الموضوع: بيتلز القديمة محولة لبيتلز الجديدة

المشاركة الأصلية كتبت بواسطة momo100010

يا جماعة انا والله هسعى انى اعمل تقرير كامل ومتابع الموضوع دا
انا النهارده نزلت شوفت عربية بيتلز موديل 66
على فكرة انا عشقت العربية دى ودا من السادة الاعضاء اللى هنا
بس انا ليا استفسار خاص يا استاذ هشام ؟
ايه رأيك بصراحة ؟
البيتلز ولا ال 127 ولا 128 ولا اللادا الروسي موديل 81
انا متأكد انك هتقول البيتلز


طيب ليه
انا عارف ان الناس كلها بتشكر فيها


طيب ايه السبب
؟
طيب انا معايا 10.000
والله ما معايا غيرهم
ممكن اجيب بيتلز نضيفة محطش فيها مليم؟
يعني متظبطة من جوة وبره
العربية اللي شفتها انا النهارده دى كانت مغيره الجزء الامامى كله
وانا خفت لانى حسيت انه متلخلخ
انا قلت للراجل هرد عليه
انتوا ايه رأيكو
العربية الراجل طالب فيها 5500
بس فيها شغل كتير اوى ( الفتيس غريب جدا - الفرامل والدبرياج والبنزين تقال جداااااااااا - العربية من جوة سوري يعني ف التعبير مقلب زبالة محتاجة تفوير )
انت ايه رأ]ك ف العربية دي يا استاذ هشام؟
ممكن تتظبط ؟
ولا الافضل انى اشو واحده انضف وخلاص؟
واهى تبقى اغلى شوية
واسعار البيتلز دلوقتى كام ؟

ارجوك افيدني
والله انا هبني قراري على رأ]ك يا استاذ هشام

منتظر ردك يا باشا

بص ياباشاالباشمهندس سبعاوي كان عامل مقارنه علي موقع كونتاكت كارز بخصوص الموضوع ده وانا نقلتهالك ومن رأيي الشخصي دورلك علي 128 عاده هتكون ارخص من 10000 او ممكن تجيب واحده حالتها نضيفه ب10000 جنيه

الخنفساء:
سيارة فريدة فى تصميمها للغاية، متينة وآمنه بشكل يفوق الوصف، بيتعمل لها الف حساب فى الشارع علشان متانتها، سحبها ممتاز واستهلاكها فى البنزين رائع وثباتها على الأرض يفوق السيارات الحديثة، ويوجد منها اكثر من موديل تختلف فى أشياء جوهرية (افضل موديلاتها هو الألمانى موديلات من 1970 الى 1974، ويوجد من هذة الموديلات موديل يسمى 1300 وموديل يسمى 1302 افضل منه وموديل يسمى 1303 افضل واشيك من الموديلين السابقين، لكن فى حدود ميزانيتك الوحيدة اللى تقدر تتكلم فيها هى الموديل 1300)
لكن
صوتها مزعج جدا، لدرجة انه بعد 80 كم/ساعة لو واحد قاعد معاك وبتتكلموا مش هاتسمعوا بعض، كمان صاونها ضيق بالمقارنة بال128، ومالهاش شنطة تقريبا،كذلك مش اى ميكانيكى يشتغل فيها، لازم ميكانيكى فولكس نظرا لتعقيد نظامها الميكانيكى(محرك منبطح مبرد بالهواء،عفشة امامية وخلفية بنظام قضيب الإلتواء والدنجل الكامل-من الأخر لها نظام لوحدها فى كل حاجة)
وميكانيكية الفولكس بيحسسوك انهم بيصلحوا طيارة وان معاهم سر اسرار الكون، مشوار الميكانيكى بالنسبالها مزعج جدا

ال128
هى سيارة تعتبر بسيطة جدا بالمقارنة بسيارات اليومين دول(مع إن ده مكانش الحال وقت ظهورها ، كانت تعتبر معقدة جدا، لكن الدنيا بتتطور)
محركها يمثل أبسط صورة للمحرك ذو الكامة العلوية وال8 صبابات
نظام جرها يمثل ابسط صورة لنظام الجر الامامى
نظام تعليقها يمثل أبسط صورة لنظام تعليق المكفرسون(مساعد وسوستة حلزونى ومقص وميزان وسكاترا)
ولذلك تعتبر حاليا من أسهل السيارات فى صيانتها لأان كل مكوناتها لا تزال مستخدمة بنفس التصميمات فى السيارات الحديثة وان كانت موجودة بشكل مبسط فى ال128
عيبها الأساسى انها بتحتاج للصيانة أكثر من بعض السيارات الأخرى فى نفس الحالة، كما ان لها مقالب عادة يقع فيها المستجدين لكن يمكن حصرها والوقاية منها بالصيانة الوقائية بجنيهات معدودة، واشهرها:
1-إنقطاع سلك الدبرياج(اشهر عيوب ال128)(تمنه 10 جنيه، إحتفظ بواحد احتياطى)
2-إنكسار ملعقة الفتيس(برضة بعشرة جنيه، خلى معاك واحدة)
3-بوظان بلى الدينامو او شربونات الدينامو او طلمبة المياه(او ما تشترى العربية إعمل صيانة للدينامو واكشف على طلمبة المياه)
4- المارش بيوظ(اوتوماتيك او بلى او شربونات)(مش مشكلة، دورها زق وروح للميكانيكى)
6- سير الدينامو ينقطع (اول ما تشتريها هاتلها سير دينامو من نوع نضيف)
7- مابتدورش الصبح(لها سبب من 3، يا إما وش الإسبراتير مشروخ،بيتغير ب 15 جنيه، يا إما الكاربراتير مش مظبوط، يتتظبط، يا إما الموتور خفيف، ماتشتريش عربية موتورها خفيف)
8- مروحة الردياتير مش بتشتغل والعربية بتسخن(اول ما تشترى العربية إعمللها زرار يدوى للمروحة،تكلفته 10 جنيه، ولو تعطلت رغم تشغيل الزرار بص على فيوز المروحة)
9- الكبالن: لما تطقطق غيره، بس لو مش بيعمروا معاك لازم تتأكد ان مقاسات الشاسيه مظبوطة، ولو محتاجة ضبط إضبطها

ال127

ينطبق عليها كل ما ينطبق على ال128
لكن بالمقارنة بال128 يعيبها عدم الثبات على الأرض نهائيا وضيق الصالون والشنطة وارتفاع صوت المحرك، كما ان محركها ينتمى الى تكنولوجيا اقدم من تكنولوجيا ال128

ال133: نفس محرك ال 127 ، لكن وجود المحرك بالخلف وقصور نظام التبريد بها يجعل المحرك معرض للسخونة بشدة، لها علاجات للسخونة أشهرها نزع قميص الردياتير وتركيب مروحة تبريد سيارة لادة مع أكس طويل على طلمبة المياه وتركيب طنبورة صغيرة لطلمبة المياره لتسرع لفاتها
عيبها الأخر هو مشكلة آلات الجر(الفلانشات) ولها علاج عن طريق تحول نظام الجر الى كبالن
عيبها الأساسى هو صعوبة العثور على واحدو بحالة سليمة، معظم المعروض للبيع يحتوى على العيوب الأتية:
1- موتور مفوت
2- جيربوكس به صوت ونة ، او عضة فى نقلة من النقلات او الإثنتين معا ، او مش بيجيب نقلة معينة
3-كاربراتير تالف
4-عفشة امامية تالفة
لو حسبنا تكلفة إصلاح هذة العيوب نجدها كالتالى
1- عمرة موتور:2500 جنيه على الأقل
2-فتيس كامل: 1200 جنيه
3-تعديل نظام التبريد:150 جنيه
4-رداياتير جديد:300 جنيه
5-تعديل نظام الجر:600 جنيه
6-كاربراتير127 بتركيبه والتعديلات اللازمة:300 جنيه
7-أربعة مساعدين:400 جنيه
8-طقم جلب مقصات امامى وخلفى وكصنعيات تركيبها:250 جنيه
9-علبة ديريكيسون أمامى:200 جنيه
يعنى حوالى 6000 جنيه، اى ما يوازى ثمن السيارة تقريبا، لذلك لا تشترى ناهئيا سيارة سيات سوى بعد الإطمئنان ان هذة الأشياؤ سليمة، سيارة سيات سليمة ميكانيكا ب9000 جنيه ارخص 1000 مرة من سيارة سيات ضايعة ب5000 آلاف جنيه
وفى النهاية فإن السيات صالونها اضيق من ال127 الذى هو اضيق من ال128، كما انها سيارة بطيئة نظرا لانخفاض نسب تخفيضها، ولا تصلح للسفر

انا دايما نصيحتى الشخصية فى هذا الصدد هى ال128 بس كلامى دة مش بيعجب ناس كتير، علشان كدة انا حطيتلك كل الإيجابيتا والسلبيات للسيارتا اللى انت اقترحتها ، والإختيار فى النهاية لك

انا بس حبيت اوضح بعض النقاط
وخصوصا موضوع قطع الغيار اللى مش رخيصه
مش بس للبيتل لكن سيارات اخرى مستبعده نظرا لاسعار
قطع غيارها بصرف النظر عن كفائتها
يعنى مثلا عندك الفورد سكورت وانا شخصيا جربتها
قطع غيارها غاليه فعلا لكنها معمره جدا
والسياره عمليا وشكلا افضل بكثير من نفس الفئه فى السعر
وللاسف مالهاش حظ فى البيع فى مصر
وده بسبب اسعار قطع الغيار
مع ان معظم السيارات اللى قطع غيارها منتشره ورخيصه
ماهى الا قطع غيار صينى مش عمليه ومش معمره ابدا