الموضوع: ايهما تفضل (جين 2 - نيو اكسنت) من كل النواحى

يا جماعه نرجوكم نرجوكم بلاش تحيز لعربياتكم , الحكايه نسبه وتناسب واحتياجات شخصيه هى اللى بتحدد قدره العربيه دى على النجاح مع شخص معين او فشلها مع شخص تانى

يعنى مثلا محدش سأل الراجل انت معاك عائله ؟ بتسافر كتير ومعاك شنط ؟ بتجرى ولا مش فارق معاك ؟ هتغيرها بعد قد ايه ؟

كل ده يحدد مين الانسب ليه , مش نقول جين 2 على طول او اكسنت على طول

يعنى بلاش نقول الاكسنت فيها عيوب تقفيل واحنا بنتكلم عن الجين 2 بعيوب تقفيلها الشهيره , طالما هنقول عيوب يبقى نذكر بما يرضى الله عيوب العربيتين او نذكر مميزاتهم بس

الجين 2 عربيه محترمه واثبتت نجاحها وانتشارها الجيد يدل على انها عربيه على قدر المنافسه , بس بلاش نطلع بيها فوق مستوى منافستها اوى كدا وبشكل مبالغ فيه سواء انها لا تقارن بالأكسنت او موتورها صوته عامل زى عربيات الفورميلا

المشاركة الأصلية كتبت بواسطة ayman_52

حسب متطلبات الشخص ... يعنى :-
---------------------------

عاوز عربيه موتور قوى , عوامل امان , كماليات كتير , صاج قوى , ثبـــــــــــــــــــــــ ـــات , عفشه رياضيه تستحمل شوارع المحروسه , سعر منافس جدا جدا لامكانياتها , شكل مميز .

يبقى الــ gen2

-----

عاوز عربيه موتور ناعم , موفره للبنزين اكتر , قطع غيارها منتشره اكتر , سعر اعادة بيعها احسن

يبقى الــ new accent

-----

واى استفســــــار بخصوص الجين2 ... تقدر تتفضل فى قسم بروتون ... للرد على كل استفســــارات حضرتــك

وربنا يوفقك للاختيار الخير ان شاء الله

واحنا تحت امرك فى اى استفســــــــار

تحيــــــــــــــاتــــى

استاذ ايمن , تحياتى لحضرتك على ردك الحيادى الصحيح كليا

اضيف على كلامك بالنسبه للنيو اكسنت , العربيه برده ادائها عالى جدا وموتورها بتاع جرى

الثبات بشكل واضح اقل من الجين 2 لكن مازال مرضى حتى السرعات الفوق متوسطه

العمليه افضل بكتير من الجين 2 وبرغم ان صالونها مش واسع الا انه اوسع من الجين 2 , كمان الراحه فى الركوب فى الاكسنت افضل من الجين لكن طبعا قسوه عفشه الجين نقطه قوه فى ثباتها

والنقطه الاقوى للأكسنت هى توافر قطع الغيار بسعر كويس وسعر اعاده البيع

الى الاخ صاحب الموضوع , عليك وعلى جمع كل النقط المهمه بالنسبه لك فى العربيه وتطبيقها على الاختيارين علشان تقدر تعرف مين فيهم هتغطى اكتر عدد من احتياجاتك , ساعاتها مش هتندم على اختيارك ان شاء الله

للاسف مش عارف ارد اقول اية
عمالين نقول بلاش تحيز .. و نخلى الكلام بالعقل.. لكن مفيش فايدة
فى الاخر بردة طلع ماتور الجين 2 احسن من الاكسنت
و طلعت الاكسنت ثباتها ضايع و على سرعة 90 كمان

لله الامر من قبل و من بعد ..

انتوا حرين فى وجهة نظركم .. المشكلة ان فى ناس هتقرا الكلام دة و تصدقة و تبنى قرارها علية

و نصيحة للاخ اللى بيسأل .. انا اسف انى اقلك .. وفر على نفسك السؤال فى المنتدى و حاول تعرف بنفسك عن اى طريق تانى .. لان انت كدة هتتشتت و مش هتاخد معلومة صح .

المشاركة الأصلية كتبت بواسطة أبومريم

هو دا الكلام اللي بدون تحيز وبما يرضي الله؟؟؟
انا قلت صوت الموتور عالي بس حلو قريب (قريب) من عربيات الفورمولا وان ودي وجهة نظري و دي عربيتي وانا اللي عارفها
على فكرة ثبات الاكسنت ضايع على السرعات فوق المتوسطة يعني من اول 90 و طالع مفيش ثبات و ياريت حضرتك تجرب تسوق العربية دي على 90 و تاخد بيها غرزة او تعمل بيها مناورة و نصيحة متعملش كدا عشان متعملش حادثة لا قدر الله
صالونها مش اوسع من الجين 2 باي حال من الاحوال و ياريت برضو تنزل تشوف العربيتين عشان تحكم بما يرضي الله و الاكسنت و الله الركوب فيها يقطم الظهر مش مريحة اكتر من الجين زي ما حضرتك بتقول بالعكس عفشتها زي ما قلت قبل كدا انشف من الجين بكتيير
العربيتين كويسين بس انا شايف الجين افضل للاسباب اللي انا قلتها عشان انا الاكسنت مع اتنين اصحابي و بركبها معاهم كتيير و سقتها كذا مرة و الجين عربيتي و عشان كدا بقول اللي انا شايفه عن تجربة مش فتي وربنا يهدينا للحق و يهدي صاحب الموضوع للفيه الخير

بالتأكيد يا فندم لو حضرتك شايف فى كلامى اى مغالطه او تحيز ممكن تناقشنى فيها

بالنسبه لتجربه العربيتين انا بالفعل جربت الجين 2 والاكسنت , تقييم العربيات ده كمان شغلى ويمكن تكون الملاحظه عندى تختلف عن شخص تانى وتقييمى يختلف كذلك

الاكسنت اللى حضرتك جربتها انشف من الجين قد يكون عيب كاوتش ضغطه عالى او عفشه مش مظبوطه او سواق عنيف شويه , كل دى نقط تغير مسار التقييم

بالنسبه للثبات فانا قولت ان الجين 2 احسن فى الثبات , لكن مش معنى كدا ان الاكسنت بتعوم على 90 اسمحلى مفيش عربيه دلوقتى بتعوم على 90 دى مبالغ فيها قوى , لو قصدك بتعوم علشان مثلا واحد عايز ياكل بيها 3 حارات خبطه واحده يبقى هنا العربيه اتفهمت غلط علشان هى مش عربيه سباقات

زى الجين 2 بالظبط برده ليها حدود , كل عربيه ليها حدود لكن بشكل عام ثبات العربيتين جيد الجين تتفوق لكن مازال الاكسنت عربيه محترمه فى الثبات , عربيه بتكون احسن من عربيه فى ظروف معينه لكن مش دايما نلاقى عربيه متفوقه على منافسيها والا كانت كل شركه مسكت فئه من العربيات تعملها والباقى شاف له فئه تانيه

كل عربيه ليها مميزات وعيوب هى اللى بتحدد مين العميل اللى هيبقى سعيد بشرائها

وربنا يقدم اللى فيه الخير لصاحب الاختيار

المشاركة الأصلية كتبت بواسطة momopersona

كلامك كلو صح بس على فكرة الجبن 2 تتقارن فعلا بالالانترا و السيراتو
ااه صالونها ديق شوية بس اوسع من عربيات تانية زى الصنى بالرغم من ان الصنى اكبر فى الحجم الخارجى
مشاكل التقفيل البسيطة دى استحملها قى سبيل 20 ألف جنيه وفرتهم بينها وبين فئتها
العربية ثبات و موتور وعفشة و شكل ووسائل أمان وكماليات احسن من الاكسنت وحتا اعادة البيع مش وحشة والله دلوائتى الجين بئا ليها زبونها بردو
وطول العمر اعتقد ان عمر الجين 2 اطول وحتا شوف الويرا والاكسنت 99 وشوف الفيرنا ال 2006 و الجين 2 2006 بالرغم من ان زبون الجين 2 شباب
بعنى خلاصة الكلام
جين تو تتميز فى التبات والعفشة والموتور وطول العمر والكماليات والشكل
والنيو اكسنت تتميز فى اعادة البيع وقطع الغيار والصالون اوسع
استهلاك البنزين زى بعض
وده طبعا رأيى بعيد عن اى تحيز والله لانى هاتحاسب عالكلام ده وعلى فكرة انا معايا برسونا و فيرنا

ماشى انا معاك واحدة واحدة

اولا:: تتقارن بالالنترا و السيراتو فى اية ؟
فى الحجم مفيش علاقة دى فئة و دى فئة تانية.. الجين2 نفس فئة النيو اكسنت و الاتنين اسمهم subcombact cars و ادى الرابط للى عايز يتأكد :
Subcompact Cars
فى القوة الحصانية الجين 110 حصان و الالنترا و السيراتو 122 و 124 حصان
فى الخامات و التقفيل فرق السما من الارض .. عمرك شفت النترا عايزة مكنة زجاج كهرباء بعد شهر و لا شهرين .. عمرك شفت سيراتو بيلفوا بكرة شيكرتون تحت الكنبة عشان الصوت ......
مش عايز اكمل لان الموضوع مش مهاجمة الجين و ابراز عيوبها .. و لكن لوضعها فى حجمها الطبيعى ..يا ريت بلاش مبالغات ملهاش اساس .