الموضوع: الشارع المصري .. عيادة العلاج النفسي

ممكن تحولك السواقة لشخص يائس .. بائس .. عصبي .. لو بتسوق ساعتين في اليوم بس .. يعني بتسوق يومين و نص في الشهر .. و شهر في السنة .. و سنة كاملة كل 12 سنة ! يعني السواقة ممكن بسهولة تدمرلك حياتك .. و في ظل سيطرة الجهات الأمنية علي الشوارع المصرية و تفاني الشعب المصري بالكامل في تطبيق قوانين المرور مش خوفاَ من المخالفة لأ !! للعشق المصري الأصيل في الحفاظ علي النظام .. فلازم يكون فيه حل .. بل ممكن تحول ساعتين السواقة للحبة اللي بيزبطوا يومك و يدخلوك المود تاني ..

يعني إنت كدة





لأ إحنا عايزينك تكون كدة !



و ده مش هيحصل غير من خلال بعض الإسترتيجيات !

1) إعرف إمكانيات اللي قدامك



إذا كنت تعتقد إن الشارع المصري غابة .. أوكي ! إعرف إمكانيات الحيوانات اللي فيها .. يعني متتوقعش من الأفيال إنها تكون رشيقة ولا من الأسود إنها تبطل تفترس عربيتك ولا الضباع تبقي أمامير ولا القرد يبطل تنطيط .. و إعرف إن الغبي أقصي إمكانياته لا تتيح له سوي إنه يكون غبي ! يعني اللي راكن عربيته في شارع حارة واحدة و سابها و مشي ده تعدي مرحلة العتاب ! ده مسافر و هربانة منه خلاص !

2) تخلص من جنون حب التملك




انا عارف إن كل واحد فينا بيعامل العربية و كأنها بنته البكرية .. بس لازم تعرف إنها في الأول و في الأخر .. عربية! معمولة عشان توديك من مكان "أ" لمكان "ب" .. و الحقيقة إنك كنت عايش من غيرها فترة كبيرة من حياتك و كانت فل و الإنسان مش محتاج غير الأكل و الشرب و الصحبة و باقي الحاجات من وظيفة و عربية و ميكروويف و موبايل و توستر و الريموت كنترول دي حاجات ثانوية متديهاش الفرصة تسيطر عليك ! إقفش في اللحظات الحلوة الحقيقية و متلبسش إسود و تقعد أسبوع من غير ما تبتسم عشان واحد حكلك الرف رف الشمال .. اللي حصل حصل .

3) بص للجانب المرح من الموقف !



اما عربية كارو محملة تواليتات مستعملة تجبلك الجنب اليمين من أوله لأخره بالفوانيس و إنت لسة راجع من عند أشرف مفك من الحرفيين عشان كنت بترش العربية فرن طبعاَ مش حاجة كويسة خالص .. بس ماهو خلاص شلفطلك أم العربية ! عالأقل عندك قصة تحكيها دلوقت ! و بعد حوالي شهر هتبتدي تحكيها و إنت بتضحك .

دي أهم المبادئ العسكرية اللي هتستعملها .. فيه بقي نقط صغنطوطة كدة مهمة جدا .

1) معطر العربية



متستهونش بالأثر النفسي اللي هتسيبه ريحة حلوة إنت شاممها طول ما إنت قاعد في العربية .. دايماَ خلي العربية ريحتها حلوة و خد نظرة متعمقة في قسم المعطرات في كارفور أو سبينس أو هايبر وان .. لو مستعجل عندك أون ذا ران .

2) المزيكا اللي في العربية



خلي دايماَ فيه حاجة مفرحة شغالة .. مش عشان متخانق معاهم في البيت ولا في الشغل ولا الطريق زحمة ولا لسة موضوع كارو التواليتات مأثر فيك تنزل تسمع أغاني نكد .. إسمع أغاني حلوة .. و لتكن مثلاَ الأغنية دي

YouTube - Carrapicho - Tic,Tic Tac

الحقيقة انا معرفش الأغنية بتتكلم عن إيه بس شكلهم مبسوطين .

3) اما الطريق يقف .. إقتنع إنه وقف !



مش كل شوية تبصلي في الساعة .. و هوووووووف .. و يا عم خش بقي يا بارد .. الطريق وقف ! ولا أوباما نفسه يقدر يمشيه ... جبنا جوزيه جبنا حسام البدري الطريق واقف .. مفيش فايدة .. إتأخرت .. أيوة فعلاَ .. بس هتطلع الجناحات يعني ؟! الطريق وقف ! هنا ييجي دور المزيكا و المعطر .. و طبعاَ إزاز مقفول و تكييف .

و دي حبة tips في حالة تحرش حد بيك عالطريق !

1) واحد جه عايز يعديك بالعافية .. عديه .. ! مفيش فرصة أو كان رخم زيادة عن اللزوم .. متعديهوش يعني إنت و مزاجك .. لو جه جنبك و دلق صفيحة زبالة من بقه .. علي الأغنية البرازيلية اللي إدتهالك .. و شاورله "معلش مش سامعك" .. بوسة في الهوا .. تابع طريقك .

2) واحد حطك في دماغه و عايز يلبسك في رصيف أو يطلعك عالجزيرة اللي في النص .. إركن دقيقتين .

3) واحد زنقك و عايزك تنزل عشان يضربك .. طلع الموبايل و صور اللي بيعمله و في الباكجروند بقي ممكن تصوت شوية "يا أستاذ خليك محترم !! إحنا بلد فيها قانون !! إحنا الداخلية عندنا صاحية أوي !!" .. ممكن تسيبه يضربك لو حابب تقدم الفيديو للداخلية و تحبسه و ممكن تعمله أب لود علي يوتيوب و تقعد تضحك عليه مع بقية الشعب شوية .

تذكر إن دايماَ عندك فرصة إنك تركن و تنزل تخبط دماغك في عمود نور 7 ولا 8 مرات و تركب تكمل طريقك عادي .

و قيادة سعيدة



عيادة حصرية لنايل موتورز و اللي هينقلها هربطه في الإكصدام و أسحله الدائري كله ( و خلي بالكوا الدائري بقي دائري فعلاَ .. و نقعد نلف بقي )

ههههههههههههههههه
تسلم ايدك يا باشا على الموضوع الجميل والله ضحكتنى
بس فعلا هو بيضحك لكن الموضوع كله عبر واهداف مفيدة
شكرا يا باشا على الموضوع