الموضوع: تجربة قيادة السوزوكى إس إكس 4 - Test Drive for Suzuki SX4

السلام عليكم,

النهارده عايز أديكم إنطباعى عن تجربة القيادة للعربية السوزوكى الإس إكس 4 ... إتفقت أتقابل مع العضو الكريم محمد مكاوى داخل القرية الذكية و إتقابلنا فعلا فى الميعاد المتفق عليه.

قبل كل شيئ يا جماعة أحب أقول حاجة, محمد مكاوى يا جماعة من الشخصيات اللى يوم ما هغلط فى حقه هقول عنه إنه راجل قمة فى الإحترام , دى بجد أقل حاجة ممكن أقولها عنه ... أنا كنت محرج جدا من كتر ما كلمته و زنيت عليه و هو كان فى منتهى الذوق معايا و باله طويل جدا و مستفيض فى الشرح .. ربنا يكرمه دايما يا رب .

نيجى بقى للكلام الجد :

طبعا أنا عارف و شبه حافظ شكل العربية من جوه و من بره , بس ده لا يمنع إنى برده حسيت أول ما ركبت العربية كإنى أول مرة أركبها , التابلوه شكله ما شاء الله جميل جدا و الخامات كويسة جدا جدا و واضح إن خواصها متغيرتش مع الإستعمال (مفيش مثلا بهتان أو حاجات إتخلعت أو كده) هو بس اللهم شوية تقشير فى إيد الفتيس , و لو مدققتش ممكن متاخدش بالك منه أصلا. إجمالا التقفيل الداخلى (interior) ما شاء الله حلو جدا .

الشكل من بره حلو قوى ما شاء الله (و أنا الحقيقة مش من نوعية الناس اللى بتدقق قوى على الشكل من بره , أنا يهمنى جوه أكتر) و حتى صاحبها بيقول شكل السيراتو من بره أحلى , بس أنا فعلا مش فارق معايا الموضوع ده. فنقدر نقول إجمالا الشكل الخارجى (exterior) حلو بالنسبالى و مقبول عند ناس كتير.

إرتفاع العربية عن الأرض حلو جدا و دى حاجة مطلوبة جدا فى بلدنا يا جماعة, إنتوا أكيد أدرى منى بشوارعنا الملفتة للنظر من فرط جمالها و جودة رصفها (يا رب صبر اللى معاهم Civic و جنبهم الحك فى المطبات )

مبدئيا إحنا كنا 4 فى العربية و التكييف شغال على 2 (و الشهادة لله أنا كنت سقعان بس قلت خليه عشان عايز أجرب أداء العربية فى ظروف تحميل شوية).

إبتديت السواقة هادى كده جوه القرية, لقيت مكاوى بيقولى : إنت مالك ماشى هادى كده ؟ إجرى شوية ! و فعلا جريت و قرصت على العربية و سحبها ما شاء الله و لا قوة إلا بالله حلو جدا ... دوست فرامل مرة واحدة و سمعت الإى بى إس بيشتغل (أو بمعنى أدق حسيت بيه فى رجلى) و كانت إستجابتها هايلة ما شاء الله. و فعلا العربية كانت بتتلكك عشان تجرى.

ثبات العربية ما شاء الله حلو جدا مع الملفات و الميادين و الوقوف المفاجئ.

و لما إتجرأت شوية و لقيت الشارع فاضى و طويل, جربت الكيك داون , إستجابته ماشاء الله حلوة و فعلا بتحس بطفرة فى الأداء.

الباور ما شاء الله حلو و ناعم , و حتى مكاوى قالى إنه أصلا أنعم من كده بس هو فيه مشكلة .. بس حتى كده ما شاء الله حلو جدا.

وضع العدادات مع الدريكسيون كويس جدا , و الدريكسيون ممكن وضعه يتعدل .

شنطة العربية ما شاء الله كبيرة و إرتفاعها كبير كمان , يعنى فعلا عربية عائلية و تشيل حاجات كتير.

كمان ميزة برده احب أقولها إن المرايات الجانبية حلوة قوى و كبيرة , مجال الرؤية فيها واسع و جايبة تفاصيل كتير وراك.

النقط السلبية دى بقى تختلف من ناس لناس , بس أنا هقول النقط اللى لفتت نظرى و حاسس إنها ممكن تمشى مع ناس و ممكن متبقاش مقبولة عند ناس تانية:

زى ما قولت الشكل الخارجى دى أذواق , بس أنا شايف إن شكل العربية مع حجمها مرضيين جدا بالنسبالى.

عزل الصوت عن العالم الخارجى كويس جدا ما شاء الله , صوت الموتور مع السواقة العادية هادى و مع الكيك داون عالى شوية , بس مش عالى العلو المزعج, بالعكس أنا كنت مستمتع بصوته جدا , و على فكرة يا جماعة أنا نقطة العزل دى تهمنى جدا جدا , بس فعلا الصوت جوه العربية كويس جدا. بس أنا قولت أنوه على النقطة دى عشان الناس اللى بتحب متبقاش سامعة أى صوت جوه العربية حتى مع السرعات العالية (زى الأوكتافيا و الفورد فوكس و المونديو كده). و على فكرة أنا كان عندى رأى فى الموضوع ده, إن جايز عشان العزل الخارجى حلو جدا عشان كده صوت الموتور ملحوظ أكتر ؟ - جايز .

العفشة ناشفة شوية , مش ناعمة نعومة الألمانى, و اللى هيعمل سيرش على جوجل على العربية دى هيعرف إنها عربية سبورت و ده الطبيعى بتاع السبورت .. بس أنا من وجهة نظرى إن الثبات بيتحكم فيه عدة عوامل منها العفشة و إرتفاع العربية و وزنها وعرضها. فالوضع هنا إن العربية إرتفاعها عالى بس الثبات متعالج بتربيطة العفشة و تقل العربية النسبى بالنسبة للفئة دى (1205 كجم). و الوضع برده فى السيفيك عفشة ناعمة ما شاء الله مع نفس الوزن تقريبا بس العربية قريبة من الأرض (طبعا مع فرض ثبات العرض للإتنين يعنى). فهى معادلة .. و شيئ صعب شوية إرضاء كل المتغيرات فيها.

كون إن العربية مش منتشرة دى تقلق شوية ناس و منهم أنا , بس انا ملاحظ إنها إبتدت تنتشر شوية و إبتدت الناس تحطها فى حساباتها عند الشراء.

التوكيل مش عارف الكلام اللى طالع عليه ده منين الحقيقة, بس و أنا مع مكاوى التوكيل كلمه يتأكد من إن الصيانة إتعملت و بيسألوه إن كان فيه مشكلة أو حاجة. فأنا مش عارف السمعة اللى طالعة عليه دى منين.

هو ده نقدر نقول إنه تقييمى لعربية إس إكس 4 عاملة 50000 , بس محمد قاللى إنه إن شاء الله هيحاول يكتب تقييم ال50000 بنفسه فى أقرب فرصة إن شاء الله.

أشكركم على المتابعة و أسف على الإطالة .. يا رب أكون أفدت , و اللى هيستفيد من التقييم ده يدعيلى.

أخوكم فى الله,
أحمد السعيد