الموضوع: الي اصحاب كورولا الملكة من 92 الي 97

اولا شكرا على الردود

المشاركة الأصلية كتبت بواسطة agmgranturismo2006

ممكن توضح بتستهلك بنزين زيادة ازاى يعنى كام كيلو فى الصفيحة جوا البلد و بره كمان السحب ممكن تحدد السرعات على كل نقلة عشان اقدر افيدك كمان ممكن تكون انت ما لينتش العربية كويس او اللى عمل العمرة مش تمام و كمان لو العمرة مش مظبوطة فيه علامات على المكنة هاتبان و كمان من الشكمان

بالنسبة لاستهلاك البنزين : - داخل البلد 140 كيلو للصفيحة
- طريق سريع يعني في حدود 160-170 كيلو
بس الموضوع مش ثابت يعني مرة تزيد و مرة تقل .

بالنسبة للسحب : النقلات بالنسبالي بتعتمد على سواقتي بس هقولك بردو
الأول => 0-20
التاني =>20-40
التالت =>40-60
الرابع =>60- 80 او لحد 100 ممكن
الخامس = نادرا ما بستخدموا بس في الغالب بعد الـ100

المهم موضوع العمرة فات عليه كتير, يعني اكتر من سنة و من ساعتها و انا بحاول ارجعها زي الأول بس مش عارف .
و هي فعلا في علامات كتير زي البوجيهات مفحمة و السحب و الشكمان كان بيطلع دخان بسيط و الزيت بيسود بسرعة...
كل لما اروح لواحد يقوللي الكاربيراتير عايز يتظبط
عملت كده بس مفيش غير دخان هو اللي قل جامد و اصبح مفيش غير الريحة .

غيرهم قاللي التكيهات ==> دي بقة الحاجة اللي كانت بتجنني ,لأن بعد ماظبط التكيهات كنت بحس بفرق رهيب و العربية كانت بتجري جامد و كوللو تمام بس الموضوع يقعد اسبوع بالكتير و ترجع تتهبب تاني زي الأول و اروح لواحد تاني يعملي التكيهات يقوللي دي ما تعملتش كويس و هكذا الدورة تبدأ من جديد.

و ياما غيرت بوحيهات و الزيت من غير مايكونو بايظين .

و مازالت المشكلة قائمة .
و اسف على الأطالة.

المشاركة الأصلية كتبت بواسطة mr_sameh

الموضوع سهل جدا وعلي فكرة انا كنت خايف جدا من التجربة دي لاكن انا شايف انها كويسة بس انصحك تركب موتور 5a افضل من اللي مركبه

طب و الموتور ده ايه مواصفاته ؟و التكاليف؟

وهل فعلا لو سقط موتور سعر العربية هينزل جامد؟؟

و شكرا

بالنسبة للسحب اللى انت بتقوله طبيعى و معقول جدا يبقا الموتور تمام لكن المشكلة عندك فى الاستهلاك انا هاقولك موضوع الاستهلاك ده انا كنت زيك كده بس مش استهلاك كتير قوى كده رحت ظبطت الكربراتير عند مركز الصفا فى جسر السويس الكربراتير بقا تمام و كمان ظبطت تاكيهات و غيرت فلتر بنزين و هوا عند ميكانيكى فى شارع مصر و السودان أسمه محمد ياقوت و كله بقا تمام الاستهلاك بقا 200 كيلو جوا البلد 250 فى السريع و مع التكييف و عملت 15000 كيلو بس مواظب على الفلاتر و الصيانات و الكربون اللى على البوجيهات و الدخنة السودا دول بنزين زيادة يعنى كربراتير و ممكن تشترى كربراتير استيراد بس انا ما باحبش موضوع تسقيط المواتير ده عشان حاجتين اولا هاتغير كتير فى العربية و ما انتش ضامن الموتور اللى هايركب هايطلع عامل ايه و كمان المكن ال 1300 كويس احسن من ال 1500 لان قطع غياره قليلة شوية و من ال 1600 لانه تقيل و استهلاكه مش هايظبط معاك قوى كمان وجع الدماغ بتاع المرور عشان تغير الرخصة و اوراق و قرف فخليك مع الموتور بتاع الفابريكة لان تجميعه معقول و ظبط الكربراتير و التاكيهات و ان شاء الله كله هايبقا تمام و لو عايز اى حاجة انا فى الخدمة

كمان فيه حاجة الزيتت عادى انه يسود بعد حوالى 1000 كيلو و كمان الوجيهات بتسود شوية بس بعد حوالى 3000 كدة و كمان احسن طريقة تحسب بيها الاستهلاك انك تفول العربية لغاية اول تكة من المسدس بعدين تصفر عداد الكيلو متر و امشى مشوار 100 كيلو مثلا و بعدين فول تانى على اول تكة من المسدس و شوف هاتعبى كام و قسم الرقم ده على عداد الكيلو هايطلعلك كل لتر بيعمل كام كيلو ديه احسن و ادق طريقة لان ممكن تكون انت بتحسبها بالتقريب و عشان كده حاسس انها زيادة وممكن يكون عندك حاجة فى علبة الشكمان كاتمة العربية و مخلياها مخنوقة و بتحرق بنزين

شكرا على الرد المفيد
بس انا مختلف معاك في حكاية السحب لأن العربية بعد ظبتة التاكيهات السحب بتاعها بيختلف جامد و احسن بكتير بس للأسف الموضوع بيقعد اسبوع و بعدين يرجع تاني.
و الكاربيراتير مر على ايد كل فنيين مصر و بردو الموضوع مفيش تحسن.
و موضوع الزيت و البوجيهات بيسودو في خلال تلات ايام من تغيرهم يعني تقريبا بعد 100 كيلو!!!
طب اعرف ازاي موضوع الشكمان ده؟

و شكرا

موضوع الشكمان ده سهل من وقفة العربية و هيا على السلانسية بتشوف خروج العادم منه بيكون خارج على دفعات و ما يكونش فيه صوت زى الكحة بتاعت الانسان كده لو تحس انه بيكح يبقا مكتوم معلش ده اقرب تعبير انا لقيته و فى الغالب لو ده شكمان العربية و مشى معاها طول عمرها اكيد هايكون مكتوم بس من كلامك المشكلة مش فى الشكمان الموتور نفسه فيه حاجة مش مظبوطة طب بص على فلتر الهوا اللى فى العمة و شوف فيه زيت و لا ما فيش و احسن حل هايلغيلك احتمال الموتور انك تقيس كبسه فى اى بنزينة و تشوف القرايات لو كبس الموتور مش مظبوط يبقا الموتور ده عمرته مش صح و فيه عداد كبس موتور لو ايز تعمله بنفسك هاتجيبه من شارع الجمهورية ب 80 جنيه و هاتفك كل اسلاك البوجيهات و تمسك بوجيه بوجيه تفكه و تركب العداد مكانه و تشيل فلتر الهوا و تدور العربية بالمارش حوالى 5 او 10 مرات و تشوف قراية العداد فى كتالوج العربية لحد رقم 150 او 160 مقبول جدا بس انا مش فاكر وحدة القراية يعنى كلها حلول تخليك تعرف المشكلة فين خلى حد بردك يبص لك على الشكمان و مكان ربط الفرن فى المكنة و الجوان بطاعة يمكن فيه تسريب و اخبار التبريد و الميه عندك ايه يعنى العربية بتسخن و لا كويسة؟

شكرا على مساعدتك ليا
انا هاشوف موضوع الكبس ده جايز نطلع بفايدة .
و بخصوص الشكمان و احد قالي ممكن تغير الفلتر بتاع الشكمان اللي بعد الفرن ! بس معرفش ايه الفلتر ده ؟
و العربة التبريد بتاعها كويس في الغالب.