوا و فلتر البنزين بدون فايدة .
دلوقتي انا في حيرة من امري .. الموضوع ده مسببلي ارق و تاعبلي نفسيتي من العربية على الرغم من انها كانت مريحاني للغاية قبل ما الموضوع ده يحصل .. و اللي قرفني اكتر بقه ان فيه بعض الناس قالولي ان الكاربوراتير بدام اتفك يبقه مش حيرجع تاني لاصله و اني افضل كده احسن او اني اغير الكاربوراتير !!
اللي عنده اي حل يلحقني بيه .. و اسف على الاطالة .. و جزاكم الله خيرا
ملحوظة: عربيتي لانسر كرستاله موديل 98 .. كاربوراتير مش بخاخات