الموضوع: لانى مش قادر اسامح يمكن حد يساعدنى

المشاركة الأصلية كتبت بواسطة evoo90

والله جربت كل حاجه كل حاجه ولو انا وحش ومش بعرف اتعامل مع اللى قدامى كانت الناس كلها تقول كده عليا
والدى من النوع اللى مايحبش النقاش وعنيد جدا جدا جدا ممكن يعند معايا ويعمل حاجات مالهاش اى لازمه او مبرر واحنا الاتنين خسرانين فقط عشان يعاندنى ويعرفنى انى مابفهمش وحمار وهو اللى بيفهم وملاك
كل ما احاول اكلمه يهب فيا ويزعق على الفاضى
مره كنت شغال وكنت فى المعادى والدتى اتصلت بيا وبتقولى تعالا ابوك تعبان والله سيبت الشغل وروحت على طول دخلت عليه بسأله مالك فى ايه ؟ الاقيه طلع فيا وقعد يزعق عشان قاعد طول اليوم بره البيت طب مانا فى الشغل !!
دليل على انه عنيد وغضبه ده من غير مبرر انى لما بفضل طول اليوم بره البيت الاقيه يزعق ويقول ياصايع ويشتم فى اصحابى اللى هو مايعرفهمش اصلا ولا سمع عنهم ولا عايز يسمع عنهم طب بيحكم انى بصيع فى الشارع بحكم ايه بقى
انا الحمد لله معاهم ماقصرتش فى حاجه الحمد لله الحمد لله مش بشرب سجاير ولا اى دخان ولا منحرف بتاع مخدرات ولا بخرج كل يوم مع بنت شكل ولا بتخانق وبلطجى ومجرجرهم فى الاقسام ولا بجيبلهم مشاكل ولا اى حاجه خالص
طب مش هنزل الشارع من شغلى جبت جهاز كمبيوتر ليا لوحدى غير بتاع اخويا وجبت راوتر ووصلت انتر نت وبدفع كل شهر من مصروفى وقعدت فى البيت بصحى الصبح الساعه 12 او 1 وبقعد على الجهاز ارسم شويه اقلب فى النت شويه اقعد شويه على المنتدى ومش بقوم من على الكرسى لحد الساعه 2 3 وساعات لبعد الفجر
مابنزلش الشارع خالص اهه برضه مش عاجبه ومضايق انى قاعد على الجهاز طول اليوم !!!!!!
طب اعمل ايه
انا فى اجازه وسيبت الشغل وماعنديش دراسه ولا حاجه وانت بتضايق من نزولى الشارع وكمان مضايق من قعدتى على الجهاز !! هاتولى انتوا ياكبار ياللى اكبر منى ومنكم اتجوز وخلف وعرف مسؤليات الوالد
اقعد اطبخ مع امى ولا اقعد اروق الشقه ولا اقعد قدام التليفزيون اللى دلوقتى بقى اهيف مايمكن ( بقالى سنتين ماقعدتش قدام التليفزيون نص ساعه على بعضها ) وبشهاده ناس كتير والدى بيعاملنى معامله زفت زفت زفت حتى والدتى تقولى اسكت ماتتكلمش وساعات تحاول تهدى شويه لكن دايما والدى ساعتها كل مابيحس بضعفى وان حد هيحوشه عنى بيذيد فيها وياريتها بتيجى على الزعيق وبس فى بعض الاحيان بتصدر قرارات واوامر ظالمه جدا جدا ووالدتى بتتدخل وبتخففها شويه
عنيد متكبر دكتاتورى حقود اقوله عملت ايه انا ايه الغلط يقولى ماتسألش انا لما اتكلم ماتسألنيش وماتناقشنيش !!!!!!!!!!!!!!!!!!!!!!!
طب منين هعرف غلطى ان وجد ومنين هصلحه ومااعملهوش تانى
ربنا يهديه ويهدينا يارب ؟؟؟

لى واحد صاحبى والدة زى مبتحكى انت بالضبط وصاحبى بيشتكى منة مر الشكوى
بس زيادة كمان والد صاحبى دة عايزة يبقى اسير لة طول النهار يقف فى المحلات (عندهم محلات ادوات منزلية) يقفل وينام وينزل يقف تانى فى المحل واذا اتكلم وقالة اخرج مع اصحابى شتيمة وزعيق وكلام بذئ لدرجة انة جة مرة اتخانق مع بقية اصحابنا وبيتهمنا انن بنخرب ونصيع ابنة ونسهرة لوقت متاخر
هو جيش وهذا يثبت ان ااهل ليسوا دايما على حق ولا دايما كل الاهل كويسين لان ممكن ابن يتربى فى بيئة غير صالحة ويطلع عندة عقد بالتاكيد عقدة حتطلع على ابنائة ودة اكبر غلط يبقى فى اهل غير اسوياء فاية ذمب الابناء .

المشاركة الأصلية كتبت بواسطة nabaster

الموقف باختصار يا محمد كان لشاب لسا يادوب مخلص الجامعه ولسا دي اول وظيفه هوا فيها

كان عينه علي بنت قريبته ومكنش ناوي يتقدم الا لما يحس انه قد الموضوع ده بحيس ميترفضش (لان كان يعتبر في فرق في المستوي الاجتماعي)

المهم الحمد لله ربنا وفقه وخطبها والكلام من ده بس كانت العقبه والدته وكل شويه مشاكل معاه

بس هوا كان رايه من دماغه ولحمد لله ربنا تممله علي خير واتجوز البنت دي

مش هقولك يا محمد انه عاش 15 سنه من اسوء سنين عمره كل يوم مشاكل وخناق وكل يوم نفس الموشح

بس زوجته دي اصراحه تستحق يتعمل ليها تمثال

استحملت والدته لكل الي كانت بتعمله معاها من شتيمه لتهزيق لكلام ميصحش يتقال علي زوجة ابنها

بلاوي يا محمد

ومكنتش حتي بتقول لجوزها علي الي حصل لما كان بيرجع من الشغل

وكانت تقوله روح زور مامتك لانها كانت مضايقه شويه

علي فكره يا محمد الولد ده وحيد علي 6 بنات

تخيل وصلت بالام دي بعد ما اتوفي جوزها (والد الشخص ده) انها وزعلت كل املاك جوزها علي البنات بس بدون اي اعتبار للولد ده مع انه ابنها الوحيد

بس هوا كان بيحتسب الاجر عند ربنا كان بيقول انا الحمد لله ربنا سترها عليا ومش محتاج اي شيء منها

بس كان بيقولها كلمه واحده بس

كان بيقولها مش هتلاقي غيري انا وولادي الي يشيلو الخشبه بتاعتك

واخد موقف من كل اخواته البنات

مر الوقت وحتي الشقه الي كانت فيها عطيتها لبنت من البنات وهيا راحت لشقه تانيه في دور عالي ومحدش كان مراعي ان العمر بيمشي لقدام مش بيرجع كله فرحان بالحاجات الوقتيه

كبرت وابتدت تعدي الـ 60 سنه

ومبقيتش تقدر تطلع للدور العالي وبنات امبارح الي كانو بيتمنولها الرضا ترضي

دلوقت كل واحده في شقه ومعاها جوزها مين طيب دلوقت الي هيستغني عن شقته؟؟؟

افتكرت دلوقت كل كلام ابنها دلوقت بس شافت عجزها وافتكرت ان القبر بيقرب

راحتله الشقه وعرضت عليها حسابها كله الي في البنك يكون تحت امره

علشان بس يرضي عنها ويسامحها

والله والمنظر ده شوفته قدام عيني والله العظيم وطت علي ايد مرات ابنها وكانت عايزه تبوسها وقالتلها انتي عملتي الي معملتهوش معايا بنت من البنات

كانت بتطلب بس انهم يسامحوها وانها فرقت في المعامله بس علشان العند ومعملتش حساب لاخرتها

بس ابنها رفض ياخد اي شيء وقالها الله اعلم مين هيموت قبل مين وسيبي كل شيء لوقته

البنات الي كانو امبارح فرحانين بالتوزيعه الي في نظرهم ده العدل

انهارده عرفو بقيمة اخوهم لما دي حصل معاها مشكله ومحدش عرف يخلصها غير اخوها

ولما دي كانت هتجوز بنتها ومفيش الي يشرفها غير اخوها ودي ودي ودي ودي

دلوقت بس عرفو بقيمته بس هوا متكلمش وكان بيراعي ربنا في العجوزه دي ولا كان بيلوم حد فيهم

واتوفت امه يا محمد بس اخر كلمه قالتها وكان هوا جمبها انه يارب يكون مسامحها

معلش يا محمد الموقف ممكن يكون طويل شويه

بس ده مش موقف ده عمر

بس بتمني تستفيد من الموقف ده وتراعي ربنا في والدتك وسيب الايام تثبتلها انتا مين

الزمن كفيل بأي شيء

ومتنساش ان دي والدتك

ده ملخص يا محمد وما خفي كان اعظم واعظم واعظم

a.yakout

شكرا على النصيحة يا احمد
ولكن زى مانت قولت بس ده مش موقف ده عمر
يعنى دة الزمن بيكون كفيل باثبات الصح واظهار الخطأ ولكن مين اللى يكون عندة قوة الصبر والاحتمال ولكن انا ححاول انشاء اللة استعين باللة واصبر لان دية نصيحة اخوان كتيييير قالوهاالى فى المنتدى وغيرة
يعنى حتى الرسول صلى اللة علية وسلم
لما صبر نال مبتغاة وفتح مكة وقال مقولتة الشهيرة صلى اللة علية وسلم (قل ظهر الحق وزهق الباطل ان الباطل كان زهوقا )