أنا بعد ما كتبت بعد التعليقات على أسباب سوء سمعت السيارة الجميلة الميجان في موضوع "بفكر اشتري ميجان " حسيت إن في كلام كتير ممكن يوضح أكتر أسباب الإنهيار اللي حاصل في سعر هذه السيارة و مكنش اتقال في الموضوع دة ، و كمان كلام مفيد في حد ذاته فقلت أعمله موضوع لوحده لعل و عسى يكون فيه الإفادة .

واحدة من أشهر الحاجات اللي طلعت على الميجان (و الناس بتعتبرها نكتة ) إن العربية بتهنج ، يعني ساعة ناس تقولك الكارت بيهنج و ساعات يقولك العربية بتقف لوحدها و ساعات يقولوا لزم تعمل reset عشان تكمل مشوارك و وصلت النكت انها لو هانجت و هي ماشية بتتقلب و إن الكوتش بيتعمله set-up على العربية عشان تمشي عدل و حاجات كدة :)

طيب فين الحقيقة في الموضوع دة و فين النكتة ؟

طبعاً واضحة النكتة .. إن مفيش عربية بتتقلب لما تهنج ، لكن فين الحقيقة ؟

كلنا بنسمع عن حاجة اسمها كمبيوتر العربية و نسبة كبيرة من الناس مش مستوعبة إيه هو دة بالضبط لدرجة إن في ناس بتسأل هو دة بيكون فين في الشنطة ورا ولا تحت الكنبة ولا فين (والله ما تهريج أنا سمعت السؤال دة بنفسي )
الإجابة ببساطة : مفيش حاجة معينة اسمها كمبيوتر العربية ، العربيات الحديثة كلها عبارة عن نظم منفصلة (موتور ، شاسيه ، فرامل ، تكيف ، إضاءة ، ...) و كل نظام من دول بيتحكم فيه وحدة تحكم إلكترونية مبنية على micro-processor أو CPU يعني ذي اللي في الكمبيوتر بالضبط بيكون دوره تظبيط الأداء بتاع الوحدة دي على أحسن ما يكون (يعني بتاع الموتور يطلع أقصى قدرة منه ، و بتاع التكيف يطلع أكتر و أحسن تبريد منه و هكذا و كل وحدة من دول بنسميها ECU)
و طالما في CPU و كمبيوتر يبقى أكيييد في سوفتوير (طبيعي أمل يعني هتألف لوحدها :) ) ، و طالما في سوفتوير يبقى أكيد في إيه ...؟ قولوا انتو بقى يا حلوين ؟
أكيد في تهنيج بمعنى إن ممكن السوفتوير يعمل حاجة خارجة عن المألوف بتاعه و بالتالي الوحدة بتاعته تقف لحد ما يتعملها reset (دة إذا ما عرفتش تصلح وضعها خلال ثواني ) ، و دة اللي بنسميه ال-fail-safe يعني أول ما تلقي نفسها خرفت تحول تصلح الوضع في ثواني من غير ما تأثر على الأداء و لو معرفتش بتروح موقفة نفسها عن العمل في حالة أمان و تقول أنا في عندي مشكلة (تنور لمبة تحذير عشان السواق يعرف إن في مشكلة ) لحد ما سيادتك تعمل start تاني أو تروح تصلحها لو منفعتش تشتغل تاني.

تمام لحد كدة ؟ نقول تمام ، طيب ليه التعقيد دة ما طول عمرنا عايشين بعربية من غير الفيلم دة كله و ماشية تمام ، الإجابة ببساطة إن زمان مكنش في عربية 1600CC بتطلع 115 حصان ، و كان التكيف بيخليها تتقل في السحب ، دلوقتي الوحدات بتاعة الكمبيوتر دي بنها شبكة Network بخلي التكيف لم ييجي يشتغل يبعت يقول للموتور زود البور شوية عشان السواق ميحسش إن أنا اشتغلت و لم تحب تسحب أو تعمل kickdown ممكن الموتور يقول للتكيف استانة شوية و وقف الكباس لحد ما نعدي السحبة دي (ثواني متحسش بيها )
كل الكلام دة بيحصل عن طريق السوفتوير اللي على وحدات الكمبيوتر بتاعة العربية ال-ECUs

و كل ما زاد حجم السوفتوير زادت إمكانيات الراحة اللي في العربية و زادت امكانياتها و كمان زادت فرصة إلتهنيج و مشاكل السوفتوير المعروفة .

ثورة السوفتوير في العربيات دي ابتدت من حوالي ٨ إلى ١٠ سنين و واحدة واحدة كل العربيات بتتجه ليها ، من أوائل العربيات اللي ابتدينا نشوف فيها الثورة دي في مصر كنت الميجان و ابتدت بعديها تبان في الحاجات التانية (يعني كل الحاجات اللي ابتدت تتصمم بعد الفترة دي زي اللانسر الجديدة و الكورلا الجديدة والمازدا و الباسات و غيرها و غيرها ) و هتبتدي تبان فيها مشاكل سوفتوير طبيعية مع الوقت و بتتحل

بس الميزة الجميلة بقى في حكاية السوفتوير دي إن ممكن تتصلح بمجرد إن احنا بنعمل فيرجين Version جديدة تنزل على ال-ECU (مين فينا مجابش موبايل Nokia و طلع فيه مشكلة تهنيج و راح عمله update ؟؟ )

بعد كل اللي فات دة نتكلم تحديداً عن الميجان ، أيوة بتحصل فيها ساعات حركات نص كم و بقولها تاني بتحصل "بتحصل " ، بس كلها حاجات عبيطة و مش مشاكل خطيرة و مش ممكن ، تاني مش ممكن تحصل حاجة خطيرة (عشان فكرة ال-fail-safe اللي قلنا عليها ، غير بقى لو ربنا كاتب لواحد حاجة لا قدر الله و دي مفيش منها هروب )
طيب إيه أمثلة إلتهنيج اللي بيحصل :
١- الكاسيت ساعات ميرضاش يعلى ولا يوطي الصوت (بس شغال ) ، ببساطة إطفيه و شغله خلاص (حصلت مرة واحدة معايا )
٢- ينور لمبة الأعطال من غير سبب واضح و تروح لوحدها بعد ثانية واحدة
حاجات من النوع دة ، و بتحصل في كل العربيات اللي فيها سوفتوير بالحجم دة مش بس الميجان

الخلاصة إن دي حاجة عادية مش حاجة خاصة بالميجان ، وهانشوفها كتير في كل العربيات اللي هتطلع بعد كدة (و أنا أهو و انتو أهو :) )

أسف مرة تانية للإطالة و اتمنى أكون أفدتكم . مع خالص تقديري