الموضوع: بيتلز القديمة محولة لبيتلز الجديدة

من خلال متابعتى للاسعار فى مواقع الانترنت ... اجد الاسعار كالتالى
السيارة موديل 1303 دائما سعرها فىالعالى اعتقد بأى حالى من الأحوال بيكون فى حدود 13000 الف وانت طالع حسب حالتها واحيانا كثير بتوصل الى 16000 الف .... لكن فى بعض الحالات يوجد منها موديلات حديثة شوية 1976 وانت طالع وبيكون صاحبها مهتم بها جدا من حيث الشكل والترويش من الداخل والكماليات والكاوتش والفرش ... الخ يصل ثمنها الى حوالى 19000 الف الى 22000 الف

بالنسبة للموديل 1302 ... بيكون سعره فى حدود 13000 الى 14000 او 15000

بالنسبة للموديل 1300
ده بقى توسع له تلاقى فيه العجب سيارات اصحابها تعرضها بـ 6000 لحد ما توصل 15000
واعتقد انه اللىيشترى سيارة موديل 1300 بسعر 15000 فى الغالب يكون حالتها ممتازة وعشرة على عشرة

وطبعا لما تكون السيارة 1600 سى سى بيكون سعرها اعلى من السيارة 1300 سى سى

واحيانا كثيرة يقابلك ناس فاقده الزمن ... وفاكر انه يقدر يضحك على المشترى ويطلب السعر اللى هو عايزه ..... اومن كثرة حبه فى السيارة موش قادر يحدد ثمنها بالضبط فيطلب فيها سعر مبالغ جدا ... مثلا 19000 الف .... آه هى سيارة موديل حديث نسبيا وكمان موديل 1303 لكن شكلها الخارجى عادى ... على الاقل ما شفتش فيها شوية بويه او الوان جميلة جذابة ....

خصوصا ان البيتلز اعتقد والله اعلم من اكثر السيارات روشنة اى لون بيمشى عليها مية مية خصوصا لو الصنايعى بتاع الدوكو كان عشرة على عشرة

وفى الآخر لو هاشترى اكيد لازم يكون معايا حد ركب بيتلز وفاهم فيها على الاقل لو اتعرضت على ميكانيكى يبقى فاهم هو بيقول ايه ... ولو ركبها هايحس بالعربية ... هل هى مثلا ناعمة فى السحب ... مخنوقة موش عايزة تجرى ... فى تخبيط فيها ... فى اصوات مزعجة فى المطبات ... الفتيس حالته سليمة ولا فيه نقلات بتهرب منه ... وفيه حاجات بسيطة اخرى ممكن تتعمل بعد كده مثلا التابلوه شغال مضبوط ولا كل العدادات عطلانة ....

واخيرا طبعا فى حدود معرفتى والمعلومات اللى عرفتها من اصدقاء المنتدى ا/ هاشم أ/ احمد حسن وجميع الاخوة الافاضل
انك لازم تكشف على السيارة فى البنزينةوتعرف قوة الموتور اد ايه يعنى حالته مثلا 70 % 80 %
وحالة العفشة لازم يشوفها صناعيعى عفشة متخصص فى البيتل .... ولو فيها مشاكل تتكلف كام تصليح العفشة

الخلاصة قبل ما تفكر فى ترويش السيارة وانك تصرف عليها وتحب تعمل تعديل عليها .... لازم تتأكد من أساسيتها سواء كانت
البودى الخارجى محتاج سمكرة هل يوجد فيها بارومة
حالة الموتور والفتيس
حالة العفشة ورقبة السيارة
لدرجة ان لو فيها اربع فرد كاوتش تعبانه هاتفرق معاك فى السعر ... لان موش معقولة اكون لسه شاريها اقوم انزل اشترى لها اربع فرد كاوتش الله اعلم ثمنهم كام ده غير ثمن الاستبن الاحتياطى

شراء سيارة مستعملة عايز صبر وعايز يكون معاك ناس عندها ضمير وحب وعايزه تخدم على قد ما تقدر وكمان الاهم يكون عندهم خبره حتى ولو هاتدفع لهم فلوس موش مهم ... اخسر 50 ولا حتى 100 جنيه على الصنايعية يكشفوا عليها احسن ما اشترى التورماى زى ما بيقولوا

واخيرا ... اعتقد والله اعلم ان الحداية ما بتميش كتاكيت .... يعنى مافيش واحد يكون عنده سيارة حالتها مية مية ويبيعها بسعر تعبان ويخسر فيها .... الا فى حالة انه يكون معذور ومحتاج فلوس بسرعة
او شاب حب يعمل شوية روشنة وبعد ما صرف مصروف بابا على العربية خلص الفلوس او زهق من اللعبة دى وعايز يغير تقدر تشترى منه بسعر كويس لانه عايز يخلص

ولازم تحترس من الناس اللى تفضل تقولك السيارة فيها سى دى ... دى فى دى ... وكاسيت .... ولون ميتالك جميل جدا ... وعمره ما اتكلم على حالة السيارة يعنى موش معقول اشترى سيارة وخلال مدة بسيطة اتدبس فى عمره توصل احيانا الى 4000 جنيه
عشان شكل السيارة عجبنى

زى ما اخونا هاشم قال ... اهم حاجة حالة السيارة

وفى راىاخير والله اعلم بيقول
شوف انت هاتمشى كل يوم مثلا كام كيلوا
يعنى انا مثلا لو حصل انى اشتريت سيارة كل اللى هامشية يوميا لن يتعدى 8 كيلوا او 10 كيلوا .... طبعا ده بالنسبة للناس اللى بتركب سيارات يعتبر لا شىء .... واكيد حتى لو كان حالة العربية لم تتخطى الـ 65 % هاتعيش معاك فترة لا بأس بها حتى يتم عمل عمرة موتور ليها ....

كذلك نسبة الاعطال والمشاكل .... والله اعلم .... هاتمشى كثير هاتصرف كثير خصوصا لو العربية اصلا اساسيتها تعبانة

يعنى موش معقولة واحد بيمشى بعربيتة مسافة صغيرة جدا وهايعمل زيارة للميكانيكى كل شوية .... الا اذا كان شارى عربية خربانة وزبالة فعلا


الظاهر ان اتكلمت كثير وعملت لكم دوشة فى دماغكم معلهش

رمضان كريم
استحملونى شوية

مع اطيب التمنيات
اخوكم حسين غزالة

المشاركة الأصلية كتبت بواسطة hashem1999

الله ينور عليك ياأستاذ حسين
انت كده جمعت معلومات لا بأس بها
وان شاء الله ربنا يوفقك بعربيه كويسه

اللهم صل على محمد وعلى آله وصحبه أجمعين

آه والنبى يا هاشم يا اخويا ادعى لى كده عشان ام الاولاد ترضى وتتشجع فى موضوع العربية ده .... لأن انت اكيد عارف الغلاء اللىاحنا فيه ووجود اطفال واسرة ... بخلى الواحد يفكر مليون مرة قبل ما يشترى حاجة خصوصا لوالسن كبر ..... والحاجة اللىالواحد كان بيعملها لما كان سنه صغير .... استحالة انه يعملها بعد الجواز بسهولة ... يعنى مثلا لو اشتريت كاميرا فى حدود 4000 جنيه عادى .... انما بعد الجواز هاتنام على الرصيف هههههههههههههههه

رمضان كريم

مع اطيب التمنيات
اخوك حسين غزالة

المشاركة الأصلية كتبت بواسطة ahit

اللهم إغننا بحلالك عن حرامك و إغننا بفضلك عن من سواك
اللهم وسع رزقنا و بارك فيه و بارك فى زريتنا و وسع دارنا
اللهم عافنا و أعف عنا يا كريم

آمين يارب العالمين

آمييييييييين يا رب العالمين

الله يكرمك يا استاذ وييسر لك الاحوال ويسعدك دنيا وآخرة

رمضان كريم
أخوك حسين غزالة